Azərbaycan Ordusu son üç ildə daha da güclənib

Vətən müharibəsindən sonrakı dövrdə ordumuzun imkanları, döyüş hazırlığı və silah-texnika arsenalının daha da təkmilləşdirilməsi istiqamətində mühüm islahatlar aparılıb.

İftixar hissi ilə deyə bilərik ki, qazanılan tarixi qələbədən sonra Qazaxdan başlayaraq, Hadruta, Xudafərinədək, habelə Naxçıvan Muxtar Respublikası istiqamətində Azərbaycan-Ermənistan dövlət sərhədi boyunca düşmən təxribatlarının və erməni silahlı birləşmələrinin hücumlarının qarşısını almaq, insanların təhlükəsizliyinə lazımi təminat yaratmaq üçün yeni sərhəd zastavaları və müxtəlif təyinatlı hərbi hissələr yaradılıb. Bu, Qarabağ bölgəsinin 30 illik işğalına son qoyulmasında, habelə erməni separatizminə qarşı antiterror tədbirlərinin uğurla başa çatdırılmasında əsas amilə çevrilməklə, Azərbaycan ictimaiyyətində qürur hissi doğurur.

Cari il iyul ayının sonuncu ongünlüyündə Azərbaycan Prezidenti İlham Əliyev "4-cü Sənaye İnqilabı dövründə Yeni Media" mövzusunda Şuşa Qlobal Media Forumunda çıxışında bir daha vurğulamışdı: "Biz unutmamalıyıq ki, İkinci Qarabağ müharibəsinin nəticələrinə baxmayaraq, bu gün Ermənistan cəmiyyətinin, hətta hökumətinin tərkibində müəyyən insanlar var ki, hələ də revanşist ideyalarla yaşayır və onlar bunu gizlətmirlər. Ona görə biz hər hansı bir ssenariyə hazır olmalıyıq. Bu məqsədlə biz İkinci Qarabağ müharibəsi bitən kimi, möhtəşəm Zəfərimizi nümayiş etdirən kimi dərhal yenidən müdafiə sahəsində dərin islahatlar həyata keçirməyə başlamışıq. Mən artıq bunu ictimai şəkildə bəyan etmişəm. Bu gün ordumuz üç il əvvəlki ordudan daha güclüdür. Buna, əlbəttə ki, ehtiyac var".

Xəzər Müdafiə Tədqiqatları Mərkəzinin rəhbəri, hərbi şərhçi Ramil Məmmədli bildirir ki, Ali Baş Komandanın Azərbaycan Ordusunun imkanları, gücü haqqında səsləndirdiyi fikirlər Silahlı Qüvvələrimizdə son üç il ərzində həyata keçirilən mühüm islahatlara diqqətin yönəldiyini göstərir. 2020-ci ilin Vətən müharibəsindən sonra ordumuzun imkanları, döyüş hazırlığı və silah-texnika arsenalının daha da təkmilləşdirilməsi üçün mərhələli islahatlara start verilib. Bu gün Azərbaycan Ordusu üç il əvvəlkindən daha güclüdür. Ali Baş Komandanın tapşırığı ilə Silahlı Qüvvələrimizdə yeni ordu birləşməsinin yaradılmasına start verilib, Quru Qoşunlarının komandanlığı, ümumiyyətlə, strukturu formalaşdırılıb. Paralel olaraq Quru Qoşunlarının tərkibində komanda hərbi birləşmələri yaradılıb. Ordumuzun digər strukturlarında da silah-texnika arsenalının təkmilləşdirilməsi üçün ciddi işlər görülüb. İl ərzində yeni texnologiyaların Azərbaycan Silahlı Qüvvələrinin istifadəsinə verilməsi ordumuzun gücünü daha da artırıb.

Döyüş və aviasiya vasitələrinin təkmilləşdirilməsi işləri həyata keçirilib, onların silah arsenalı yenilənib, birgə əməliyyatların aparılması istiqamətində bir sıra tədbirlər görülüb. İyul ayının sonlarında Hərbi Dəniz Qüvvələri, Hərbi Hava və Hava Hücumundan Müdafiə Qüvvələri, həmçinin Quru Qoşunlarının Xəzər dənizində birgə keçirdiyi təlim buna bariz nümunədir. Xatırladaq ki, Azərbaycan Ordusu elə bir mərhələyə gəlib çatıb ki, Qarabağda, ümumiyyətlə, erməni silahlı birləşmələri və separatçı qüvvələrin zərərsizləşdirilməsi, eləcə də tərk-silah edilməsi artıq qlobal problemə çevrilmədi, təxminən 24 saatdan sonra separatçılar ağ bayraq qaldıraraq təslim olduqlarını bildirdilər.

