Qərb ölkəmizə qarşı düşmənçiliyini davam etdirir

"ABŞ-nin və Qərbin yürütdüyü siyasət ilk növbədə elə özlərinin inkişafını ləngidir. Onlar özlərini demokratiya carçıları kimi təqdim etsələr də, bu dəyərdən tamamilə uzaqdırlar. Həmin ölkələrdə diskriminasiya, rasizm, islamofob meyillər günü-gündən dərinləşir, insanların hüquq və azadlıqları tapdalanır. Həmçinin Qərbdə insani və əxlaqi meyillər də dəyişir, cəmiyyəti məhvə aparan bir sıra fəaliyyətlər rəsmiləşdirilir. Təsadüfi deyil ki, Qərb dövlətlərinin bir çoxunun rəhbərliyində LGBT-çilər təmsil olunur".

Bu sözləri "Azərbaycan" qəzetinə açıqlamasında Milli Məclisin deputatı Azər Badamov deyib. Deputat bildirib ki, belə olan halda dünyaya dərs keçmək istəyən Qərbdən və ABŞ-dən yaxşı nəsə gözləmək əbəsdir: "Xüsusilə Fransa və Almaniyada islam dininə qarşı savaş açılması, beynəlxalq hüququ tapdalayaraq xristian təəssübkeşliyinin önə çəkilməsi, birtərəfli şəkildə ədalətsizliyin dəstəklənməsi ikili standartların və riyakarlığın göstəriciləridir. Bu gün ABŞ-də və Qərbdə islam dininin müqəddəs kitabının ictimai şəkildə təhqir edilməsi, məscidlərə donuz kəllələrinin atılması, hicab geyinən müsəlman qadınlara qarşı amansız münasibətin nümayiş etdirilməsi özlərini demokratik ölkə kimi qələmə verənlərin iç üzünü göstərir".

Deputatın sözlərinə görə, Qərb siyasi mərkəzləri demokratiya və insan hüquqlarından sui-istifadə edərək digər ölkələrdə çevrilişlər etməyə cəhdlər göstərir, öz çirkin məqsədlərinə çatmaq üçün əllərindən gələni əsirgəmirlər. Qərbin siyasi texnoloqları narıncı inqilablar təşkil edərək firavan yaşayan ölkələri cəhənnəmə döndərirlər.

"2005-ci ildən aktivləşən Soros Fondu Gürcüstanda, Ukraynada və Ermənistanda narıncı inqilablar etməyi bacarıb. Azərbaycanda isə bu fond xalq-iqtidar birliyi möhkəm olduğuna görə ayaq açıb yeriyə bilməyib. Heç kimə sirr deyil ki, Soros Fondu ABŞ kəşfiyyatı tərəfindən proqramlaşdırılır və dünyada "demokratiya"nın qurulması adı ilə məkrli planları reallaşdırır. Bu fondun əsas məqsədi imperializmə dəstək verən "rəngli inqilablar" vasitəsilə ölkələrdə anarxiya, xaos yaratmaq və sabitliyi pozmaqdır. Təbii ki, bu yolla yüz milyonlarla dollar gəlir əldə etmək də əsas hədəfdir", - deyə müsahibimiz bildirib.

Azər Badamov Qərb ölkələrinin dünyada alovlanan münaqişələrin əsas səbəbkarı olduğunu bildirib. Deputat Qəzzanın vəziyyətindən, Rusiya-Ukrayna müharibəsindən və "Ərəb baharı"ndan söz açıb. Deyib ki, 1987-ci ildən Tunisdə hakimiyyət dəyişməsi ilə başlanan "Ərəb baharı" Misir, Yəmən, Əlcəzair, İordaniya və digər ölkələrdə siyasi sabitliyi pozub, xalqları ağır faciələrlə üzləşdirib: "Qərbin Liviyada, İraqda və Suriyada apardığı hərbi əməliyyatlar bu ölkələrin iqtisadiyyatlarını məhv edib və dinc insanların həyatlarını cəhənnəmə döndərib. Məcburi surətdə canlarını qurtarmaq üçün Qərbə üz tutan miqrantları daşıyan qayıqların isə Aralıq dənizində batırılması adi hala çevrilib".

