İlham Əliyev xalqa verdiyi bütün vədləri uğurla yerinə yetirib

Müstəqilliyimizin ilk illərində buraxılan tarixi səhvlər ucbatından torpaqlarımız işğal olundu, bir milyondan çox insanımız elindən, obasından didərgin düşərək olmazın əzablar çəkməyə məcbur oldu. Minlərlə insanımız isə başlarına gətirilən müsibətlərə dözməyərək yurd həsrəti ilə ömürlərini başa vurdu. Düşmən işğal etdiyi torpaqlarımızda daş üstdə daş qoymadı...

Xalqımız və dövlətimiz üçün bu ağır günlərdə xalq xilas yolunu Ulu Öndər Heydər Əliyevi hakimiyyətə dəvət etməkdə gördü. Ömrünü xalqına həsr edən Ümummilli Lider ağır gündə xalqının çağırışına biganə qala bilməzdi...

Heydər Əliyevin hakimiyyətə gəlişi ilə tarixi sınaqdan da üzüağ çıxa bildik. Təcrübəli lider, böyük dövlət adamı Ulu Öndər, ilk növbədə, xalqın birliyini bərpa etdi. Müstəqilliyini yenidən elan edən Azərbaycanda dövlət quruculuğuna start verildi. Ordu quruculuğunda yeni mərhələ başlandı. Dünyanın ən böyük neft şirkətləri ilə "Əsrin müqaviləsi" imzalandı. Bununla da Azərbaycan inkişaf yoluna çıxdı.

Ulu Öndər özündən sonra onun siyasi irsini İlham Əliyevin daha uğurla davam etdirə biləcəyini qeyd edərək yazırdı: "İnanıram ki, mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm".

2003-cü ildə Prezident seçilən İlham Əliyev qısa zamanda xalqın arzularını gerçəkləşdirib, ümidlərini doğrultdu. 2023-cü il oktyabrın 14-də Azərbaycan Respublikasının Baş naziri Əli Əsədovun və Azərbaycan Respublikası Prezidentinin Administrasiyasının rəhbəri Samir Nuriyevin həmsədrliyi ilə Bakıda, "Gülüstan" sarayında "Vətənə, xalqa və dövlətçiliyə misilsiz xidmətin 20 ili" mövzusunda keçirilən konfransda çıxış edən Baş nazir qeyd etdi ki, 20 illik fəaliyyəti dövründə İlham Əliyev dövlət başçısı kimi xalqa verdiyi bütün vədləri uğurla yerinə yetirib: "Biz qalib xalqın nümayəndələri, qalib dövlətin vətəndaşlarıyıq".

İlham Əliyev Azərbaycana rəhbərlik etdiyi bu illərdə ölkəmizi regionun lider dövlətinə çevirdi. İlham Əliyevin Azərbaycana rəhbərlik etdiyi möhtəşəm 20 il Prezident Administrasiyasının rəhbəri Samir Nuriyevin qeyd etdiyi kimi, xalqımızın həyatında silsilə qələbələr, misli görünməmiş yüksəliş və tərəqqi illəri kimi tarixə düşdü. 2003-2022-ci illərdə Azərbaycanda ümumi daxili məhsul 7,3 milyard dollardan 78,7 milyard dollara yüksəldi. Bu illərdə dövlət büdcəsinin xərcləri 1,2 milyard manatdan 36,6 milyard manata yüksəldi. Strateji valyuta ehtiyatları 2003-cü ildə 1,4 milyard dollar idisə, 2023-cü il oktyabrın 1-nə 66,1 milyard dollara qədər artıb. 2003-2022-ci illərdə ölkə iqtisadiyyatına yatırılan ümumi investisiya həcmi 310,4 milyard dollar təşkil edib. 2003-cü illə müqayisədə 2022-ci ildə yoxsulluq səviyyəsi 44,7 faizdən 5,5 faizə enib, orta aylıq əməkhaqqı 77,4 manatdan 839,4 manata yüksəlib. Əhalinin yaşam tərzi, sosial rifahı əsaslı surətdə dəyişib.

Bu gün Azərbaycanda yol infrastrukturu tamamilə yenidən qurulub. Geridə qalan 20 ildə ölkəmizdə 17 min kilometrdən çox avtomobil yolu, 500-dən çox körpü və tunellər, 3300-dək məktəb, 450-dən çox uşaq bağçası, 550-dən çox tibb müəssisəsi, 41 Olimpiya İdman Kompleksi tikilib və ya təmir olunub. İndi insanlar vaxt itirmədən Bakıdan respublikanın ən ucqar bir kəndinə çox rahatlıqla gedə bilirlər. Ölkədə mavi qaza olan tələbat tam ödənilir. İnsanlar yaxın keçmişimizdə rayonlarda, kəndlərdə elektrik enerjisinin fasilələrlə verilməsini, istiliklə təmin olunmaları üçün əlacsız vəziyyətdə meşələri, ağacları qırmalarını unutmayıblar. Bunlar indi keçmişdə qalıb. Fərəhlə qeyd edə bilərik ki, indi bir sıra Avropa dövləti bizdən qaz alır. Regionun bir sıra dövlətinin elektrik enerjisi ilə təminatı Azərbaycandan asılıdır.

