Mənasız və əhəmiyyətsiz kağız parçaları

Avropa Parlamenti və İspaniya Senatının erməni təəssübkeşliyi boşboğazlıqdan başqa bir şey deyil

"Ötən 30 ildə işğal və təcavüzə dəstək verən, separatizmi təşviq edən platformalar bəşəri dəyərlər naminə "birlikdən" danışa bilərmi? Avropa Parlamenti məhz selektiv yanaşması ilə ədalətli mövqedən uzaqlaşdığını və ayrı-ayrı qüvvələrin əlində alətə çevrildiyini göstərir. Azərbaycan ötən illər ərzində bu qurumlardan faktiki işğal və təcavüz faktı ilə bağlı qətiyyətli mövqe görməyib. Ümumiyyətlə, əleyhimizə çıxış edən qurumlar, eləcə də Avropa Şurası və İspaniya Senatı yaxşı olardı ki, boşboğazlıqdan əl çəkib özlərinin davranışlarına əl gəzdirsinlər".

Bu fikirləri qəzetimizə açıqlamasında Milli Məclisin deputatı Bəhruz Məhərrəmov deyib. Deputat vurğulayıb ki, müasir Avropa təsisatları yaradılarkən bəşəri dəyərlər rəhbər tutulub və 1948-ci ildə qəbul edilən İnsan Hüquqları Bəyannaməsinin məqsədi, habelə sənəddə bəyan edilən hüquqların hamılıqla və səmərəli tanınması və həyata keçirilməsi ali niyyət kimi müəyyən olunub. Hətta Avropa Şurasının Nizamnaməsinin preambulasında ifadə olunur ki, bu sənəd ədalətlə və beynəlxalq əməkdaşlığa əsaslanmış sülhün möhkəmləndirilməsinin sivilizasiyanın qorunması üçün həyati əhəmiyyət daşıdığına inanılaraq qəbul edilib. O cümlədən də Avropa İttifaqı üçün beynəlxalq hüququn əməkdaşlıq prinsipləri fəaliyyət üçün təməl olaraq müəyyən edilib. Azərbaycan məhz bu bəşəri dəyərləri bölüşdüyünə və özünün Konstitusiyasının preambulasında təsbit olunmuş ali niyyətlər və 12-ci maddədə ifadə edilən dövlətin ali məqsədləri ilə üst-üstə düşdüyünə görə bu təsisatlarla əməkdaşlıq edir.

Müsahibimin sözlərinə görə, ötən dövr ərzində uğurlu əməkdaşlıq modeli qurulsa da, demək olar ki, bu təsisatların heç biri öz imkan və səlahiyyətlərinə münasibətdə Azərbaycanın gözləntilərini doğrultmayıb. Prezident İlham Əliyevin 24 iyun 2014-cü ildə Avropa Şurası Parlament Assambleyasının sessiyasındakı tarixi nitqində də bəyan etdiyi kimi, "demokratiya, qanunun aliliyi və müxtəlif ölkələrdəki vəziyyətə bəzən selektiv yanaşma" bu illər ərzində bizi çox narahat edib.

"Digər tərəfdən, 30 ilə yaxın bir dövrdə Avropa təsisatlarının Fransa, Lüksemburq, İsveçrə kimi bir sıra aparıcı subyektləri Ermənistanın işğal, təcavüz siyasətinə, ərazimizdə erməni separatizminə birbaşa və dolayı yollarla dəstək veriblər. Baxmayaraq ki, Avropa Şurasının və Avropa İttifaqının Nizamnamələrində Avropa ölkələrinin daha sıx birliyinə ehtiyac duyulduğu, Avropa Konvensiyasında isə əsas məqsədin onun üzvləri arasında daha böyük birliyə nail olmaqdan ibarət olduğu bəyan edilir. Bu illər ərzində işğal və təcavüzə dəstək verən, separatizmi təşviq edən platformalar bəşəri dəyərlər naminə "birlikdən" danışa bilərmi?" - deyə deputat bildirib.

Bəhruz Məhərrəmov qeyd edib ki, Prezident İlham Əliyevin 2014-cü ildə Strasburqda bəyan etdiyi kimi, "Ermənistan Avropa Şurası Parlament Assambleyasının 2005-ci ildə qəbul etdiyi qeyd edilən məzmunlu qətnaməsinə ümumiyyətlə məhəl qoymurdu". Amma nə Avropa Şurası, nə qurumun Parlament Assambleyası, nə Avropa Parlamenti bu məsələ ilə bağlı nəinki ədalətli mövqe tutmadı, əksinə, Ermənistanın işğalçılıq mövzusunda, ümumiyyətlə, danışmamağa üstünlük verdi. Təbii ki, bu tip davamlı riyakar və selektiv yanaşması ilə Avropa təsisatları, xüsusən Avropa İttifaqında əslində son bəyan olunanlar sadəcə sənədləşmiş, lüzumsuz söz yığınıdır.