Müsahibim qeyd edib ki, "Ukraynaya dəstək" adı altında başlanan müharibə iki qardaş xalqı düşmənə çevirib. Bu regionda şəhərlər və kəndlər Yer üzündən silinməkdədir. Qəzzada baş vermiş müharibədə isə on minlərlə insan dünyasını dəyişib, yüz minlərlə insan evsiz qalıb.

"ABŞ və Qərbin ikili standartlara əsaslanan riyakar siyasəti dünya nizamının yenidən baxılmasını aktuallaşdırıb. İndi dünyanın qütbləşməsi sürətlənir və yeni iqtisadi bloklar yaranır. BRİCS təşkilatının əhatə dairəsi genişlənir və dünyanın iqtisadi güc mərkəzləri dəyişir. Qlobal proseslərin gedişatı Qərbin və ABŞ-nin iqtisadi və hərbi güc statusunu yox edir. Bunun nəticəsidir ki, son illər Qərbin öz çirkin niyyətlərinə davam etmək istəkləri iflasa uğrayır. Bunu Fransanın timsalında daha aydın görmək olar", - deyə A.Badamov söyləyib.

Deputat əlavə edib ki, Fransanın Afrika ölkələrində davam etdirmək istədiyi neokolonizm və müstəmləkəçilik siyasəti iflasa uğrayır, Paris Afrikadan qovulur: "Belə olan halda, başqa çarəsi qalmayan Fransa bir müddət əvvəl Ukraynaya dəstək göstərməklə öz mövqelərini möhkəmlətmək istədi. Lakin Ukraynada da uğursuzluğa düçar olduqdan sonra lövbərini Cənubi Qafqaza salmaq niyyətinə düşdü. Ona görə beynəlxalq hüququ da tapdalayıb Ermənistanı silahlandırır və hər vasitə ilə regiona müdaxilə etməyə çalışır. Beynəlxalq təşkilatlarda ölkəmizə qarşı qərəzli qətnamələr qəbul etdirməyə cəhdlər etsə də, bunlar heç bir nəticə vermir. Özünün elədiyi azmış kimi, Fransa Almaniyanı və digər bir neçə dövləti də öz arxasınca bataqlığa sürükləyir".

Azər Badamov vurğulayıb ki, Avropa İttifaqı Qərbin apardığı riyakar siyasət nəticəsində iqtisadi burulğana düşüb. Avropa ilə ABŞ arasında da ziddiyyətlər qabarmaqdadır. ABŞ Qərb siyasi mərkəzlərini Rusiya-Ukrayna müharibəsinə cəlb edərək Avropa İttifaqının iqtisadi potensialını müharibəyə xərclətdirir. Rusiyaya tətbiq olunmuş sanksiyalar əks-təsir göstərib, Avropada enerji daşıyıcılarının qiyməti kəskin bahalaşıb. Bu da ABŞ-yə öz mayeləşdirmiş qazını Avropaya baha satmaq planlarını reallaşdırmağa imkan verib. Bu günün reallığıdır ki, Avropada iş yerləri azalır, ABŞ-yə beyin axını sürətlənir.

"Bir məqamı xüsusi qeyd etmək lazımdır ki, ABŞ və Qərb çirkin planları ilə dünyada sabitliyi pozduqları kimi, öz ölkələrini də müxtəlif çətinliklərlə üz-üzə qoyublar. Azərbaycan isə belə ikiüzlü və riyakar siyasətə qarşı möhkəmdir.

Hazırda dövlətlərin yeni təşkilatlarda birləşməsi və yeni iqtisadi əməkdaşlıq mərkəzlərinin formalaşması ümidləri artırır. Yaxın gələcəkdə dünya nizamında ədaləti dəstəkləyən dövlətlərin yaratdığı yeni birliyin gücünü müşahidə edəcəyik", - deyə deputat bildirib.

Nəzrin QAFARZADƏ,

Azərbaycan.-2023.- 16 noyabr, № 249. - S.8.