8 Noyabr - Zəfər
Günü xalqımızın
qürur mənbəyinə
çevrilmiş şanlı
tarixdir. Həmin tarixin üç qəhrəmanı var: Müzəffər Ali Baş Komandan, onun formalaşdırdığı
yenilməz ordu və "dəmir yumruğ"a çevrilmiş
xalq. Bu reallıqda Prezident+Ordu+Xalq
sözləri sinonimləşmiş,
tarixi Zəfərin simvollarına çevrilmişdir.
Bu tarixi zəfəri ilə Prezident İlham Əliyev öz adını müzəffər
sərkərdə olaraq
təkcə mənsub
olduğu ölkənin
deyil, əslində, dünyanın hərb tarixinə əbədi olaraq həkk etdi. Bu tarixi
qalibiyyətin nəticəsində
ordumuzun yenilməzliyi,
qüdrəti və
vətənpərvərliyi sözdə deyil, döyüş meydanlarında
sübuta yetirildi. Xalq olaraq qəddimiz
düz, başımız
uca oldu. Qürurumuz özümüzə
qaytarıldı, alnımızdan
xəcalət təri
birdəfəlik silindi.
Birləşdik və
bütövləşdik. Ən
qatı əleyhdarlarımız
belə bu həqiqəti etiraf etmək məcburiyyətində
qaldılar.
Tarixi zəfər
nəticəsində təkcə
ərazi bütövlüyümüz
və suverenliyimiz təmin olunmadı, həm də erməni faşizminə ölümcül zərbə
endirildi. Ermənistanın
və dünya ermənilərinin son 30 il ərzində sitayiş etdikləri
"miatsum" ideologiyası
- İrəvan və Qarabağ ermənilərini
vahid dövlət tərkibində görməyi
hədəfləyən, bu
prosesdə qonşu Gürcüstan ərazisinə
də ilhaq zonası kimi yanaşan irticaçı
ideya iflasa uğradı. Ermənistan
dövləti və xalqı milli ideologiyadan məhrum olmuşdur. O, tarixin zibilliyinə atılmışdır.
Eyni məkanda "Ermənistan-diaspor-artsax"
ideoloji triadası da yer almışdır.
2020-ci il
noyabrın 8-də qədim Azərbaycan şəhəri,
Qarabağın incisi Şuşanın müasir hərb elminin
ən nadir və unikal əməliyyatlarından birinin həyata
keçirilməsi nəticəsində azad olunması
düşmənin müqavimət potensialını heçə
endirdi. Nəticədə noyabrın 10-da prezidentlər
İlham Əliyev, Vladimir Putin və baş nazir Nikol
Paşinyanın imzaladığı üçtərəfli
Bəyanat regionda uzunmüddətli münaqişənin hərbi
fazasını başa çatdırdı və faktiki olaraq
işğalçı Ermənistan dövlətinin
kapitulyasiya aktı oldu. Noyabrın 20-də Ağdam,
noyabrın 25-də Kəlbəcər, dekabrın 1-də isə
Laçın rayonu bir güllə
belə atılmadan, bir nəfər şəhid belə vermədən
işğaldan azad olundu.
Ordumuzun əldə
etdiyi tarixi zəfər heç bir halda təsadüfi
olmayıb, Prezident İlham Əliyevin rəhbərliyi
altında həyata keçirilən inkişaf
doktrinasının, o cümlədən hərbi quruculuq siyasətinin
məntiqi nəticəsi kimi qiymətləndirilməlidir. Təsadüfi
deyil ki, Qərb mətbu orqanlarında Azərbaycan Ordusunun hərbi
taktikası çox yüksək qiymətləndirilir. ABŞ
Hərbi Akademiyası və Pentaqonun rəsmiləri Azərbaycan
Ordusunun hərbi əməliyyatlarının öyrənilməsi
zərurətini qeyd edirlər.
Bu tarxi zəfərin
digər mühüm nəticələri də var.
"Müasir dünyada hüququn gücü deyil,
gücün hüququ işləyir və "güclüsənsə
haqlısan" məntiqi hökm sürür" deyən
Prezident İlham Əliyev böyük uzaqgörənlik
nümayiş etdirərək
ordu quruculuğu məsələlərini prioritet sahə
kimi müəyyən etmiş və bu istiqamətdə
möhtəşəm
addımların atılmasını təmin etmişdir.
