Fransa Ermənistanı məhvə sürükləyir

Cənubi Qafqazla bağlı məkrli maraqları olan Fransa Azərbaycan-Ermənistan münasibətlərinin gərgin qalması, sülh müqaviləsinin bağlanmaması üçün cidd-cəhdlə çalışır.

Paris Azərbaycanofob siyasətinin, ölkəmizə qarşı qarayaxma kampaniyalarının nəticə vermədiyini görərək indi də Ermənistanı başqa yolla "dəstəkləyir".

Bunun bariz nümunələrindən biri bu günlərdə Ermənistana zirehli avtomobillərin göndərilməsidir. Bütün bunlar Fransanın Ermənistanı silahlandırmaqla regionda vəziyyəti gərginləşdirməyə çalışdığını bir daha sübut edir.

Milli Məclisin deputatı Arzu Nağıyev mövzu ilə əlaqədar "Azərbaycan" qəzetinə açıqlamasında deyib ki, Ermənistanın silahlandırılması Fransanın ona havadarlıq etməsinin bariz nümunəsi və sübutudur.

Deputat qeyd edib ki, bu, birinci hal deyil. Fransa vaxtilə vizual kəşfiyyatçılardan ibarət jandarm qüvvələrini Ermənistana göndərməklə müstəmləkə siyasətini davam etdirdiyini göstərdi: "Dəfələrlə xəbərdarlıq edilməsinə baxmayaraq, riyakar ölkə Ermənistanı himayə edir. Bunun da öz səbəbləri var. Vaxtilə işğal altında olan ərazilərimizdən iqtisadi, siyasi və digər istiqamətlərdə çox ciddi gəlirlər əldə etmiş Fransanın bu imkanları bu gün əlindən çıxıb. Eyni zamanda gələcək seçkilər üçün erməni lobbisinin səsini toplamaq naminə başda prezident olmaqla, Fransa siyasətçiləri bu addımları atırlar".

A.Nağıyev bildirib ki, digər məsələ Ermənistana silah verməklə onları boyunduruğa salmaqdır. Məlum məsələdir ki, Ermənistanın tənəzzülə uğramış iqtisadiyyatı ilə o ödəmələri həyata keçirməyə o qədər gücü yoxdur. Nəyin bahasına olursa-olsun, həmin jandarm qüvvələrini böyük bir briqadaya çevirərək silahlandırmağa çalışırlar. Bu da regionda sülhün bərqərar olmasına ən ciddi zərbələrdən biridir. Regiona nə qədər çox silah-sursat gəlsə, sülh müqaviləsinin imzalanması o qədər uzanacaq. Yəni Ermənistan bu silahlardan istifadə edəcək.

Deputat deyib ki, Fransa bununla həm də Ermənistana guya kömək etdiyini göstərir. "Məlumdur ki, Rusiyanın regiondan çıxması inandırıcı deyil. Onlar Rusiyanın alternativini yaratmağı düşünürlər. Bundan başqa, Fransanın Türkiyəyə qarşı addımları da göz qabağındadır və o, regionda nüfuz sahibi olmaq istəyir. Bu ölkə dünyanın müxtəlif qaynar nöqtələrində Türkiyəyə məğlubiyyətini həzm edə bilmir. Çünki bu gün NATO-Rusiya sərhədi elə Türkiyə-Ermənistan sərhədi deməkdir. Bu baxımdan bugünkü Türkiyə-Rusiya münasibəti Fransanı qane edə bilməz. Fransa hər yolla məkrli siyasətini həyata keçirmək üçün səylərini davam etdirir. Bunun sonu çox acınacaqlı nəticələnə bilər. Buna baxmayaraq, Azərbaycan öz xarici və daxili siyasətini aparmaqdadır. Biz ölkəmizin suverenliyinə olan təhdidin qarşısını hər bir vasitə ilə almağa hazırıq və daim belə də olacaq", - deyə o əlavə edib.

Azərbaycan Xarici İşlər Nazirliyi səviyyəsində Fransanın son hərəkətinə irad bildirildiyini xatırladan A.Nağıyev qeyd edib ki, bu ölkənin məqsədi regionda "nüfuz" sahibi olmaq və bunu güc hesabına, daha doğrusu, Ermənistanın vasitəçiliyi ilə həyata keçirməkdir. Buna görə də Birləşmiş Millətlər Təşkilatı, beynəlxalq təşkilatlar səviyyəsində bu məsələnin qiyməti verilməlidir.

Əsmər QARDAŞXANOVA,

Azərbaycan.-2023.- 14 noyabr, № 247.- S.11.