Paytaxt Bakıdan tutmuş ən ucqar dağ kəndinə kimi məktəblər, bağçalar, xəstəxanalar ya yenidən tikilib, ya da bərpa edilib. Xidmət təşkilatlarının işində keyfiyyətli dəyişikliklər baş verib. Bu gün Azərbaycan brendi olan "ASAN xidmət" insanlara öz evlərində belə, xidmət göstərir.

İşsizliyin aradan qaldırılması üçün dövlətimiz ardıcıl və təxirəsalınmaz tədbirlər görüb. Xüsusilə şəhərə axının qarşısının alınması məqsədilə regionlarda, yeni sənayə məhəllələri, aqrokombinatlar yaradılıb, istehsal müəssisələri tikilib istifadəyə verilib.

Ölkədə aparılan abadlıq-quruculuq işləri, xidmət səviyyəsinin yüksəlməsi xarici turistlərin, səyyahların da diqqətindən kənarda qalmayıb. Bu illərdə ölkəmiz xarici turistlərin, səyyahların ən çox üz tutduqları ölkələr sırasında yer alıb.

Müzəffər Ali Baş Komandan İlham Əliyevin sərkərdəliyi ilə ölkəmiz 44 günlük Vətən müharibəsində qazanılan möhtəşəm qələbə ilə dünyanı təəccübləndirə biləcək bir uğura imza atdı. Qələbədən sonrakı üç il müddətində Qarabağ və Şərqi Zəngəzur iqtisadi rayonlarında misli görünməmiş bərpa-quruculuq işlərinə, Böyük qayıdışa start verildi. Tarixə adı "Ağalı möcüzəsi" kimi düşən Ağalı kəndi öz gözəlliyi ilə görənləri təəccübləndirir. Laçında, Cəbrayılda, Ağdamda, Füzulidə inşaat işləri görünməmiş vüsət aldı. Artıq hər gün evlərini məcburi qaydada tərk etmiş insanların doğma yurdlarına dönmələri barədə xəbərlər eşidirik.

Qarabağın rəmzi, bütün türk dünyasının mədəniyyət paytaxtı böyük bir tikinti meydançasına bənzəyir. Şuşaya səyahət edən hər kəs bu şəhərdə möcüzə baş verdiyini zənn edir.

Bizə qələbə sevincini yaşadan, torpaqlarımızı işğaldan azad edən, zəfər bayrağımızı işğal olunmuş ərazilərdə qaldırmaq uğrunda canlarından keçən, sağlamlıqlarını itirən əsgər və zabitlərimizə, şəhid və qazi ailələrinə, eləcə də sosial qayğıya ehtiyacı olan ailələrə olan diqqət xüsusi olaraq artırılıb. Şəhid ailələri və müharibə əlilləri üçün mənzil təminatı proqramı ötən üç ildə 5 dəfə genişlənib. Son 3 ildə bu qəbildən olan şəxslərə 5300, ümumilikdə isə 14100 mənzil və fərdi ev təhvil verilib. Müharibə ilə əlaqədar əlilliyi olan şəxslərə 7500 avtomobil verilib. Postmüharibə dövründə Prezidentin göstərişi ilə 124 min şəxsə 309 min xidmət göstərilib. O cümlədən 103 min şəxsə sosial ödəniş təyin olunub, 20 min şəxsin məşğulluğu təmin edilib, 51 min şəxsə reabilitasiya xidməti (o cümlədən 458 yüksəktexnologiyalı protez) təqdim olunub.

Qarabağa Böyük qayıdışa dair I Dövlət Proqramı qəbul edilib və uğurla icra olunur. Aparalan abadlıq-quruculuq işlərinin mənzərəsini təsəvvür etmək üçün qeyd edək ki, Zəngəzur iqtisadi rayonlarındakı bərpa-quruculuq işlərinə dövlət büdcəsindən 7 milyard ABŞ dolları vəsait ayrılıb. Prezident Administrasiyasının rəhbəri Samir Nuriyevin qeyd etdiyi kimi, Ermənistan rəhbərliyi və Qarabağdakı hərbi xuntanın başçıları ehtimal belə etmirdilər ki, gün gələcək Azərbaycan təkcə Ağdamda, Füzulidə, Cəbrayılda, Zəngilanda, Qubadlıda, Kəlbəcərdə, Laçında, Şuşada deyil, eləcə də Xankəndidə, Ağdərədə, Xocalıda, Xocavənddə nəzarətini bərpa edəcək, xalqımıza qarşı cinayətlər törətmiş separatçılar isə Azərbaycan məhkəməsi qarşısında cavab verməli olacaqlar. Bunlar artıq xəyal deyil, Prezident İlham Əliyevin apardığı düşünülmüş praqmatik siyasətin real nəticələridir.

Elşən QƏNİYEV,

Azərbaycan.-2023.- 19 oktyabr, № 228.- S.9.