Fransanın müstəmləkəçi və irqçi üzü ifşa olunur

Oktyabrın 20-də Bakıda "Neokolonializm: İnsan Hüquqlarının Pozulması və Ədalətsizlik" mövzusunda beynəlxalq konfrans keçirilib. Konfransda neokolonializm siyasətini davamlı olaraq həyata keçirən Fransa başda olmaqla, bu kimi ölkələr tənqid edilib. Zaman-zaman işğalçılıq və təcavüz siyasəti yürüdənlər xalqlar arasında barışın əldə olunmasına, sülh və əmin-amanlıq mühitinin yaranmasına mane olduqlarına görə ittiham edilib.

Milli Məclisin deputatı Sahib Alıyev qəzetimizə açıqlamasında bildirib ki, Bakıda keçirilən "Neokolonializm: İnsan Hüquqlarının Pozulması və Ədalətsizlik" mövzusunda beynəlxalq konfransda ən çox haqqında tənqid səslənən ölkənin Fransa olması heç də təsadüfi deyil. Bu, təkcə ona görə baş vermir ki, həmin Fransa Azərbaycana qarşı düşmənçilik siyasəti yeridənlərin önündə gedir. Məsələ burasındadır ki, neokolonializmin ən mənfur formalarını reallaşdıran, milli azlıqların hüquqlarını kobudcasına tapdalayan, irqçiliklə islamofobiyanın ən çox tüğyan etdiyi ölkələrin başında da elə Fransa gəlir.

"Avropa Şurasının Milli Azlıqların Müdafiəsi üzrə Çərçivə Konvensiyasına qoşulmamaqla da Fransa milli azlıqların haqqını tanımaq istəmədiyini və tanımayacağını açıq şəkildə ortaya qoyur. Biz o ölkənin aborigen xalq olan korsikalılara yanaşmasında da bunu açıq görürük. Ona görə də Fransa parlamentinin millətçi üzvlərindən biri olan Qrequar de Furnas ötən ilin noyabrında konqolez kökənli digər deputatın -Kalos Martens Bilonqonun üstünə qışqırıb "öz Afrikana qayıt" deyəndə, bu, heç kimi təəccübləndirmədi", - deyə deputat qeyd edib.

Sahib Alıyev deyib ki, Fransada məscidlərin yandırılmasına və oralara basqın edilməsinə, müsəlmanların addımbaşı aşağılanmasına "normal" baxılır: "Bir ölkənin ki, 2021-ci ilin sonunda qəbul etdiyi "Respublika prinsiplərinin möhkəmləndirilməsi haqqında" qanunda islam az qala separatizm kimi qiymətləndirilir, ölkənin başında duran Makron Fransadakı müsəlman icmalarına "etnik aparteid" damğası vurur, Məhəmməd Peyğəmbərin təhqir edildiyi karrikaturalar çəkdirilir və bu, söz azadlığı kimi təqdim olunur, daha onlardan başqa nə gözləmək olar?! Maraqlıdır, əgər peyğəmbərimizin təhqiri söz azadlığıdırsa, niyə onda onu təhqir edən jurnal həmin Makronun Hitler qiyafəsində karikaturasını çəkəndə məhkəməyə verildi?!"

Deputatın sözlərinə görə, keçmişi qaranlıq olan bu ölkənin insan haqları baxımından heç bu günü də ürəkaçan deyil. Ötən əsrin ortalarında Fransa topun, güllənin qabağına qoyaraq 1,5 milyon əlcəzairlini qətlə yetirmişdisə, indi də ənənəvi siyasətini müəyyən qədər başqa formada davam etdirir. Bu ölkə həmin ənənəsini Azərbaycan Prezidentinin "Neokolonializm: İnsan Hüquqlarının Pozulması və Ədalətsizlik" mövzusunda beynəlxalq konfransın iştirakçılarına mürəciətində də qeyd olunduğu kimi, Fransız Polineziyasında 200-ə yaxın, Afrikada 17 nüvə sınağı həyata keçirməklə, Martinika və Qvadelupada gizli və qanunsuz məskunlaşma aparmaqla, xlordekon pestisidindən istifadə edib təbii ekosistemləri və əhalini zəhərləməklə reallaşdırır.

"Fransanın guya hayların hüquqlarını qorumaq adı altında bizim regiona soxulmaq istəyi də məhz neokolonializm siyasətindən qaynaqlanır. Lakin unudurlar ki, Yelisey sarayındakıların bu istəkləri elə arzu olaraq da qalacaq. Fransa qoşunlarının bu yaxınlarda Mali, Niger və Burkina-Fasodan qovulması faktları da onu göstərir ki, Parisin iddiası ilə imkanları arasında böyük uçurum var. Bu fakt insanlar üçün olduğu kimi, dövlətlər üçün də yaxşı nəticə vermir. Fransanı da məhz belə bir tale gözləyir", - deyə Sahib Alıyev əlavə edib.

Nəzrin QAFARZADƏ,

Azərbaycan.-2023.-22 oktyabr, №231.-S.5.