"Ötən gün biz yenə də riyakar strukturun Azərbaycana çağırış edən, ermənilərin Qarabağa qayıdış hüququndan bəhs edən saxtakar bəyanatlarına şahidlik etdik. 700 mindən artıq məcburi köçkünün, 300 mindən artıq qərbi azərbaycanlının qayıdış hüquqlarından bir dəfə də olsun bəhs etməyən, 1 milyondan artıq insanın hüquqlarını görməzdən gələn Avropa İttifaqını bu gün hansı maraqlar danışdırır, bizə tam aydındır. Biz çox yaxşı xatırlayırıq ki, cəmi üç il öncə Gəncə, Bərdə, Tərtərdə dinc insanlar Ermənistan tərəfindən raket atəşinə tutularkən, yüzlərlə mülki şəxs, qadınlar, qocalar, uşaqlar məhz azərbaycanlı olduqları üçün müharibə cinayətlərinə qurban gedərkən bu riyakarlar necə və niyə susurdu", - deyə o söyləyib.

Fransanın göstərişləri ilə hərəkət edən, ədalətsiz və qərəzli bir təşkilatın hər hansı qərar və tövsiyəsinin bizim üçün mötəbər olmadığını deyən deputat əlavə edib ki, real situasiyanı təhrif edən bu çirkli kağız parçaları ilə, habelə bu tip davranışlarla avrostrukturlar sadəcə özlərini ifşa edirlər.

Deputat Azərbaycanın istər Vətən müharibəsində, istərsə də antiterror tədbirləri zamanı BMT Nizamnaməsinin 51-ci maddəsində ifadə olunmuş özünümüdafiə hüququnu həyata keçirdiyini, işğalçı, təcavüzkar ilə mübarizə apardığını və beynəlxalq hüququn aliliyini təmin etdiyini xüsusi vurğulayıb. Bildirib ki, belə olan halda Avropa İttifaqı hansı əsaslarla Azərbaycanın özünümüdafiə hüququna müdaxilə edən təxribatçı çağırışlar edir və bizim BMT Nizamnaməsi ilə təsbit olunmuş haqlarımızı hansı əsasla mübahisələndirə bilər?!

Bəhruz Məhərrəmov həmçinin deyib ki, biz bütün hərbi əməliyyatlarda beynəlxalq humanitar hüququn tələblərini rəhbər tutaraq hərəkət etmişik, bizim hədəfimizdə ermənilər yox, işğal, separatizm və terror olub: "Ermənilər məhz Ermənistanın və havadarlarının, o cümlədən Fransanın təhriki ilə Qarabağdan köçüblər. Bu prosesdə, demək olar ki, onların hər birinin Azərbaycan tərəfindən heç bir təzyiq və təhdidə məruz qalmaması barədə audiovizual ifadələri sənədləşdirilib. Xocalıdan, Kəlbəcərdən, Laçından, Şuşadan qovulan insanlar, qışda Arazın buzlu suyuna tökülən zəngilanlılar Ermənistandan eyni münasibəti görmüşdülərmi?"

Bəhruz Məhərrəmov həmçinin İspaniya Senatının 17 oktyabr tarixli plenar iclasında qəbul etdiyi anti-Azərbaycan xarakterli bəyanat barədə də fikirlərini bildirib. Qeyd edib ki, Senatın qəbul etdiyi qərəzli bəyanat onların bölgədə mövcud olan yeni reallıqlardan nə dərəcədə uzaq olduqlarını sübut edir. Bu, bir daha təsdiqləyir ki, İspaniya Senatı məhz erməni lobbisinin təsiri altında həqiqəti əks etdirməyən qərarlar qəbul edir.

Deputatın sözlərinə görə, əleyhimizə çıxış edən qurumlar yaxşı olardı ki, boşboğazlıqdan əl çəkib özlərinin davranışlarını təsis sənədlərində müəyyən edilmiş ehkamlara uyğunlaşdırsınlar. Hansısa beynəlxalq təşkilatlar, o cümlədən Avropa İttifaqı və İspaniya Senatı bu məsələyə burnunu soxmaqda israrlıdırlarsa, o zaman öncə 300 mindən artıq qərbi azərbaycanlının Ermənistana ləyaqətli qayıdış hüququndan, habelə 700 mindən artıq azərbaycanlının Qarabağ və Şərqi Zəngəzura qayıdışını ləngidən mina terroru, onların yerlə yeksan edilmiş evləri və vandalizmə məruz qalmış qəbiristanlıqlarından danışmağa başlasınlar.

Nəzrin QAFARZADƏ,

Azərbaycan.-2023.- 20 oktyabr, № 229.- S.10.