Azərbaycan Qərbin regionda hegemonluq niyyətini puça çıxarıb

"Qərbin bəzi dairələrinin bu gün apardığı siyasətə nəzər salanda görürük ki, riyakarlıq və ikiüzlülük baş alıb gedir. Həmin siyasi mərkəzlər məsələlərə ikili standartlarla yanaşır, məkrli planlar qurur, başqa dövlətləri və güc mərkəzlərini qaralamaq və aşağılamaq üçün əllərindən gələni əsirgəmirlər. Bu sübut edir ki, Qərb dırnaqarası demokratik prinsipləri dünyanın müxtəlif ölkələrinə sırımaqla cəmiyyətləri daxildən parçalamaq və dəyərləri məhv etmək istəyir. Bunun nəticəsidir ki, xüsusilə son zamanlar Yaxın Şərqdə, Afrikada, Asiyada Qərbin hegemonluğuna şahidlik edirik".

Bu sözləri "Azərbaycan" qəzetinə açıqlamasında Milli Məclisin deputatı Tural Gəncəliyev deyib. Deputat bildirib ki, Qərb düşüncə tərzi müxtəlif cəmiyyətlərə artıq siyasi ritorika ilə deyil, hərbi güc vasitəsilə sirayət edilir. ABŞ, Avropa İttifaqı və onların hərbi komponentlərinin İraq, Suriya, Liviya, Yaxın Şərq və Afrikanın müxtəlif bölgələrində apardıqları siyasət nəticəsində bir sıra ölkələr iqtisadi rəzilliyə, diskriminasiya və çöküşə məruz qalır, hətta iflasa uğrayırlar.

"Aydındır ki, bu gün Qərb dairələri bu "prinsipləri"ni yeni formada Cənubi Qafqaz regionuna da gətirməyə çalışırlar. Zaman-zaman ABŞ, Qərb ölkələri, xüsusilə də Fransa və Almaniya Ermənistanda və digər region ölkələrində destruktiv fəaliyyətlərini həyata keçirirlər. Eyni riyakar fəaliyyətlərini ölkəmizə qarşı da aparmağı çox arzulayırlar. Ona görə də qeyri-hökumət təşkilatları adı altında fəaliyyət göstərən qurumlar vasitəsilə Azərbaycanın daxili işlərinə müdaxilə etməyə cəhdlər göstərir, əsassız ittihamlar səsləndirir, şər-böhtan kampaniyası aparırlar", - deyə deputat qeyd edib.

Tural Gəncəliyevin sözlərinə görə, bütün bu cəhdlərə baxmayaraq, Qərb siyasi dairələri Prezident İlham Əliyev kimi güclü lideri, qüdrətli ordusu, yenilməz siyasi iradəsi və iqtisadi dayanıqlılığı olan Azərbaycanda destruktiv fəaliyyətlərini icra edə bilmirlər: "Ona görə müxtəlif bəhanələr gətirir, müxtəlif metodlar və yollar axtarırlar. Gah dünya erməni diasporundan bir alət kimi istifadə edir, gah da Qərb mətbuatında ölkəmiz əleyhinə qarayaxma kampaniyası başladırlar. Azərbaycana qarşı təzyiqlərinin heç bir nəticə vermədiyini görən Qərb güc mərkəzləri yeni nağıllar uydurmaqda mahirdirlər, özlərinə sərf etdiyi üçün lazım gəldikdə "ekoloji terror"dan, "etnik təmizləmə"dən və bu kimi absurd ifadələrdən istifadə edirlər".

Deputat vurğulayıb ki, Qərb dairələri onların təklif etdiyi layihələrin və təşəbbüslərin müxtəlif ölkələrdə sorğu-sualsız dərhal qəbul edilməsinə öyrəşiblər: "Bu səbəbdən öz milli maraqlarını hər şeydən üstün tutan, dəyərlərini qorumağı bacaran Azərbaycan belə təşəbbüslərə müsbət cavab verməyəndə onlar narahat olmağa başlayırlar. Görünür, ölkəmizin dünyada durmadan artan nüfuzu Qərbin arzularını gözündə qoyub. Bu gün Cənubi Qafqaz sanki Qərbin müdaxilə etmək istədiyi, lakin heç bir vəchlə hegemonluğunu qura bilmədiyi bir regiona çevrilib. Bu, təsadüfi deyil, Qərb hegemonluğunun qarşısında Azərbaycan kimi yenilməz və qüdrətli dövlət, onun lideri məğrur şəkildə dayanır".

Tural Gəncəliyev həmçinin deyib ki, Qərb ölkələri 30 il əvvəl torpaqları işğal edilmiş, bir milyondan çox əhalisi məcburi köçkün və qaçqın düşmüş, iqtisadi gücü tükənmiş Azərbaycana öyrəşmişdilər. Həmin vaxtlarda olduğu kimi, zəif Azərbaycanla qarşılaşacaqlarını hesab edirdilər. Ancaq bizim xalqımız, liderimiz, ordumuz tarix yazdı, bütün konteksti dəyişdi. Xarici qüvvələr də indi Azərbaycanın Vətən müharibəsindəki və bu ilin sentyabrında həyata keçirdiyi antiterror tədbirlərindəki qələbəsini həzm edə bilmir və bizə qarşı yeni qarşıdurma cəbhəsi açmağa çalışırlar.

"Avropa Parlamentinin son qətnamələrinə nəzər salanda aydın olur ki, bu "sənəd"lər başdan-ayağa cəfəng, sərsəm fikirlərlə doludur. Bizim üçün kağız parçasından başqa heç nə ifadə etməyən həmin qətnamələr sanki Qərbin Azərbaycana, eləcə də Türkiyəyə qarşı yeni səlib yürüşünə çağırışıdır. Hər addımda Azərbaycanı qınayır, etmədiklərimizi boynumuza yıxmağa çalışırlar. Lakin Ermənistanda baş alıb gedən haqsızlıq, ədalətsizlik, revanşizm və separatizmə göz yumurlar", - deyə müsahib söyləyib.

Deputat əlavə edib ki, nə qədər cəhd göstərsələr də, Qərb və ABŞ özünə nə qədər əl qatsa da, heç bir nəticə hasil olmayacaq. Biz öz xalqımızın rifah halının yüksəldilməsi naminə, Azərbaycanı dünyanın ən aparıcı ölkələrindən birinə, istər türk dünyasında, istər Avrasiyada, istərsə də Yaxın Şərqdə və qonşuluqda yerləşən digər regionlarda söz sahibinə çevirmək üçün fəaliyyətimizi davam etdirəcəyik.

Nəzrin QAFARZADƏ,

Azərbaycan.-2023.- 17 noyabr, № 250. - S.9.