Azərbaycan ilə Rusiya arasında mədəni əlaqələrin inkişafı müzakirə edilib

Azərbaycanın mədəniyyət naziri Adil Kərimli IX Sankt-Peterburq Beynəlxalq Mədəniyyət Forumu çərçivəsində Rusiyanın mədəniyyət naziri Olqa Lyubimova ilə görüşüb.

AZƏRTAC xəbər verir ki, görüşdə tərəflər iki ölkə arasında mədəni əlaqələrin hazırkı vəziyyətini və inkişaf perspektivlərini müzakirə ediblər.

O.Lyubimova A.Kərimlinin nazir vəzifəsində Rusiyaya ilk səfərinin ölkələrimizin mədəniyyət qurumları arasında əməkdaşlığın genişlənməsinə, növbəti illərdə daha maraqlı tədbirlərin keçirilməsinə təkan verəcəyinə əminliyini ifadə edib. O, Rusiyada Ümummilli Lider Heydər Əliyevin 100 illik yubileyinin geniş qeyd olunduğunu xüsusi vurğulayıb.

Rusiyalı nazir 2024-cü il üçün nəzərdə tutulmuş birgə mədəni tədbirlər planını hazırlamağı, gələn il isə 2024-2026-cı illər üçün tədbirlər proqramının imzalanmasını təklif edib. O.Lyubimova Azərbaycanın yaradıcı kollektivlərinin Rusiyaya səfərlərinin maraqla qarşılandığını qeyd edərək, Beynəlxalq Yeni Bədii və Sənədli Kino Festivalında, eləcə də Beynəlxalq Xəzər Kinoforumunda fəal iştiraka görə azərbaycanlı həmkarlarına təşəkkürünü bildirib.

Öz növbəsində nazir Adil Kərimli Sankt-Peterburq Mədəniyyət Forumuna dəvətə görə təşəkkürünü bildirərək deyib ki, ölkələrimiz arasında bütün sahələrdə sürətlə inkişaf edən əməkdaşlıq Azərbaycan Prezidenti İlham Əliyev və Rusiya Prezidenti Vladimir Putin arasında qarşılıqlı etimada söykənən münasibətlərdən qaynaqlanır. “Ümummilli Lider Heydər Əliyevin 100 illik yubileyinin Rusiyada geniş qeyd olunması bizim üçün çox vacibdir. Heydər Əliyevin Rusiya mədəniyyətinin də inkişafında böyük xidmətləri var”, - deyə nazir vurğulayıb. A.Kərimli rusiyalı həmkarlarını Bakıda keçiriləcək Kreativ Sənaye Forumuna, eləcə də VI Ümumdünya Mədəniyyətlərarası Dialoq Forumuna dəvət edib.

Sonda nazir Adil Kərimli Olqa Lyubimovaya “Şuşa. Zirvədən uca” kitabını hədiyyə edib.

Rusiyalı nazir kitabın nazirliyin kitabxanasında özünəməxsus yer tutacağını bildirib.

Görüşdə Azərbaycanın Rusiyadakı səfiri Polad Bülbüloğlu da iştirak edib.

Azərbaycan.-2023.- 18 noyabr, № 251.- S.7.