Dövlətimizin başçısı vaxtilə
böyük uzaqgörənliklə
vurğulamışdır: "Əminəm ki, Azərbaycan
gücləndikcə ordumuz da
güclənəcək və ordumuz istənilən vəzifəni
həll etməyə hazırdır, buna qadirdir. Azərbaycan
Ordusu nəinki bölgədə, həm hərbi
potensialına, həm döyüş qabiliyyətinə, həm
də təchizatına görə dünya miqyasında
güclü ordular sırasındadır. Düşmən bilməlidir
ki, biz istənilən anda məsələni hərbi yolla həll
edə bilərik". Təsadüfi deyil ki, ölkəmizin
büdcə zərfində müdafiə xərcləri hər
zaman üstün mövqeyə malik olmuşdur. Əgər
2003-cü ildə Azərbaycanın hərbi büdcəsi 135
milyon dollara bərabər idisə, Vətən müharibəsinin
başladığı 2020-ci ildə
bu göstərici 1,9 milyard dollar təşkil
etmişdir.
Ölkəmizdə
qısa zaman ərzində 20-dən artıq hərbi zavodun
işə salınması və müasir hərbi-sənaye
kompleksinin formalaşması tarixi nailiyyət hesab
olunmalıdır. 5-ci nəsil silahların dünyanın
aparıcı silah ixracatçılarından alınması və
bu sahədə də uğurlu şaxələndirmə siyasətinin
tətbiq edilməsi ölkəmizə təkcə hərbi deyil, həm də
siyasi dividendlər gətirmişdir.
Ordumuzda döyüş ruhu və
hərbi-vətənpərvərlik hissinin
ən yüksək səviyyəsi təmin edilmişdir. Ordumuz Vətən
qarşısında
xilaskarlıq missiyasını həyata keçirdiyindən
intəhasız motivasiyaya malik olduğu halda, düşmən
ordusu öz işğalçı
mahiyyəti səbəbindən bütün bunlardan məhrumdur. "Yenilməz" erməni
ordusunun gücü isə yalnız əliyalın dinc insanlara
çatır. Müharibə dövründə Ermənistan
hakimiyyəti növbəti hərbi cinayətlərə imza
atmışdır.
Onu da qeyd edək
ki, 2021-2023-cü illərdə dövlət büdcəsindən
işğaldan azad olunmuş ərazilərin bərpası və
yenidənqurulması işlərinə 7 milyard ABŞ
dolları vəsait xərclənmişdir. 2024-cü ilin
dövlət büdcəsində eyni məqsəd
üçün ən azı 2,4 milyard ABŞ dolları həcmində
vəsaitin ayrılması nəzərdə tutulur.
Böyük qayıdış proqramı uğurla icra edilir.
Artıq keçmiş məcburi köçkünlərin,
bu torpaqların əsl sahiblərinin Laçın və
Füzuli şəhərlərinə və üç kəndə
qayıdışı təmin edilmişdir. 2026-cı ilin
sonunadək Qarabağa və Şərqi Zəngəzura 140
mindən artıq insanın geri dönməsi nəzərdə
tutulur.
Beləliklə,
Azərbaycan 30 illik münaqişəni hərbi-siyasi yollarla həll
etdi, ərazi bütövlüyünü və tarixi ədaləti
bərpa etdi. Türkiyə kimi güclü qardaş dövlətin
Vətən müharibəsinin ilk saatlarından başlayaraq
Azərbaycanın yanında olduğunu bəyan etməsi,
ölkəmizə böyük mənəvi və siyasi dəstək
göstərməsi üçüncü dövlətlərin
hərbi avantürasının qarşısının
alınmasında müstəsna rol oynadı. Ermənistanın
siyasi-hərbi rəhbərliyinin Kollektiv Təhlükəsizlik
Müqaviləsi Təşkilatını müharibəyə
cəlb etmək niyyəti fiaskoya uğradı.
Zəfər
paradında çıxış edən Prezident İlham
Əliyev tarixin sınağından şərəflə
çıxmış Azərbaycan-Türkiyə birliyinə və
qardaşlığına diqqəti cəlb edərək
vurğuladı ki, "Vətən müharibəsinin ilk
günlərindən, daha doğrusu, ilk saatlarından biz
Türkiyənin dəstəyini hiss edirdik. Türkiyənin
Cümhurbaşqanı Rəcəb Tayyib Ərdoğan ilk
saatlardan Azərbaycanın haqq işinə öz dəstəyini
verdi. Onun açıq, birmənalı və sərt
açıqlamaları Azərbaycan xalqını çox
sevindirdi. Mənim qardaşım demişdir ki, bu müharibədə
Azərbaycan haqlıdır, demişdir ki, Azərbaycan tək
deyil və Türkiyə hər zaman Azərbaycanın
yanındadır. Bu, birliyimizin,
qardaşlığımızın təzahürüdür".
