Paşinyan nazirlərinə etibar etmir

Hayastan yeni siyasi xaosa sürüklənir

Hayastanda anti-Rusiya siyasəti ətrafında başlanan məlum böhran fonunda hadisələrin daha gərgin məcrada inkişaf edəcəyinə dair verilən proqnozlar özünü doğrultmağa başlayır. Belə məlum olur ki, bu ölkə daxilində qarşıdakı dövr ərzində kifayət qədər ciddi nəticələrə gətirib çıxaracaq ziddiyyətlər meydana çıxacaq.

Nikol Paşinyan yaxın vaxtlarda vəzifəsini tərk edəcək nazirlərin yerinə namizədlər axtarmağa başlayıb. "Joğovurd" nəşrinin yazdığına görə, baş nazir İrəvan Qəyyumlar Şurasına seçkilərindən sonra mərkəzi icra hakimiyyətində təmizləmə işlərinə başlayacaq. Müəllif bildirib ki, bu müddət ərzində fəaliyyətsiz qalan nazirlər postları ilə vidalaşacaqlar: "Fəaliyyətsiz nazirlər arasında ədliyyə naziri Qriqor Minasyan, ətraf mühit naziri Hakop Simidyan, ərazi idarəetmə və infrastrukturlar naziri Qnel Sanosyan, həmçinin sosial məsələlər naziri Narek Mkrtçyan da var. Hakimiyyətə yaxın mənbələrimizdən əldə etdiyimiz məlumata görə, Nikol Paşinyan artıq bu nazirləri əvəz edəcək şəxslər axtarmağa başlayıb. Məlumata görə, Paşinyan, məsələn, Narek Mkrtçyanın yerinə "Vətəndaş müqaviləsi" fraksiyasının deputatı, maliyyə krediti və büdcə məsələləri daimi komissiyasının sədri Gevorq Papoyanı görür. Onu da qeyd edək ki, bununla bağlı yekun qərar verilməyib, müzakirələr gedir".

İrəvanda Paşinyan iqtidarına etiraz edən insanlar Hayastanda fəaliyyət göstərən diplomatik nümayəndəliklərin qarşısında aksiya keçirməyə başlayıblar. Etirazçılar Almaniya, Fransa və İtaliya səfirliklərinin qarşısına toplaşıblar. Aksiya iştirakçıları bildiriblər ki, əhali artıq Paşinyana və komandasına inanmır, çünki onlar xalqa verdikləri vədə əməl etmədilər. Qeyd edilib ki, Hayastan hazırda ən ağır günlərini yaşayır. Ölkədə məmur özbaşınalığı, rüşvətxorluq və işsizlik tüğyan edir. Orduda komandirlərə qarşı işgəncə halları artıb. Vətəndaşlar məhkəmə sistemindən və polis zorakılığından cana gəliblər. Sakinlər qeyd ediblər ki, qoy Avropa ölkələri Paşinyanın seçiciləri ilə necə davrandığının şahidi olsunlar. Bu səbəblərdən Hayastanda yeni baş nazirə ehtiyac var.

"4rd.am" saytı yazır ki, ölkədə populizm asan bir yol olduğu halda başqa bir yol axtarmağa ehtiyac qalmır: "Xalqı aldatmaq üçün ibtidai mexanizm işləyəndə niyə başqa yollar axtarılmalıdır? Bu cür düşüncə növü Hayastanda son zamanlar üstünlük təşkil etməkdədir". Saytın yazdığına görə, cəmiyyət artıq Paşinyan hökumətinin səriştəsizliyindən, onların parlamentdəki çoxluğundan bezib.

Erməni xalqı hərəkət və hərəkətsizliyi ilə dövlətin təhlükəsizliyini təhdid etdiyini belə, anlamayan Nikolun komandasının təkəbbürlü cəhalətindən cana gəlib: "Bu gün biz Hayastanda bu proseslərin aktiv mərhələsinin şahidi oluruq. Belə görünür ki, artıq Nikolun "küməsi" yatmaqdadır. Bu gün baş nazirin rəhbərlik etdiyi "Vətəndaş müqaviləsi" partiyasına qoşulmaq üçün müraciətlərin sayı kəskin şəkildə azalıb. Nikol Paşinyanın müvəqqəti fiqur olduğunu təkcə yerli ermənilər deyil, həm də Hayastanın hüdudlarından kənarda da insanlar başa düşməyə başlayıblar".

Bu arada yerli sosial araşdırma şirkətləri bildirir ki, Hayastanda hakimiyyət üçün ən böyük problem sosial sahələrdən qaynaqlanır. Bloqçu Manvel Laevonyan Hayastanda vətəndaşların vacib problemlərini araşdırıb. Rəyi soruşulanların 48 faizi işsizliyin Hayastanın başlıca problemi olduğunu söyləyib. Respondentlərin 40,5 faizi ölkədəki iqtisadi vəziyyətin düzəlməsinə üstünlük verib. Rəyi soruşulanların 26,8 faizi isə təqaüd və əməkhaqlarının az olmasından şikayət edib. Respondentlərin 26,1 faizi Qarabağ məsələsini Hayastanın vacib problemi sayır. Sorğuda iştirak edənlər emiqrasiya, korrupsiya və terroru da ölkənin başlıca problemləri sırasında görüblər.

Nəticələrdən aydın olur ki, ermənilər üçün sosial problemlər ön planda gəlir. Bundan istifadə etməyə çalışan keçmiş hərbi xunta təmsilçiləri Paşinyana qarşı fəaliyyətini daha da genişləndirirlər.

Elçin CƏFƏROV,

Azərbaycan.-2023.- 12 oktyabr, №-222.- S.10.