Dövlətçilik tariximizin dönüş nöqtəsi

2020-ci il 27 sentyabr tarixdə Azərbaycan Ermənistanın növbəti təxribatlarının qarşısını qətiyyətlə alaraq torpaqlarımızın işğaldan azad olunması əməliyyatlarına başladı.

Cəmi 44 gün çəkən Vətən müharibəsi nəticəsində torpaqlarımız işğaldan azad edildi. Noyabrın 8-də Qarabağın incisi Şuşanın işğaldan azad olunması Azərbaycan tarixinin ən şərəfli zəfər gününü formalaşdırdı. Həqiqətən də, bu, Azərbaycan dövlətçiliyi tarixində, Azərbaycan xalqının həyatında çox mühüm, əlamətdar bir hadisədir.

Otuz il müddətində torpaqları Ermənistanın işğalı altında olanda Azərbaycan münaqişəni dinc vasitələrlə tənzimləməyə çalışdı. Bu zaman Azərbaycanın başlıca məqsədi ondan ibarət idi ki, regionda genişmiqyaslı müharibə baş verməsin, itkilər olmasın. Beynəlxalq hüquq çərçivəsində münaqişə ədalətli şəkildə, yəni Azərbaycanın ərazi bütövlüyü çərçivəsində öz həllini tapsın. Lakin bununla bərabər, Prezident cənab İlham Əliyev hər zaman vurğulayırdı ki, biz öz torpaqlarımızı hərbi yolla işğaldan azad etmək gücünə sahibik. Mənasız danışıqları sonsuzluğa qədər davam etdirməyəcəyik. Lakin Ermənistan və onun himayədarları Azərbaycanın sərgilədiyi mövqeyi lazımınca qiymətləndirməyi bacarmadılar və ölkəmizə qarşı təxribatlarını daha da intensivləşdirdilər, hətta yeni ərazilərimizi işğal etmək istəklərini çəkinmədən nümayiş etdirdilər. Belə olan halda təbii ki, hərbi yolla torpaqlarımızın işğaldan azad olunması zərurəti yarandı. Beləliklə, Silahlı Qüvvələrimiz hərəkətə keçdi. Cəmi 44 günə Müzəffər Ali Baş Komandan cənab İlham Əliyevin rəhbərliyi altında Azərbaycan Ordusu tariximizin qızıl səhifəsini yazdı.

Bugünkü tariximizdən dünənimizə boylananda nə qədər böyük və qətiyyətli yol keçdiyimizi bir daha görməkdəyik. Bir daha bu günün - 8 Noyabr - Zəfər Gününün əhəmiyyətini, tarixiliyini, qürurunu anlayırıq. Azərbaycan 44 günlük Vətən müharibəsi dövründə hərtərəfli potensiala sahib olduğunu bütün dünyaya nümayiş etdirdi. Azərbaycanın siyasi, diplomatik, iqtisadi, hərbi potensialı olduqca ahəngdar şəkildə Ermənistanın işğalçılıq siyasətinin aradan qaldırılması üçün öz təsirini göstərdi. 44 günlük müharibə dövründə ölkəmizə əsassız siyasi hücumlar da edilirdi, amma ölkə rəhbəri dünyanın 30-dan çox ən nüfuzlu kütləvi informasiya vasitəsinə müxtəlif dillərdə verdiyi müsahibələrlə bu hücumların qarşısını alırdı. Dövlətimizin başçısı haqlı mövqelərimizi əsaslandırır və əsassız hücumları təşkil edən dairələri qətiyyətlə susdururdu. Bu hərbi qələbəmizlə yanaşı, siyasi, diplomatik qələbəmizi də şərtləndirdi.

2020-ci il noyabrın 10-da imzalanan üçtərəfli Bəyanat Ermənistanın kapitulyasiya sənədi oldu. Həmin bəyanatda Azərbaycanın haqlı mövqeləri öz ifadəsini tapdı. Azərbaycan Prezidentinin qətiyyəti sənəddə ifadə olundu.

Torpaqlarımızın işğaldan azad olunduğu üç il ərzində bütün ərazilərimiz boyunca suverenliyimizin etibarlı və dönməz şəkildə təmin olunması istiqamətində hərtərəfli addımlar atdıq. Bunun özü də ayrıca bir strategiya kimi qiymətləndirilməlidir. Bütün ərazilərimiz boyunca suverenliyimizin təmin olunması strategiyası özündə siyasi, diplomatik, hərbi, iqtisadi komponentləri birləşdirirdi. Biz bu komponentlərin hər birini uğurla tətbiq edərək bayrağımızı Xankəndidə, Xocalıda ucaltdıq. Bu il aprelin 23-də Laçın yolunda nəzarət-buraxılış məntəqəsini qurmaqla ərazilərimiz boyunca suverenliyimizin təmin olunması istiqamətində olduqca əhəmiyyətli bir hadisə baş verdi. Laçın yolunda sərhəd-keçid məntəqəsinin qurulması 2020-ci ildə Vətən müharibəsindəki qələbəmiz qədər dəyərli idi.

Sentyabrın 19-20-də həyata keçirdiyimiz antiterror tədbirləri nəticəsində ölkəmizin ərazisində 30 ildən artıq mövcud olan separatizmə son qoyuldu və Azərbaycan dövlətçilik tarixini yenilədi, müstəqillik tarixini tamlaşdırdı. Biz müstəqilliyimizə qovuşan zaman artıq Xankəndi və ətraf ərazilər üzərində, demək olar ki, nəzarəti itirmişdik. Qarabağda, Xankəndidə ekstremizm yolu ilə separatçı bir rejim formalaşdırılmışdı və təbii ki, bu da bütün ərazilərimizdə suverenliyimizi təmin etməyə imkan vermirdi.

Prezident İlham Əliyevin strateji baxışları, iradəsi, əzmi sayəsində Azərbaycan, nəhayət ki, bütün əraziləri boyunca suverenliyə sahib olan müstəqil dövlət oldu. Prezidentin özünün də dediyi kimi, müstəqillik şərti ola bilməz. Həqiqətən də, Azərbaycan sözün əsl mənasında ərazi bütövlüyü təmin olunmuş, bütün ərazisi boyunca suverenliyə sahib müstəqil bir dövlətə çevrildi.

Bu baxımdan hesab edirəm ki, Vətən müharibəsi Azərbaycan dövlətçilik tarixinin, ümumiyyətlə, Azərbaycan xalqının bütün mövcudluq tarixinin bir dönüş nöqtəsi oldu. Biz bu gün tamam yeni obrazda beynəlxalq münasibətlərdə, əməkdaşlıqda iştirak etməkdəyik. Azərbaycan öz maraqları çərçivəsində tam müstəqil siyasət yeridən azsaylı dövlətlərdən biri olmaqla, müasir proseslərə, reallıqlara təsir imkanlarını da əhəmiyyətli dərəcədə artırıb və bu təsir imkanları da yenə bizim milli maraqlarımıza, inkişafımıza xidmət edən elementləri formalaşdırır.

Elşad MİRBƏŞİROĞLU,

Milli Məclisin deputatı

Azərbaycan.-2023.- 8 noyabr, № 245. - S.13.