Günəşdən doğulan, oddan yoğrulan şəhər

75 il əvvəl qədim yaşayış məskəni olan Mingəçevirə şəhər statusu verilmişdir

Ölkəmizin elektirik enerjisinə olan tələbatının təxminən yarıdan çoxunu ödəyən Mingəçevir şəhərinin 75 yaşı tamam oldu. Azərbaycan SSR Ali Soveti Rəyasət Heyətinin 1948-ci il

11 noyabr tarixli qərarına əsasən, Mingəçevir qəsəbəsinə şəhər statusu verildi. Yeni status bu qədim yaşayış məskənində abadlıq, tikinti-quruculuq işlərinə zərbəçi ahəng verməklə geniş imkanlar açdı. Yenidən qurulan Mingəçevir öz əvvəlki görkəmini sürətlə dəyişdi, yeni sənaye müəssisələri, fabrik və zavodlar, böyük istehsal və emal sahələri yaradıldı.

Su-elektirik stansiyası, "Azərkabel", yol maşınları, şüşə lifi, maşınqayırma, izolit zavodları, toxuculuq kombinatı və s. Mingəçevirin ilk sənaye müəssisələri hesab olunur. Şəhərin tikilib qurulmasında ayrı-ayrı rəhbərlərin, müxtəlif peşə sahiblərinin böyük əməyi olmuşdur. Qədirbilən mingəçevirlilər şəhərin ilk qurucularından olan Qafar Xəlilovu, Nicat Muradovu, İslam Həsənzadəni, Məmməd Əliyevi, Rüstəm Aslanovu, Vidadi Damanskini, Andrey Zaqryaçskini və başqalarını hər zaman xoş duyğularla yada salırlar. Minnətdarlıqla xatırlananlar sırasında İslam İslamzadənin, Kamran Hüseynovun, Züleyxa Həsənovanın, Sosialist Əməyi Qəhrəmanı Sarvan Salmanovun, Bəhlul Bayramovun və Yaqub Rüstəmovun işıqlı xatirəsi yaddaşlara əbədi həkk olub.

Xalqımızın Ümummilli Lideri Heydər Əliyev 1969-cu ildə Azərbaycana rəhbər seçiləndə Mingəçevir sənaye şəhəri olaraq yeni formalaşırdı. Müdrik rəhbər, uzaqgörən lider ölkə iqtisadiyyatının inkişafında Mingəçevirin oynaya biləcəyi rolu doğru dəyərləndirərək bu bölgəyə xüsusi qayğıkeşliyini və diqqətini əsirgəmədi. Ulu Öndər 1998-ci ildə Mingəçevirə səfəri zamanı şəhər sakinləri ilə unudulmaz görüşündə o illəri belə xatırlayırdı: "Mingəçevirin tikilməsində, qurulmasında, inkişaf etməsində vaxtilə mən çox əziyyət çəkmişəm. İndi mən buraya gəlib, bu hündür binaları, gözəl küçələri, gözəl meydanları, gözəl yaşıllıqları görəndə sevinirəm. Çünki 30 il bundan öncə mən Azərbaycanda rəhbərliyə başlayarkən biz Azərbaycanın hər bir yerində quruculuq işləri aparırdıq. Ancaq Mingəçevir gənc şəhər olduğuna görə, energetiklər şəhəri olduğuna görə buraya xüsusi fikir verirdik!" Beləcə Ulu Öndərin diqqəti, dəstəyi sayəsində Mingəçevir Azərbaycanın energetika, sənaye və abad şəhərinə çevrildi.

Prezident İlham Əliyev öz səmərəli fəaliyyətinin bütün istiqamətlərində olduğu kimi, ölkəmizin enerji nəhəngi Mingəçevirə münasibətdə də öz varislik missiyasını şərəflə davam etdirir. Bu da təsadüfi deyil. İlham Əliyev 20 ili yenicə tamam olan prezidentlik dönəmində Azərbaycanı regionda lider dövlətə, dünyada söz sahibinə çevirmişdir. Bu möhtəşəm 20 ildə biz 2 əsr boyunca arzuladığımız böyük Zəfərə qovuşduq. 44 günlük müqəddəs savaşda Ermənistan silahlı qüvvələrini darmadağın edib, diz çökdürdük. İndi uşaqdan-böyüyə bütün xalqımız Xankəndidə keçirilən möhtəşəm hərbi paradın yaratdığı sonsuz qüruru, xoş ovqatı yaşayır. Təbii ki, bu barədə danışmağa, böyük Zəfərin qürurverici məqamlarından söz açmağa istək də çoxdur, faktlar da yetərincədir. Amma günümüzün mövzusu 75 yaşlı Mingəçevirdir. Yeri gəlmişkən, böyük Zəfərə mingəçevirlilərin sanballı töhfəsini də minnətdarlıqla qeyd etmək lazımdır. Torpaqlarımızın erməni işğalından azad edilməsi uğrunda müqəddəs savaşda göstərdikləri fədakarlığa, xüsusi xidmətlərə görə 4 mingəçevirli ən ali mükafata - Azərbaycanın Milli Qəhrəmanı, 2 nəfər Vətən müharibəsi Qəhrəmanı adlarına layiq görülmüş, 9 nəfər "Azərbaycan Bayrağı", 2 nəfər "3-cü dərəcəli Rəşadət", 19 nəfər "3-cü dərəcəli Vətənə xidmət" ordenləri ilə təltif olunmuşdur. Vətənimizin ərazi bütövlüyü uğrunda döyüşlərdə 387 mingəçevirli gənc şəhidlik zirvəsinə ucalmışdır.

