Neokolonist Fransanın tarixi qanlı cinayətlərdən ibarətdir

"Bəşəriyyətin kolonializm tarixinin qanlı cinayətlərinin çoxu məhz Fransa tərəfindən törədilmişdir. Afrika, Cənub-Şərqi Asiya, Sakit Okean, Latın Amerikasında onlarca ölkəni işğal edən, sərvətlərini talan edən, xalqlarını uzun illər əsarətdə saxlayan Fransa həmin ərazilərdə hərbi və bəşəriyyət əleyhinə çoxsaylı cinayətlər törətmişdir, fransız silahlı qüvvələri etnik və dini mənsubiyyətinə görə yüz minlərlə dinc sakini soyqırımına məruz qoymuşdur".

Bakı Təşəbbüs Qrupunun təşkilatçılığı ilə oktyabrın 20-də Bakıda keçirilən "Neokolonializm: İnsan Hüquqlarının Pozulması və Ədalətsizlik" mövzusunda beynəlxalq konfransın iştirakçılarına ünvanladığı müraciətində Prezident İlham Əliyevin bəyan etdiyi kimi, Fransa dünyanın müxtəlif regionlarında onlarca dövlətin ərazisini işğal edərək, sərvətlərini talayıb, uzun illər xalqlarını əsarətdə saxlayaraq onlara qarşı vəhşiliklər, insanlıqdan uzaq bəşəri cinayətlər törədib.

Bu faktdır ki, dünyada Fransa kimi əli milyonlarla insanın qanına batan, silsilə qətliamlar törədən ikinci bir dövlət yoxdur.

Fransa adına başqa bir utancverici məqam isə illərboyu insanlığa qarşı törətdiyi cinayətlərini, yürütdüyü müstəmləkəçi siyasətini pərdələyərək özünü dünyaya demokratik ölkə kimi sırımaq cəhdidir.

Əli bir milyon yarım əlcəzairlinin qanına batan Fransa özünü insani dəyərlərin "keşikçisi", xalqların müqəddəratlarına əhəmiyyət verən ölkə kimi göstərməyə çalışır. İki əsr boyu erməni qəddarlığı ilə üz-üzə qalan Azərbaycana qarşı qərəz və riyakarlıq nümayiş etdirən Fransanın ölkəmizi "etnik təmizləmə"də günahlandırmasına isə həyasızlıqdan başqa ad vermək mümkün deyil.

Törətdiyi vəhşiliklərə görə üzr istəmək əvəzinə...

Ermənistanın timsalında işğal siyasəti həyata keçirən, qətliamlar, soyqırımları törədən bir ölkəyə hamilik edən, hazırda da islamofob, türkofob, irqçi siyasət yürüdən Fransa Azərbaycana qarşı durmadan əsassız ittihamlar səsləndirir, ələ aldığı riyakar qurumlar vasitəsilə ölkəmiz əleyhinə "qətnamə" adı altında hansısa kağız parçaları qəbul etdirir, Cənubi Qafqazda milli azlıqların "müdafiəçisi" olduğu görüntüsünu yaratmağa çalışır.

"Biz Fransada neokolonializm meyilləri ilə paralel olaraq irqçilik və islamofobiyanın da geniş vüsət aldığını müşahidə edirik. Bu gün burada təmsil olunan insanların bəziləri müxtəlif formada təzyiq və ayrı-seçkiliyə, irqçi hücumlara məruz qalır", - deyə müraciətində dövlət başçısı İlham Əliyev də vurğulayıb ki, daxildə bu cür narahatedici və təhlükəli meyillərlə mübarizə aparmalı olan Fransa hakimiyyəti başqa dövlətlərə dərs keçməyə, digər ölkələrin daxili işlərinə qarışmağa cəhd edir.

