"2023-cü il noyabrın
8-də Xankəndidə Vətən
müharibəsində əldə
edilən Zəfərin
3-cü ildönümünə həsr edilmiş hərbi paradı bütün xalqımız,
eləcə də dünya azərbaycanlıları
böyük sevinc və qürurla izlədi. Hərbi paradda Prezident, Silahlı Qüvvələrin
Ali Baş Komandanı İlham Əliyev Vətən müharibəsində Azərbaycan
Ordusunun əsgər və zabitlərinin göstərdiyi qəhrəmanlığı,
şücaəti, Azərbaycan
xalqının nümayiş
etdirdiyi həmrəylik
və mərdliyi, Ermənistanla onun havadarlarının ölkəmizə
qarşı təxribat
xarakterli siyasət həyata keçirdikləri
barədə çıxış
etdi".
Bu sözləri
"Azərbaycan" qəzetinə
açıqlamasında Milli
Məclisin deputatı
Kamilə Əliyeva deyib. Deputat bildirib ki, Ermənistanın
torpaqlarımızı işğal
altında saxladığı
dövrlərdə də
xalqımız inanırdı
ki, Heydər Əliyev siyasi kursunu, irsini davam etdirən müdrik, qətiyyətli,
uzaqgörən siyasətçi,
eləcə də mahir diplomatik bacarığa, sarsılmaz siyasi iradəyə sahib olan İlham Əliyev Azərbaycanı
dünyada güclü
bir dövlətə çevirəcək və
düşmən tapdağında
olan torpaqlarımızı
azad edəcək.
"2003-cü il oktyabrın
15-də ilk dəfə Prezident
seçilən cənab
İlham Əliyev andiçmə mərasimində
torpaqlarımızı işğaldan
azad edəcəyi barədə xalqa söz verdi. Belə də oldu. Azərbaycan iqtisadiyyatı hər il inkişaf etdi, ordumuzun maddi-texniki bazası yeniləndi, ən müasir silahlarla təmin edildi. Bütün bu işlər bizi böyük Zəfərə
yaxınlaşdırırdı", - deyə deputat bildirib.
Kamilə Əliyeva
qeyd edib ki, 2020-ci ildə Azərbaycan Ordusu Ermənistanın hərbi
təxribatlarının qarşısını
almaq üçün
əks-hücuma keçdi
və 44 gün ərzində düşmən
ordusunu darmadağın
edərək şəhər
və kəndlərimizi
işğaldan azad etdi: "Azərbaycanın əsgər
və zabitləri misli görünməmiş
böyük qəhrəmanlıq
göstərdilər, müharibə
zamanı bir addım belə geri çəkilmədilər.
Azərbaycan Ordusunun qəhrəmanlığı və
şücaətindən qorxuya
düşən erməni
əsgərləri təşviş
içində döyüş
meydanlarını tərk
edirdilər. Ermənilər
özləri də etiraf edirdilər ki, 44 günlük müharibə zamanı 12
min erməni əsgər
və zabiti fərarilik etmişdir. Amma Azərbaycanın Silahlı Qüvvələrinin
bir nəfər hərbçisi belə döyüş meydanını
tərk etməmişdir.
Nəhayət, 2020-ci il
noyabrın 8-də Şuşanın
işğaldan azad edilməsi Zəfər Günü kimi tarixə yazıldı. Məhz Şuşa işğaldan azad edildikdən sonra Ermənistan məğlub olduğunu etiraf edərək kapitulyasiya aktına imza atdı".
Deputatın sözlərinə
görə, 2023-cü ilin
sentyabrında Azərbaycan
Ordusunun həyata keçirdiyi lokal xarakterli antiterror tədbirləri nəticəsində
Azərbaycanın suverenliyi
tam bərpa edildi, Qarabağda separatizmin kökü kəsildi. Bu il oktyabrın 15-də Prezidentin Xankəndidə Azərbaycan bayrağını
ucaltması tariximizə
yazılan şanlı
bir gün oldu.
Kamilə Əliyeva
vurğulayıb ki, Prezident 20 il əvvəl xalqımıza
verdiyi vədi yerinə yetirdiyini Xankəndidəki hərbi
yürüşlə bir
daha sübuta yetirdi: "Bu gün dünya ictimaiyyəti, o cümlədən
ermənilər və
onların havadarları
yaxşı başa düşürlər ki, Prezident İlham Əliyev nəyi deyibsə, ona da əməl edib. Dövlət başçımızın sözü
imzası qədər
dəyərlidir. Hərbi
paradda Prezident İlham Əliyevin söylədiyi fikirlər
həm də Ermənistana və havadarlarına mesaj xarakteri daşıyır.
Ermənistan hakimiyyəti, revanşist
qüvvələr və
onların arxasında
dayananlar bu ölkənin 2020-ci ildəki
aqibətini unutmamalıdırlar".
Nəzrin QAFARZADƏ,
Azərbaycan.-2023.-
14 noyabr, № 247.- S.11.