Bütün işğalçıların sonu ağır məğlubiyyətdir

Dünyanın bütün ölkələri və beynəlxalq qurumlar haqlı olan tərəfi görür. Doğrudur, onların hər birinin dürüst, prinsipial mövqe sərgilədiklərini, haqlının tərəfində olduqlarını deyə bilmərik. Təəssüf ki, işğalı görüb işğalçıya qarşı çıxmayan, terror əməllərini görüb terrorçunu günahlandırmayan, hətta soyqırımı törədənlərə, qatı cinayətkarlara, uşaq qatillərinə dəstək verənlər hər zaman oldu. 1980-ci illərin sonlarından başlayaraq qəsbkar ermənilərin Qərbi Azərbaycanda azərbaycanlılara qarşı törətdikləri cinayətləri, qətlləri həmin ölkələrin rəhbərləri, bir sıra beynəlxalq qurumlar "görmədilər".

Öz əzəli yurdlarında qatil ermənilərin hücumları, işgəncələri ilə üzləşən və dədə-baba yurdlarını, isti ocaqlarını tərk etmək məcburiyyətində qalan qərbi azərbaycanlıların fəryadını "eşitmədilər". İşğalçılığı, təcavüzkarlığı, qəddarlığı özlərinə adət etmiş ermənilər bu "korların", bu "karların" etinasızlığından, laqeydliyindən, haqsızlığından daha da azğınlaşdılar. Azərbaycanın Qarabağ və Şərqi Zəngəzur ərazilərinin əsl sakinləri olan azərbaycanlılara qarşı münaqişələri, terror əməllərini daha da gücləndirdilər. Yenə də azərbaycanlılar öz yurdlarında, öz evlərində qatil, terrorçu ermənilərin hədd-hüdudu olmayan zülmlərinə, dəhşətli işgəncələrinə məruz qaldılar. Xocalıda, Meşəlidə və Qarabağın, Şərqi Zəngəzurun digər yerlərində ermənilər azərbaycanlılara qarşı qətliamlar, soyqırımları həyata keçirdilər. Və əfsus ki, cəzasız qaldılar.

Özlərinə dövlət qurduqları Azərbaycan torpaqlarından azərbaycanlıların izlərini silmək üçün tarixi abidələri məhv etdilər. O abidələrin ki bir çoxu yalnız Azərbaycan deyil, dünya əhəmiyyətli idi.

Azərbaycanın Qarabağ və Şərqi Zəngəzur torpaqlarında erməni işğalı uzun illər davam etdi. İşğalçılar həmin ərazilərin zəngin təbiətinə qənim kəsildilər. Yaşayış məntəqələrini taladılar, yerlə yeksan edib xarabalığa çevirdilər. Tarixi, dini abidələrini qarət etdilər, uçurub dağıtdılar.

Nəinki bu cinayətlərə susan, ən dəhşətlisi, Ermənistanı müdafiə edən, yardım göstərən ölkələrin ön sırasında dayananlardan biri Fransa oldu. Bu ölkənin yalnız tarixinə deyil, bu gününə də nəzər salanda qaranlıq məqamlar aydın olur. Bəlli olur ki, işğalçılıq siyasətini əsrlərdir davam etdirən Fransa həmişə özü kimi gözlərini özgə torpaqlarına dikən Ermənistanı dəstəkləyib.

