Erməni ekspertlərdən etiraf

Paşinyanın Avropa Parlamentindəki qeybət xarakterli çıxışı ölkənin "siyasi imici"nə zərbədir

Hayastanla Azərbaycan arasında 30 il davam edən keçmiş Qarabağ münaqişəsinə son qoyulsa da, ölkəmiz ərazi bütövlüyünü bərpa etsə də, hələ də tərəflər arasında sülh müqaviləsinin imzalanmaması regionda sabitliyin təmin olunmasına imkan vermir.

Bunun da yeganə səbəbi cəmi 44 günə Azərbaycan qarşısında diz çöküb savaşın dayandırılmasını xahiş edən Hayastanın cəfəng iddiaları, bəhanələri və hərbi təxribatları idi.

Son günlərdə erməni siyasi ekspertlərin verdiyi açıqlamar göstərir ki, Hayastanın rifahı, ümumiyyətlə, hayların xalq olaraq varlıqları Azərbaycanla normal münasibətlərdən keçir. Buna görə də, düşdükləri ağır durumdan xilas olmağın yollarını axtarmalıdırlar. Çünki, artıq xaricdəki diaspor da onların imdadına çata bilmir.

Politoloq Stepan Movsisyan deyib ki, daha əvvəlki zaman keçib, köhnə dünyanın nizamı çoxdan dağılıb. İndi regionda mühüm hadisələr baş verir. Azərbaycanın iradəsi regionda mühüm rol oynayır. Yeni dünya düzəninin formalaşması zamanı bütün münaqişələr həll edilməlidir.

Bunların fonunda Nikol Paşinyanın Avropa Parlamentindəki çıxışı Hayastanda geniş müzakirələrə səbəb olub. Erməni politoloq Benyamin Matevosyan özünün "Telegram" kanalında Nikol Paşinyanın Strasburqdakı çıxışını şərh edib. O bildirib ki, Paşinyanın Avropa Parlamentinin tribunasındakı qeybət xarakterli çıxışı Hayastanın "siyasi imicinə" zərbədir. Paşinyan yüksək tribunadan Rusiyanı ittiham edərək deyir ki, ruslar Hayastana kömək etməyib. Bunu onunla əlaqələndirdi ki, Rusiyanın məqsədi Hayastanı Azərbaycan Ordusu ilə baş-başa qoymaqla ölkədə hakimiyyət dəyişikliyinə nail olmaqdır. Üstəlik, hakimiyyət hesab edir ki, sentyabrın 19-dan 23-dək İrəvandakı etiraz aksiyaları da Rusiya tərəfindən təşkil edilmişdi. Bununla ruslar ölkədə hakimiyyəti dəyişmək, "erməni demokratiyasını məhv etmək" planlarını həyata keçirmək istəyiblər.

Erməni politoloq daha sonra yazır ki, Paşinyanın çıxışı həm də özünün xarici siyasətinin uğursuzluğunun təsdiqi idi. Bununla baş nazir Aİ-yə, xüsusən də Avropa Parlamentinə "erməni demokratiyasını dəstəkləmək" üçün minnət edirdi: "Paşinyan bir daha anklavları Azərbaycana təhvil verməyə hazır olduğunu bəyan edib. O, həmçinin bir sıra siyasi qüvvələrin, ekspertlərin uzun müddətdir dediklərini şəxsən təsdiqləyib. Bildirib ki, Azərbaycan Hayastanın ərazi bütövlüyünü tanıyır, delimitasiya və demarkasiyanın həyata keçirilməsini istəyir".

Benyamin Matevosyan vurğulayıb ki, Paşinyanın təkidlə istədiyi sülh müqaviləsinin imzalanması Azərbaycanın diqtəsi ilə həyata keçiriləcək və Azərbaycanın təklif etdiyi xəritələr əsas götürüləcək.

Sosial-iqtisadi çətinliklər məngənəsində boğulan Hayastan müharibədən üç il ötməsinə baxmayaraq, vəziyyətini düzəldə bilmir, əksinə, çökməkdə davam edir. Dərin ruh düşkünlüyünə qərq olan əhali isə çıxış yolunu mühacirətdə görür.

Bütövlükdə bütün bunlar Hayastanın böyük tənəzzül yaşadığını göstərir. Görünən budur ki, sülh müqaviləsinin imzalanmasının uzadılması fonunda İrəvan üzləşdiyi problemlərdən hələ uzun müddət xilas ola bilməyəcək.

Elçin CƏFƏROV,

Azərbaycan.-2023.- 19 oktyabr, № 228.- S.10.