Prezident qeyd edib ki, qanlı cinayətlərlə zəngin kolonializm tarixindən utanmalı olan Fransa törətdiyi vəhşiliklərə görə üzr istəmək əvəzinə digər ölkələrdə uydurma etnik təmizləmələrdən danışır: "Bu ölkə BMT Təhlükəsizlik Şurasının daimi üzvü statusundan öz qərəzli, qeyri-obyektiv siyasətini yürütmək üçün sui-istifadə edir, müxtəlif regionlarda geosiyasi intriqalarla məşğul olur".

Bu xalqlar hələ də Fransanın əsarəti altındadır

Fransanın Afrikada, Yaxın və Uzaq Şərqdə həyata keçirdiyi neokolonializm siyasəti milyonlarla günahsız insanın fundamental hüquqlarını kobud şəkildə pozub.

Bakıda "Neokolonializm: İnsan Hüquqlarının Pozulması və Ədalətsizlik" mövzusunda beynəlxalq konfrans zamanı da Fransanın müxtəlif xalqlara qarşı törətdiyi müstəmləkə siyasətindən geniş bəhs olunub.

Qvadelupa əhalisinin dörd əsrdir Fransanın əsarəti altında yaşadığını vurğulayan Qvadelupanın Azadlıq Uğrunda Xalq Birliyinin üzvü Jan-Jakob Bisep bildirib ki, ölkəsində müstəqillik tərəfdarı olanlar Fransa tərəfindən öldürülür və onların sayı əhaliyə açıqlanmır.

Martinikanın Azadlıq Partiyasının nümayəndəsi Lyuk Frensis Kerol ölkəsinin təbii sərvətlərinin talan olunduğunu və 90 faizinin Fransaya və digər ölkələrə aparıldığını, Fransız Qvianasının Sosial Azadlığı və Dekolonizasiya Naminə Hərəkatın siyasi bürosunun üzvü Moris Pindard ölkəsinin Fransanın müstəmləkəçilik siyasəti nəticəsində maliyyə və iqtisadi cəhətdən asılı vəziyyətə salındığını, qızıl mədənlərinin talan edildiyini, qızılın çıxarılaraq Fransaya daşındığını deyib.

Fransız Polineziyası Assambleyasının üzvü Heinui Robert le Caill uzun illərdir Fransanın müstəmləkəsi altında olan ölkəsindəki vəziyyətdən bəhs edib, diqqətə çatdırıb ki, Polineziya və Azərbaycan xalqlarının taleyi bir-birinə bənzəyir. Hər iki xalq uzun illər ədalətsizliyə qarşı mübarizə aparıb: "Lakin bizim əsas fərqimiz Polineziya xalqının hələ də bu problemdən əziyyət çəkməsidir".

Fransanın müstəmləkə siyasətindən əziyyət çəkən xalqların siyahısı təbii ki, bunlarla yekunlaşmır, amma elə o xalqların nümayəndələrinin bəzilərinin səsləndirdiyi faktlardan da aydın olur ki, Fransa bu gün də neokolonializm siyasətindən əl çəkməyib.

Fransa neokolonizminə qarşı bütün platformalarda mübarizə aparacağıq

Azərbaycanın torpaqlarını işğaldan azad etməsini, suverenliyini bərpa etməsini heç cür həzm edə bilməyən Fransa hazırda Ermənistana dəstək verərək, onu silahlandıraraq Azərbaycanla müharibəyə qızışdırır. Bununla da məkrli Avropa ölkəsi iki dövlət arasında sülh, barış əldə olunmasına qarşı çıxdığını ortaya qoyur. Faktiki olaraq Ermənistanı forpostuna çevirən Fransa bununla qanlı əllərini Cənubi Qafqaza da uzatmaq istəyir. Lakin qüdrətli Azərbaycan dövləti regionun Fransanın müstəmləkəsinə çevrilməsinə heç zaman imkan verməyəcək, ümumiyyətlə, fransız neokolonizminə qarşı istənilən platformada layiqli mübarizə aparacaq.

Yasəmən MUSAYEVA,

Azərbaycan.-2023.-22 oktyabr, №231.-S.5.