Fransanın müstəmləkə siyasətindən ən çox əziyyət çəkən ölkələrdən birinin - Əlcəzairin Ali təhsil və elmi tədqiqatlar nazirinin müşaviri Youcef Hourinin oktyabrın 20-də "Neokolonializm: İnsan Hüquqlarının Pozulması və Ədalətsizlik" mövzusunda keçirilən konfransda bildirdiyi kimi: "Fransa hər kəsə insan hüquqları, beynəlxalq hüquq sahəsində dərs vermək istəyir. Lakin Fransa bizim planetimizdə dərs verə biləcək ən son ölkədir. İnsan haqları sahəsində onun dərs verməyə haqqı yoxdur". Bu haqqı Fransa ona görə itirib ki, qeyd etdiyimiz kimi, özü əsrlərdir işğalçıdır, müstəmləkəçidir. Youcef Houri diqqətə çatdırdı ki, fransızlar 1945-ci ilin martında 45 min əlcəzairlini, 1952-ci ildə Konstantin şəhərində 230 nəfəri öldürüblər, 1961-cı ildə Parisdə 300 nəfər əlcəzairli qətlə yetirilib, soyqırımı uşaqlara, qadınlara, qocalara, bütünlükdə hər kəsə qarşı həyata keçirilirdi, Fransa bütün qadağan olunmuş silahlardan istifadə edərək Əlcəzair xalqını qətlə yetirirdi. Diqqətə çatdıraq ki, bunlar Fransanın yalnız Əlcazairdə törətdiyi cinayətlərdir…

Ancaq tarix göstərir ki, bütün işğalçıların sonu məğlubiyyətdir. Sadəcə, geci-tezi var. Bunu Ermənistan gördü, anladı, Fransa kimi ölkələrin rəsmiləri də başa düşməlidirlər.

Oktyabrın 15-də Xankəndidə çıxış edən Prezident Əliyev bəyan etdi: "Baxın görün, bu gün Azərbaycana ən çox düşmənçilik edən hansı ölkələrdir. Həmin ölkələr ki o vaxt -1992-1993-cü illərdə Ermənistanın yanında idi, onları işğala təhrik edirdi, işğalı dəstəkləyirdi və onlara bəraət qazandırırdı". Bu gün də qərəzli addımlar atmaqla, yanlış qərarlar verməklə Ermənistanla Azərbaycan arasında sülh müqaviləsinin imzalanmasına mane olmaq niyyəti güdən bəzi dünya gücləri fərqində olmalıdırlar ki, zaman əvvəlki zaman deyil.

Axı məkrli niyyətlərini, riyakarlıqlarını Avropa Parlamenti, Avropa İttifaqı kimi beynəlxalq təşkilatların adına sığınaraq həyat keçirən bəzi dövlətlər özləri də yaxşı bilirlər ki, torpaqları uzun illər işğal edilən, vətəndaşları soyqırımlara məruz qalan, dəhşətli işgəncələr görən, məcburi kökün həyatı yaşamağa məhkum olan, Azərbaycan idi. 2020-ci ilin payızında Azərbaycan ordusu torpaqlarını azad etdi. Bu ilin 19-20 sentyabrında həyata keçirilən lokal xarakterli antiterror tədbirlərinin məqsədi isə Azərbaycanın suverenleyini tam bərpa etməkdi və buna nail olduq.

İllərlə Fransa və onun kimi vasitəçi adı ilə, əslində, problemi daha da düyünə salan, Cənubi Qafqazda münaqişə alovunun sönməməsindən öz mənafeləri üçün istifadə edən dövlətlərin cəhdləri baş tutmadı. Artıq özləri də məkrli niyyətləri ilə birlikdə bölgəmizdə tamamilə gərəksiz olduqlarına əmindirlər. Bəziləri bununla barışmaq istəməsə də, haqqı, ədaləti unutsa da, bir gün həqiqətin qarşısında susub, öz qınlarına çəkilməli olacaqlar.

Sülhə, ədalətə söykənən, beynəlxalq hüquqa əsaslanan siyasəti Azərbaycana uğur gətirir. Öz gücü ilə Qarabağ problemini həll etmiş Azərbaycan dövləti işğaldan azad olunmuş ərazilərində işğalçı ermənilərin xarabalığa çevirdikləri yaşayış məntəqələrini yenidən qurur və Böyük qayıdış gerçəkləşir.

Zöhrə FƏRƏCOVA,

Azərbaycan.-2023.- 22 oktyabr, № 230.- S.4.