Afrikadan qovulan "böyük bacı" indi də Qafqaza yerləşmək istəyir

Fransa bütün səylərini yeni müharibəyə yönəldib

Qarabağ münaqişəsinin başa çatması, Azərbaycanın ərazi bütövlüyünü bərpa etməsi Qərbin ermənipərəst siyasi dairələrini rahat buraxmır.

Təsadüfi deyil ki, həmin dairələrin başında gələn Fransa Azərbaycanla Ermənistan arasında sülhün əldə olunmasının qarşısını almaq üçün dəridən-qabıqdan çıxmaqdadır. Bu ölkə tərəfindən heç bir zərurət olmadan Ermənistanın silahlandırılması da sülh müqaviləsinin qarşısının alınmasına hesablanıb.

Qeyd edək ki, bu günlərdə kütləvi informasiya vasitələrində və sosial şəbəkələrdə Fransanın Ermənistana hərbi texnika göndərməsi ilə bağlı məlumatlar yayılıb. Göndərilən hərbi texnikalar Fransanın "Acmat" şirkətinin istehsalı olan çoxfunksiyalı "Bastion" adlanan zirehli avtomobillərdir. Fransa və Ermənistan tərəfindən bu barədə rəsmi məlumatlar verilməsə də, zirehli texnikaların göndərildiyi dəqiqdir.

Məlumdur ki, Azərbaycanın öz suveren ərazilərinə nəzarəti tam olaraq təmin etməsindən sonra sülhün əldə edilməsi üçün şanslar daha da çoxalıb. Bakı hər zaman olduğu kimi, bölgədə dayanıqlı sülhün bərqərar edilməsi üçün yaranmış bu münbit şəraitdə də sülh gündəliyinin irəlilədilməsində qərarlıdır. Lakin Ermənistan tərəfi sülh prosesinin reallaşması üçün yaranmış şansdan bəhrələnmək əvəzinə yenə də müxtəlif məzmunlu manipulyasiyalarla məşğuldur. Hazırda Ermənistan rəhbərliyi sülh sazişindən, münasibətlərin normallaşdırılmasından, sərhədlərin delimitasiyası və demarkasiyasından dəm vurur, 1991-ci il Alma-Ata Bəyannaməsinə sadiqliyini bildirir. Amma əməli işə gələndə bütün bunlarla daban-dabana zidd olan davranış nümunələrini ortaya qoyur.

Sülhün əldə edilməsinə əngəl yaradan əsas amillərdən biri isə Fransa başda olmaqla erməni təəssübünü çəkən Qərbin bəzi siyasi mərkəzlərinin siyasi-hərbi avantüralarıdır. Bu baxımdan münasibətlərin normallaşdırılması ilə bağlı danışıqların nəticəsiz qalmasının əsas səbəblərindən biri də xüsusən Fransanın Ermənistan hakimiyyətinə təsir və təzyiqləridir. Ötən dövr ərzində ölkəmizə qarşı qərəzli iddialarla çıxış edən, xəstə erməni təfəkkürünün qatı müdafiəçisi olan Fransa Azərbycan-Ermənistan münasibətlərinin normallaşdırılması ilə bağlı müzakirələrdə İrəvanın beynəlxalq hüququn norma və prinsiplərini görməzdən gəlməsi üçün bütün imkanlarını səfərbər edib. Fransadan Ermənistana hərbi texnikanın göndərilməsi də münasibətlərin normallaşdırılmasına və sülhün əldə edilməsinə qarşı olan bir avantüradır.

Azərbaycan Xarici İşlər Nazirliyi Fransa tərəfindən Ermənistana hücum xarakterli "Bastion" zirehli avtomobillərinin göndərilməsini qətiyyətlə pisləyib. XİN-in mətbuat katibi Ayxan Hacızadə bu barədə bildirib: "Sözügedən hərbi texnikanın ötürülməsi Azərbaycan Respublikasının ərazilərinin bir hissəsini 30 ilə yaxın dövrdə işğal altında saxlayan, hal-hazırda da təcavüzkar siyasətdən və ritorikadan əl çəkməyən Ermənistanın hərbi potensialını gücləndirməyə və bölgədə destruktiv fəaliyyətinə xidmət edəcək. Özünü beynəlxalq hüququn təbliğatçısı, bölgədə sülh və sabitliyin tərəfdarı kimi təqdim edən Fransanın bu addımları regionda dövlətlərin suverenliyi, ərazi bütövlüyü və beynəlxalq sərhədlərinin qarşılıqlı şəkildə tanınması və hörmət edilməsi əsasında əlaqələrin normallaşdırılması səylərini ciddi şəkildə sual altına qoyur və vəziyyətin gərginləşdirilməsinə xidmət edir".

Onu da qeyd edək ki, 8 nəfərlik "Bastion" zirehli avtomobili Afrikanın iqlim şəraitinə uyğun olaraq, məhz bu qitədə və Yaxın Şərqdə olan Fransa silahlı qüvvələrinin bölmələrinin istifadəsi üçün hazırlanıb. Fransa isə hazırda Afrikadan qovulur. Məlum olduğu kimi, son aylarda Fransa bəzi Afrika ölkələrindəki hərbi qüvvələrini çıxarmaq məcburiyyətində qalıb. Çox güman ki, indi həmin ölkələrdəki istifadə olunmuş "Bastion" zirehli avtomobillərini Fransa Ermənistana göndərir. Başqa cür desək, "böyük bacı" qoymağa yer tapmadığı və istismar müddəti bitmiş bu texnikaları Ermənistana göndərməklə həm də başından edir. Bütün konstruksiyaları və texniki parametrləri xüsusilə isti havaların hakim olduğu Afrikanın iqlim şəraitinə uyğun olan bu texnikaların ərazisi əsasən dağlıq və dağətəyi zonalardan olan Ermənistanda özünü doğrultmayacağı isə indidən aydındır. Görünən həm də odur ki, 44 günlük müharibədəki məğlubiyyətdən sonra hərbi texnikaya görə Rusiyanı günahlandıran Ermənistan yeni silahlar almaq ümidi ilə Fransaya üz tutsa da, "böyük bacı" ona sadəcə öz köhnələrini göndərir.

Bütövlükdə bu hərbi texnikanın Ermənistana göndərilməsi bir daha təsdiq edir ki, Fransa bütün imkanlarından istifadə etməklə sülhə qarşı çıxır. Bundan itirən isə Azərbaycan yox, Ermənistan olacaq. Çünki Azərbaycan ərazi bütövlüyünü tam bərpa edərək qarşısına qoyduğu milli məqsədinə çatıb.

Rəşad CƏFƏRLİ,

Azərbaycan.-2023.- 14 noyabr, № 247.- S.10.