Qisas qiyamətə qalmadı

Erməni terrorçular artıq Azərbaycan qanunları qarşısında cavab verirlər

"Xocalı soyqırımında, şəhərlərimizin, kəndlərimizin dağıdılmasında, qəbirlərin qazılmasında biz erməni xalqını günahlandırmamışıq. Biz kriminal rejimin ünsürlərini, başda duranlarını ittiham etmişik və biz onları məsuliyyətə cəlb edirik və edəcəyik. Bəziləri artıq öz layiqli cəzasını alıblar, bəziləri də alacaqlar".

Sentyabrın 20-də xalqa müraciəti zamanı Prezident İlham Əliyevin də söylədiyi kimi, milli kimliyimizə düşmən kəsilən, heysiyyətimizlə oynayan cinayətkar separatçılar, bir zamanlar Qarabağda at oynadan qondarma qurumun oyuncaq prezidentləri, deputatları, nazirləri... indi qolları qandallı, başları aşağı halda Azərbaycan qanunları qarşısında cavab vermələri üçün Bakıya gətirilirlər.

Törətdikləri çoxsaylı cinayət əməllərinə görə saxlanılan xuntaçıların siyahısında sabiq "dövlət naziri" Ruben Vardanyan, "Daşnaksütyun" partiyasının "Qarabağ təmsilçisi" və separatçı rejimin keçmiş parlament sədri David İşxanyan, qondarma "Dağlıq Qarabağ Respublikasının Müdafiə Ordusu komandanının birinci müavini" Davit Manukyan, eləcə də qondarma qurumun "prezident"ləri Arkadi Qukasyan, Bako Sahakyan, Arayik Harutyunyan da var...

Bu siyahının daha da uzanacağı, xalqımıza qarşı cinayət əməlləri törədən separatçıların hamısının bir-bir tutularaq layiqli cəzalarını alacaqları zamanın hökmüdür...

Gəncəlilərin qatili

Bu da İlahi ədalətin öz yerini tapmasının daha bir nümunəsidir ki, cinayətkar qondarma rejimin quldur başçısı, Vətən müharibəsi dövründə Gəncə şəhərində və Bərdə rayonunun yaşayış məntəqələrində əli çoxsaylı mülki insanlarımızın qanına batan Arayik Harutyunyan məhz elə Gəncə terrorunun üçüncü ildönümü ərəfəsində həbs olunaraq cinayət məsuliyyətinə cəlb edildi.

Bu il oktyabrın 3-də Dövlət Təhlükəsizliyi Xidməti tərəfindən Xankəndi şəhərində saxlanılan Arayik Harutyunyana Cinayət Məcəlləsinin çoxsaylı maddələri ilə ittiham elan edilib.

DTX-nin bununla bağlı ötən gün yaydığı məlumatda bildirilir ki, istintaq-əməliyyat tədbirləri nəticəsində, həmçinin Arayik Harutyunyan tərəfindən terror aktlarının törədilməsi məqsədilə Azərbaycan Respublikasının ərazilərinin davamlı şəkildə minalanması, cəbhə zonasından kənarda yerləşən, əhalinin sıx məskunlaşdığı Azərbaycan Respublikasının Gəncə şəhəri və Bərdə rayonunun yaşayış məntəqələri və mülki obyektlərini hədəfə alaraq ballistik və digər növ raketlər atılmaqla çoxsaylı mülki şəxslərin öldürülməsi və onlara müxtəlif dərəcəli bədən xəsarətlərinin yetirilməsi, mülki və hərbi infrastruktura ağır ziyan vurulması ilə nəticələnən terror hücumlarının təşkil olunması və digər çoxsaylı cinayətlər törədilməsinə əsaslı şübhələr müəyyən edilmişdir.

Hazırda DTX və Baş Prokurorluq tərəfindən zəruri və təxirəsalınmaz istintaq-əməliyyat tədbirləri davam etdirilir.

Arayik Harutyunyan Serj Sarkisyanın qanlı yolunu davam etdirirdi

Son iki yüz il ərzində milli düşmənçilik zəminində ard-arda Azərbaycan xalqına qarşı qətliamlar, soyqırımları törədən ermənilər Birinci Qarabağ müharibəsində də bu mənfur əməllərini davam etdirərək xalqımıza qarşı saysız-hesabsız müharibə cinayətləri, Ballıqaya, Ağdaban, Başlıbel kimi faciələr yaşadıblar. 1992-ci il fevralın 26-da Xocalı sakinlərinə qarşı soyqırımı həyata keçirən erməni qatilləri 613 günahsız insanı xüsusi amansızlıqla qətlə yetiriblər. 8 ailəni tamamilə Yer üzündən siliblər. Həmin gün 1275 Xocalı sakini girov götürülüb və erməni cəlladları tərəfindən amansız işgəncələrə məruz qalıblar.