Prezident İlham Əliyevin tapşırıq və tövsiyələrinə uyğun olaraq Mingəçevir Şəhər İcra Hakimiyyəti şəhid ailələrinə, Qarabağ müharibəsi əlillərinə, veteranlarına davamlı qayğı və diqqət göstərir. Ümumiyyətlə, bu gün nur şəhərindəki mövcud sağlam mənəvi-psixoloji mühit şəhər sakinlərinin məmnunluğunu təmin edən əsas şərtdir. Xüsusilə son illər bu istiqamətdə təqdirəlayiq tədbirlər həyata keçirilir, şəhər rəhbərliyi xalqın xidmətçisi olduğunu əməli işləri ilə təsdiqləməyə çalışır. ŞİH-nin başçısı İlham İsmayılov hüquq-mühafizə orqanlarının, şəhərdəki xidmət təşkilatlarının rəhbərliyi ilə birlikdə vaxtaşırı müxtəlif məhəllələrdə qəbul-görüşlər keçirir, vətəndaşların təklif və müraciətlərini yerində öyrənir, insanları rahatsız edən çətinlik və problemləri aradan qaldırmaq üçün operativ tədbirlər görür. Bütün bunlar isə öz növbəsində vətəndaş-məmur münasibətlərində səmimiyyəti, məmnunluğu formalaşdırır.

75 yaşlı şəhər son illər sözün həqiqi mənasında özünün yeni inkişaf dövrünü yaşayır. Bu payız günlərində şəhər yaşıl libası, al-əlvan gül-çiçəkləri ilə baharı xatırladır. Regionların sosial-iqtisadi inkişafı dövlət proqramlarında Mingəçevirin yüksəlişini təmin edən tədbirlərin uğurla həyata keçirilməsi şəhərin gerçək bir sənaye nəhənginə çevrilməsini təmin etmiş, burada müasir texnologiyaya əsaslanan sənaye parkının, çoxsaylı fabrik və zavodların yaranmasını reallaşdırmışdır. Cənab İlham Əliyev prezidentliyi dönəmində dəfələrlə nur şəhərinə səfər etmişdir. Hər səfər Mingəçevirin yüksəlişinə hesablanmış yeni fabrik və zavodların, məktəblərin, xəstəxanaların, yaşayış məhəllələrinin açılışları ilə yaddaşlara həkk olunmuşdur. Dövlət başçısının Mingəçevirə səfərləri zamanı açılışında iştirak etdiyi müəssisələrin qısa siyahısı belədir: "Kür elektron avadanlıqları zavodu", "İnterenerci beton dayaqları", "İzolit" ASC-lər, "Kür Olimpiya Tədris İdman Mərkəzi", Şahmat məktəbi, YAP şəhər təşkilatının inzibati binası, Heydər Əliyev Mərkəzi, Gənclər evi, Dövlət bayrağı meydanı, "Günəşli" bağ massivinə çəkilən qaz xətti, Xaldan-Mingəçevir yolu, Mingəçevir Sənaye Parkı, "ASAN həyat" kompleksi, nəhəng sutəmizləyici qurğu, Mingəçevir Avtomatik İdarəetmə və Nəzarət Mərkəzi, Dövlət Rəmzləri Muzeyi və s. Bundan əlavə, son 20 il ərzində Prezident şəhərin sosial-iqtisadi inkişafına yönəlik 9 sərəncam imzalamış, 36 milyon manat vəsait ayırmışdır.