Müzəffər Ali Baş Komandan İlham Əliyevin forumda söylədiyi kimi, "Silahlı Qüvvələrimizin bütün qoşun növləri və strukturu artıq yeni inkişaf mərhələsinə keçib. İndi qabaqcıl islahatlar, daha da modernləşmək, bütün ordulara xas olan formada ənənəvi yenilənmə prosesləri həyata keçirilir. Yəni bu gün Azərbaycan Ordusu bu baxımdan kifayət qədər irəliləyib. Sadəcə olaraq silah arsenalının, döyüş hazırlığının reallıqlara daha uyğun olaraq təkmilləşdirilməsi istiqamətində işlər aparır. Bu da təbii prosesdir, çünki dünyanın ən güclü ordularında belə işlər görülür".

Etiraf edək ki, Silahlı Qüvvələrimizin güclənməsi həm də müdafiə sənayesi sektorunun inkişafına bağlı olan məsələdir. Məhz Azərbaycan müdafiə sənayesinin sektorunun paralel olaraq inkişafı, silah-texnika istehsalı sahəsindəki yeniliklər ümumilikdə Azərbaycanın müdafiə imkanlarının genişlənməsinə xidmət edir.

Dünya ictimaiyyəti etiraf edir ki, Azərbaycan Ordusu Cənubi Qafqazın ən güclü Silahlı Qüvvəsidir. Hazırda ölkəmizdə yaradılan müasir və modern ordu quruculuğu ilə yanaşı, qazanılan bütün nailiyyətlərin əsasında Ümummilli Lider Heydər Əliyev tərəfindən müəyyənləşdirilən siyasi kurs və Prezident İlham Əliyevin bu kursu uğurla davam etdirməsi faktı dayanır.

Əsası Ulu Öndər Heydər Əliyev tərəfindən qoyulan bu siyasətin uğurla həyata keçirilməsi nəticəsində Azərbaycan dünyanın dinamik inkişaf edən, modernləşən, beynəlxalq miqyasda nüfuzu gündən-günə artan dövlətinə çevrilir. Ölkəmiz həm də ötən dövr ərzində sayılıb-seçilən dünya dövlətləri səviyyəsində möhtəşəm ordu quruculuğuna nail olub. Bunu təkcə Azərbaycan vətəndaşları deyil, tanınmış hərbi ekspertlər, analitiklər və dünya ictimaiyyəti təsdiq edir.

Məmnunluq doğuran odur ki, Azərbaycan Prezidenti, Silahlı Qüvvələrin Ali Baş Komandanı İlham Əliyevin diqqət və qayğısı sayəsində sistemli ordu quruculuğu prosesi yeni keyfiyyət mərhələsinə yüksəlib. Görülən işlərin nəticəsində Azərbaycan Ordusu yüksək döyüş hazırlığına nail olub və qarşıya qoyulan istənilən tapşırığı şücaətlə yerinə yetirməyə qadirdir.

Ölkəmizin hərbi sənaye kompleksi də inkişaf edir. Belə ki, Müdafiə Sənayesi Nazirliyi xeyli adda hərbi məhsullar istehsal edir ki, bu da beynəlxalq müstəvidə hərbi sənaye kompleksimizə, istehsal olunan silahlara və digər məhsullara marağı xeyli artırır. Beynəlxalq sərgilərdə ölkəmizin hərbi məhsullarına xüsusi diqqət yetirilməsi bunu deməyə əsas verir.