2021-ci il iyunun
15-də iki qardaş dövlətin prezidentlərinin Azərbaycanın
mədəniyyət paytaxtı Şuşada
imzaladıqları bəyannamə ilə ikitərəfli
münasibətlərimiz strateji müttəfiqlik səviyyəsinə
yüksəldi. Azərbaycan və Türkiyə dövlətləri
hərbi müttəfiqə çevrildilər.
Xüsusi olaraq
onu da qeyd edək ki, Prezident İlham Əliyevin ən yaxın
məsləkdaşı, ölkəmizin Birinci vitse-prezidenti mərhəmətli
Mehriban xanım Əliyeva 44 günlük Vətən
müharibəsinin çətin və şərəfli
günlərində torpaq uğrunda canını fəda
etmiş şəhidlərlə bağlı rəsmi
"İnstaqram" səhifəsində çoxsaylı
paylaşımlar edərək, onların şücaətini əsl
qəhrəmanlıq, rəşadət və qorxmazlıq
nümunəsi kimi qiymətləndirmişdir. "Bu gün mən
şəhidlərimizin ailələri ilə birlikdə kədərlənir,
Vətən naminə canından keçməyə hazır
olan oğullar tərbiyə etmiş valideynlərin
qarşısında baş əyirəm. Şəhidlərimizin
qanı nahaq yerə tökülmədi - biz tarixi ədaləti
bərpa etdik, müqəddəs Qələbə qazandıq.
Bu Qələbə xalqımızın tarixinə əbədi
həkk olundu! Hər birimiz bu Zəfərin nəyin
bahasına qazanıldığını yadda saxlamağa
borcluyuq! Biz Vətən müharibəsi şəhidlərini
heç vaxt unutmayacağıq", - deyən ölkəmizin
birinci xanımı Mehriban Əliyeva şəhidlərimizin əziz
xatirəsinin hər zaman qəlbimizdə
yaşayacağını vurğulamışdır.
Hörmətli
Mehriban xanım Əliyeva
Prezident İlham Əliyev ilə birlikdə
işğaldan azad olunmuş müqəddəs
torpaqlarımıza davamlı səfərlər edərək
Ali Baş Komandanın erməni vəhşiliyi və
barbarlığını ifşa edən fikirlərini çəkdiyi
unikal videokadrlarla zənginləşdirmiş və
tamamlamışdır. Bir çox halda bu kadrlar ilkin mənbə
rolunu oynamaqla erməni faşizminin eybəcər
simasını dünya ictimaiyyətinə tanıtmaq
baxımından misilsiz əhəmiyyətə malikdir.
44 günlük
müharibədən sonra Ermənistanın siyasi-hərbi rəhbərliyi
və onun himayəsi altındakı Qarabağdakı
separatçı rejimin tör-töküntüləri məğlubiyyətlərindən
lazımi nəticə çıxara bilmədilər.
Bu şəraitdə Azərbaycanın antiterror tədbirləri
keçirməkdən və öz suverenliyini tam bərpa etməkdən
başqa seçim yolu qalmadı. 2023-cü il sentyabrın
19-20-də bir sutkadan da az davam edən antiterror tədbirləri
nəticəsində Ermənistanın Qarabağdakı ordusu
tamamilə tərk-silah edildi, 10-15 min nəfərlik
separatçı kontingent silahsızlaşdırıldı və
ərazimizin üzərində tam nəzarət bərpa
olundu.
Uzun illər ərzində
ilmə-ilmə işlənən, müxtəlif dövrlərdə
Cənubi Qafqazla bağlı planları olan qüvvələrin
dəstəyi ilə reallaşdırılmağa
çalışılan "böyük Ermənistan"
planı Azərbaycan liderinin uzaqgörən siyasəti, qətiyyəti
və iradəsi sayəsində süquta uğradı,
darmadağın edildi. Erməni "miatsum"u, "ikinci erməni
dövləti" xəyalları birdəfəlik məhv
edildi.
Qarabağda Azərbaycan
xalqının qanını tökmüş, Xocalıda
soyqırımı törətmiş hərbi canilər
artıq əli qandallı Bakıya gətirilmiş, onlara
qarşı istintaq hərəkətlərinə
başlanılmışdır. İnsanlıq əleyhinə
ağır cinayətlər törətmiş bu müharibə
canilərinə qarşı sərt və ədalətli cəzanın
tətbiq olunacağı labüddür.
Müharibəni udan Ali Baş
Komandanın sülhü qazanacağı da sırf zaman məsələsidir.
Bu, aksiomdur. İsbata ehtiyacı yoxdur.
Yaşasın
Xilaskar Ali Baş Komandanımız! Yaşasın Müzəffər
Ordumuz! Yaşasın Qalib Xalqımız!
Elman
NƏSİROV,
Milli Məclisin
deputatı
Azərbaycan.-2023.- 8 noyabr,
¹ 245. - S.14.