Mingəçevirin uğur salnaməsinə günü bu gün də yeni və parlaq səhifələr yazılır. Dövlətin güclü əlini hər zaman kürəyində hiss edən mingəçevirlilər əsl vətəndaş mövqeyində çalışır, ürəklərinin odu, əllərinin hərarəti ilə daş üstə daş qoyub şəhəri daha da abadlaşdırırlar. İndi şəhərdə salınan parkların sayı 10-a çatır. Bu sırada son 5 ilin töhfələri daha böyükdür. Bu dövrdə 164 yaşayış binası əsaslı və cari təmir olunub, hündürmərtəbəli binalarda 16 yeni lift qoyulub, 15 nümunəvi məhəllə yaradılıb, 240 küçəyə işıqlanma xətti çəkilib, Dövlət Rəmzləri Muzeyi inşa olunub, 100 nəfərlik açıq səhnə istifadəyə verilib, şəhərin girişində Zəfər gününün şərəfinə yeni park salınıb, Nəsimi parkı yenidən qurulub. Hazırda Ulu Öndər Heydər Əliyevin 100 illiyi münasibətilə ağacəkmə aksiyaları davam edir, tikinti, abadlıq-quruculuq işləri səngimir. Şəhid ailələri və Qarabağ əlilləri üçün nəzərdə tutulan 72 mənzilli yaşayış binasında son tamamlama işləri görülür.

Nur şəhərinin dinamik inkişafında, müasir və abad görkəm almasında Heydər Əliyev Fondunun prezidenti, Birinci vitse-prezident Mehriban Əliyevanın da xidmətləri təqdirəlayiqdir. Müəllifi Mehriban Əliyevanın olduğu "Yeniləşən Azərbaycana yeni məktəb" proqramı çərçivəsində şəhərdə hər biri 300 yerlik olan 19 və 20 nömrəli, 200 yerlik 5 nömrəli orta məktəblər, 1200 yerlik texniki-humanitar lisey,

13 nömrəli tam orta məktəb tikilib istifadəyə verilmişdir. Bu qayğını, isti və doğma münasibəti mingəçevirlilər hər zaman minnətdarlıqla vurğulayırlar.

Bütün bunların sayəsində Mingəçevirin şöhrəti bu gün Azərbaycandan uzaqlarda da geniş yayılıb. Şəhərin məhəbbət və səmimiyyətlə uzatdığı qardaş əli bir sıra xarici şəhərlərdə hərarətlə sıxılır, ehtiramla qəbul edilir. Qazaxıstanın Uralsk, Belarusun Polosk, İsrailin Afula, Türkiyənin Çölbaşı və Qars kimi şəhərləri belə şəhərlərdəndir. Bu qardaş şəhərlər də bu günlər Mingəçevirin 75 yaşını müxtəlif tədbirlərlə qeyd etmişlər.

Mingəçevirin özündə isə yubiley günündə bu münasibətlə silsilə tədbirlər keçirilmişdir. Tədbir iştirakçıları öncə xalqımızın Ümummilli Lideri Heydər Əliyevin abidəsi önünə tər qızılgüllər qoymuş, Şəhidlər xiyabanına gedərək vətən fədailərinin əziz xatirəsini ehtiramla yad etmişlər. Sonra qonaqlar və şəhər sakinləri S.Vurğun parkında nur şəhərinə şöhrət gətirən gənc idmançıların çıxışlarına baxmış, Sahil parkında isə gənc və yeniyetmələrin elm və texnika sahəsində əldə etdikləri uğurlara həsr edilmiş sərgini maraqla seyr etmişlər.

Bayram tədbirlərinin rəsmi hissəsi şəhər teatrında gerçəkləşmişdir. Mingəçevir Şəhər İcra Hakimiyyətinin başçısı İlham İsmayılov və digər natiqlər öz çıxışlarında Ulu Öndər Heydər Əliyevin tarixi xidmətlərini minnətdarlıqla xatırlamış, Mingəçevirin möhtəşəm yüksəlişində Prezident İlham Əliyevin böyük qayğı və diqqətini vurğulamışlar. Sonda tədbir iştirakçılarına musiqi proqramı təqdim olunmuşdur.

***

Ana Kürün ikiyə böldüyü bu ecazkar şəhərin hər iki sahili yaraşıqlı parklarla, zümrüd donlu xiyabanlarla naxışlanıb. Hər addımda fəvvarələrin nəğməsi, güllərin rayihəsi göz oxşayır, ruhumuza sığal çəkir. Şəhərin çıraqban gecələri gündüzündən də gözəldir. Sahil parkı gecələr başqa bir aləm olur. Rəgbərəng işıqları göylərə güzgü tutan Ana Kürün nəğməkar ləpələrində bərq vurub dəcəl uşaqlar kimi oynaşır, həzin musiqinin sədaları dalğa-dalğa ətrafa yayılır. Ahıllar dəstə-dəstə masa ətrafında əyləşib çay içir, uşaqlar əylənir, gənclər isə qayıq gəzintisinə çıxırlar. Qoy bu həyat firavanlığını bizə bəxş edən dövlətimizin gücü, qüdrəti tükənməz, müstəqilliyi əbədi olsun!

75 yaşın mübarək, nur şəhəri!

Lazım QULİYEV,

Azərbaycan.-2023.- 14 noyabr, № 247.- S.13.