Azərbaycanda istehsal olunan bir çox hərbi təyinatlı məhsul ordumuzun potensialını gücləndirir. Son illər ərzində ölkəmizdə 20-dən çox hərbi zavod yaradılıb. Bu zavodlarda çoxsaylı hərbi təyinatlı müxtəlif məhsul istehsal olunur. Eyni zamanda Azərbaycan artıq hərbi məhsullarını ixrac etməyə başlayıb. Son üç ildə Azərbaycan Ordusu daha da möhkəmlənib. Dövlətimizin başçısının qeyd etdiyi kimi, son illər ərzində ən müasir texnika və silahlar alınıbdır: "Onların arasında yüzlərlə zirehli texnika, bir çox gözətçi gəmiləri, hərbi gəmilər, hava hücumundan müdafiə sistemləri, ən müasir standartlara cavab verən sistemlər, onlarla döyüş təyyarəsi, yüzdən çox döyüş, hərbi nəqliyyat, nəqliyyat helikopteri, ən müasir kəşfiyyat və döyüş pilotsuz uçuş aparatları, ən müasir artilleriya qurğuları, uzaqmənzilli raketlər, yaylım atəşli raket sistemləri, əməliyyat-taktiki raket kompleksləri - bütün bunlar bizim hərbi gücümüzü artırır. Deyə bilərəm ki, ordunun maddi-texniki təchizatı baxımından Azərbaycan dünya miqyasında nadir ölkələrdən biridir".

Azərbaycanda hərbi məktəblərin uğurlu fəaliyyəti də bu baxımdan mühüm əhəmiyyətə malikdir. Bu, sözügedən sahədə tədris prosesinin sistemli şəkildə və ardıcıllıqla davam etdirilməsinə, nəticə etibarilə, kadr potensialının inkişafına, orduda peşəkarlığın daimi olaraq artırılmasına imkan verir. Bundan başqa, Azərbaycan zabitləri NATO standartlarına uyğun olaraq hərbi təlimlərdə iştirak edir, kurslar keçirlər. Hərbçilərimiz istər ABŞ-də, istər Türkiyədə, istərsə də, Avropanın ayrı-ayrı ölkələrində təcrübələrini artırırlar, gənclərimiz müxtəlif ölkələrə hərbi təhsil almağa göndərilirlər.

Bütövlükdə, Azərbaycan Silahlı Qüvvələri quruda, suda və havada döyüş tapşırığını yerinə yetirmək, ölkəni istənilən hücumdan müdafiə etmək qüdrətinə malikdir. Beynəlxalq hərbi tədqiqat mərkəzlərinin rəyinə görə, Azərbaycan Ordusu regionun ən hazırlıqlı və müasir hərbi strukturu sayılır.

Təsadüfi deyil ki, indi dünyanın inkişaf etmiş dövlətləri Azərbaycan Silahlı Qüvvələrinin hərbi taktikasını öyrənir. Dünyanın aparıcı hərbi məktəblərində İkinci Qarabağ müharibəsindəki əməliyyatlarımız, uğurlarımız, qələbəyə aparan yollar, taktiki addımlar əxz edilir. Xarici KİV-də dəfələrlə məlumat verilmişdir ki, Amerika Birləşmiş Ştatları, Böyük Britaniya, Almaniya və inkişaf etmiş digər ölkələrdə İkinci Qarabağ müharibəsinin bütün aspektləri, eləcə də Qarabağda separatizmə qarşı keçirilən antiterror tədbirləri Azərbaycan Silahlı Qüvvələrinin hərbi taktikası, terror və təxribat əməllərinin qarşısının alınması üsulları tədris edilir. Əsgər və zabitlərimizin döyüş qabiliyyətini yüksək qiymətləndirən ekspertlər bu fikirdədirlər ki, Azərbaycan Ordusunun döyüş taktikası hətta ən fövqəlgüc ölkələrin ordularında belə qeydə alınmayıb. Hücum dronlarının döyüşdəki yüksək hədəf dəqiqliyi dünya hərb tarixində bir ilkdir. Şuşanın azad edilməsi uğrunda hərbçilərimizin nümayiş etdirdiyi qeyri-adi peşəkarlıq beynəlxalq ictimaiyyətdə heyrət doğurub.

Görünən odur ki, dünyanın ən güclü silahlı qüvvələri sırasında yer alan Azərbaycan Ordusu Ali Baş Komandan İlham Əliyevin bütün əmr və tapşırıqlarını yerinə yetirməyə, xalqımızın və dövlətimizin etimadını şərəflə doğrultmağa tam hazırdır.

Rəhman SALMANLI,

Azərbaycan.-2023.- 8 noyabr, № 245. - S.15.