Azərbaycanı yolundan heç kim döndərə bilməz

Qərbin bəzi dairələrinin riyakarlığı heç bir nəticə verməyəcək

"Azərbaycan Vətən müharibəsində qələbə qazandıqdan sonra dostlarımız sevindi, bizi ölkəmizin suverenliyinin tam bərpa olunması münasibətilə təbrik etdilər. Amma yuxusu ərşə çəkilən, narahat olan qüvvələr də bu fonda aktivləşdilər".

Bu sözləri Milli Məclisin deputatı Vüqar İsgəndərov "Azərbaycan" qəzetinə açıqlamasında deyib. Deputat bildirib ki, Qərb institutlarının, xüsusən Fransanın son zamanlar fəal anti-Azərbaycan siyasəti yürütdükləri göz önündədir. Onlar beynəlxalq hüququn norma və prinsiplərini ayaq altına ataraq işğalçını, təcavüzkarı dəstəkləyirlər. BMT-nin qətnamələrini özü icra edən Azərbaycanı hər hansı bəhanə ilə günahlandırmağa çalışırlar.

Bütün bunların inkişaf edən, güclü Azərbaycan üçün heç bir məna və əhəmiyyət kəsb etmədiyini bildirən V.İsgəndərov deyib ki, dünyanın hələ də ikili standartlarla idarə olunduğunun, selektiv yanaşmaların tüğyan etdiyinin şahidi oluruq. Çox təəssüf ki, XXI əsrdə xristian təəssübkeşliyini görürük. Bu, birinci məsələdir və hər birimizi narahat edir. Görünən odur ki, dünya o qədər inkişaf etməyib.

Deputat qeyd edib ki, bu dövrdə hələ də dini, irqi ayrı-seçkilik özünü göstərib. İndi fundamental dəyərlərə sayğısızlığı müşahidə edirik. "İkinci məsələ odur ki, Azərbaycan və Türkiyənin regionda güclənməsi, dünyada güc sahiblərindən birinə çevrilməsi bəzi dairələri narahat edir və onlar hər vəchlə regionda eskalasiyanın qalmasına, hər hansı təxribatların baş verməsinə rəvac vermək istəyirlər. Lakin Azərbaycan üçün müharibə, münaqişə səhifəsi artıq qapanıb və yeni səhifə açılır. Bu yeni siyasi mənzərəni Azərbaycan formalaşdırır. Bu, sülh, tərəqqi, daimi inkişaf, bərpa-quruculuq işləridir ki, dövlətimiz bunu uğurla icra edir", - deyə o əlavə edib.

Deputat vurğulayıb ki, Azərbaycanı bu yoldan heç kim döndərə bilməz. Prezident İlham Əliyevin dediyi kimi, biz gündən-günə hərbi, iqtisadi gücümüzü artıracağıq. Güclü ordu formalaşdırılması məsələsini həmişə diqqətdə saxlayacağıq. Ümumiyyətlə, təkcə bölgədə deyil, qlobal anlamda dünyanın qüdrətli və ən hörmət edilən ölkələrindən birinə çevriləcəyik.

Ə.QABİLQIZI,

Azərbaycan.-2023.- 17 noyabr, № 250. - S.9.