1992-ci ildə Xocalı soyqırımını törədən qüvvələrin komandanlarından olan Ermənistanın keçmiş prezidenti Serj Sarkisyan sonralar Tomas de Vaalın "Qara bağ" kitabında yer alan müsahibəsində insanlıq cinayəti olan bu əməlini fəxr hissi ilə belə dilə gətirib: "Xocalıya qədər azərbaycanlılar elə bilirdilər ki, bizimlə zarafat etmək olar, onlar elə fikirləşirdilər ki, ermənilər dinc əhaliyə əl qaldırmazlar. Biz o stereotipi sındırdıq".

Erməni faşizminin xalqımıza qarşı qanlı əməlləri bununla da bitmədi və getdikcə daha qabarıq formada özünü göstərməyə başladı.

44 günlük Vətən müharibəsi zamanı dəfələrlə müharibə meydanından kilometrlərlə uzaqda yerləşən şəhər və kəndlərimizin qatil ermənilər tərəfindən raket atəşinə tutularaq terrora məruz qalmasını, mülki vətəndaşlarımızın qətl edilməsini bütün dünya gördü.

Lakin beynəlxalq ictimaiyyət Xocalı hadisələrində olduğu kimi, Ermənistan və separatçıların Gəncədə də soyqırımı törətməsinə, Bərdədə, Tərtərdə və digər yaşayış yerlərimizdə insanlarımızı qətl etməsinə səsini çıxartmadı.

Baxmayaraq ki, uşaq qatili Serj Sarkisyanın davamçısı, qondarma rejimin cinayətkar başçısı Arayik Harutyunyan 2020-ci ildə Gəncə şəhərini vur əmrini verdiyini, Azərbaycanın digər böyük şəhərlərinə də zərbə endirəcəklərini həyasızlıqla, ağzı köpüklənə-köpüklənə, "fəxrlə" videokamera önündə etiraf edib.

Azərbaycan dövləti dəfələrlə Ermənistan və onun himayə etdiyi qondarma qurumun xalqımıza qarşı törətdiyi cinayətləri faktlarla beynəlxalq təşkilatların diqqətinə çatdırıb, lakin bununla bağlı Ermənistana hər hansı sanksiyalar tətbiq edilməyib, qondarma qurumun özünü buraxması ilə bağlı hansısa təzyiqlər edilməyib. Elə bu cəzasızlıq mühitindən yararlanan Ermənistan və separatçılar azərbaycanlılara qarşı cinayət əməllərini davam etdiriblər.

Əsrlərin qisası

2020-ci ildə torpaqlarını işğaldan azad edən Azərbaycan cəmi üç ildən sonra Qarabağ bölgəsində suverenliyini tam təmin etdi. Dövlətimiz Qarabağda kök salmış quldur yuvasını dağıdaraq kriminal rejimin ünsürlərini də bir-bir cinayət məsuliyyətinə cəlb edir. Əminik ki, Azərbaycan qanunları qarşısında cavab verən cinayətkarlar sırasına Serj Sarkisyan, Robert Koçaryan da qoşulacaq...

Biz illərlə Xocalıda, Ballıqayada, Başlıbeldə, Gəncədə, Bərdədə, Tərtərdə və daha neçə-neçə sadalamadığımız ərazilərdə erməni faşizminin qurbanına çevrilən, başlarına faciələr gətirilən günahsız insanlara, körpələrə, uşaqlara, cavanlara, yaşlılara yandıq, Yer üzündən silinən ailələrin müsibətlərinə, ömrü qundaqda qırılan körpələrin yarımçıq talelərinə ağladıq.

Ürəyimizdə alışan qisas alovu ilə torpaqlarımız uğrunda şəhid olan, əsir, girov götürülərək min-bir işgəncəyə məruz qalan soydaşlarımızın qisasını alacağımıza and içdik...

Bəli, indi Azərbaycan xalqı olaraq faşizm ideyalı separatçılardan əsrlərin qisasını aldığımız, onları bir-bir haqq-ədalət divanına çəkdiyimiz fəxrli, qürurlu günlər yaşayırıq.

Qisasımız qiyamətə qalmadı!

Yasəmən MUSAYEVA

Azərbaycan.- 2023.- 6 oktyabr.- S.5.