Büdcə prioritetləri reallıqlara uyğundur

Milli Məclisdə "Azərbaycan Respublikasının 2024-cü il dövlət büdcəsi haqqında" qanun layihəsi birinci oxunuşda təsdiq edilib. Növbəti ilin dövlət büdcəsi dünyada gedən iqtisadi proseslərə, hərbi-siyasi vəziyyətə, ölkəmizin sosial-iqtisadi potensialına, bir sözlə yeni reallıqlara əsaslanaraq hazırlanıb.

Büdcənin xərc və gəlirlərində artım müşahidə edilir. Bu, 2024-cü ilin dövlət büdcəsinin nə qədər balanslı və uğurlu olduğunu sübut edir.

Mövzu ilə bağlı qəzetimizə danışan Milli Məclisin Əmək və sosial siyasət komitəsinin sədri Musa Quliyev bildirib ki, gələn ilin dövlət büdcəsində üç prioritet istiqamət müəyyən edilib. Bunlar hərbi, müdafiə və təhlükəsizlik xərclərinin, sosialyönümlü xərclərin və Böyük qayıdış proqramının icrasının sürətləndirilməsi məqsədilə ayrılan vəsaitin artırılması ilə bağlıdır. Nəzərə almaq lazımdır ki, Ermənistanla hələ də sülh müqaviləsi imzalanmadığına görə bölgədəki gərginlik aradan qalxmayıb. Belə olan halda, ordumuzun gücünün və müdafiə imkanlarının genişləndirilməsi üçün dövlət büdcəsində təhlükəsizlik və müdafiə xərclərinin artırılması tamamilə məntiqlidir. Ona görə də növbəti ilin büdcəsinin təxminən 25 faizinin bu istiqamətə xərclənməsi nəzərdə tutulub.

Komitə sədri xatırladıb ki, Prezident İlham Əliyevin daxili siyasətində sosialyönümlülük, əhalinin rifahının yaxşılaşdırılması, sosial müdafiəyə ehtiyacı olan şəxslərin daim dövlət qayğısı ilə əhatə olunması əsas yer tutur: "2024-cü ilin büdcəsi də ənənəvi olaraq sosialyönümlüdür. Hətta gələn ilin büdcəsində sosial müdafiə xərclərinin bu illə müqayisədə 7 faiz artırılması da nəzərdə tutulub. Bu istiqamət üzrə ayrılmış təxminən 16 milyard manat büdcənin 43 faizini təşkil edir. Buraya əhalinin sosial müdafiəsi ilə bağlı, əməkhaqları, səhiyyə, təhsil, elm, mədəniyyət və turizmin inkişafına yönəlmiş xərclər daxildir".

Büdcənin üçüncü prioritet istiqaməti barədə danışan deputat deyib ki, Şərqi Zəngəzurun və Qarabağın infrastrukturunun genişləndirilməsinin, orada quruculuq işlərinin sürətləndirilməsinin və keçmiş məcburi köçkünlərin öz doğma yurdlarında məskunlaşmasının vacibliyi gələn ilin dövlət büdcəsində nəzərə alınıb. Büdcədən Böyük qayıdış proqramının icrası üçün 4 milyard manatın ayrılması nəzərdə tutulub. Xatırladaq ki, İkinci Qarabağ savaşından ötən 3 ildə bu istiqamətdə ümumilikdə 12 milyard manata yaxın vəsait xərclənib.

Musa Quliyev yeni büdcə layihəsinə əsasən, gələn il orta aylıq əməkhaqqının artımının nəzərdə tutulduğunu qeyd edib. Bildirib ki, bu, pensiyaların da 10 faizlik artımını təmin etməyə imkan verəcək. Nəticədə gələn il orta aylıq pensiya 436 manatdan 483 manata qalxacaq. Yaşa görə təyin edilən pensiyanın məbləği isə 466 manatdan 516 manata çatacaq. Gələn il eyni zamanda sosial müavinət xərcləri də bu ilə nisbətən 11 faiz artırılacaq və təminatda heç bir problem olmayacaq. İşsizlikdən sığorta fondunun gəlirləri və xərclərində də cari illə müqayisədə xeyli artım nəzərdə tutulub.

Deputatın sözlərinə görə, aparılan islahatların uğurlu nəticəsi olan növbəti ilin büdcəsi inflyasiyanın 5,3 faiz olmasına, yəni birrəqəmli həddə düşməsinə imkan verəcək. Həmçinin ərzaq inflyasiyası da birrəqəmli olacaq. Deməli, əhalinin pul gəlirləri inflyasiyanı üstələyəcək. Bu da vətəndaşlarımızın sosial müdafiəsini daha təminatlı şəkildə həyata keçirməyə şərait yaradacaq.

Nəzrin QAFARZADƏ,

Azərbaycan.-2023.- 17 noyabr, № 250. - S.8.