Qərəz və məkr yuvası

Avroparlament də daxil olmaqla, Avropa İttifaqının bir sıra təsisatları erməni separatizminə dəstək verirlər. Onlar bununla erməni lobbisinin əlində alətə çevrildiklərini sübut edirlər. Qərb dairələrinin Azərbaycanı "etnik təmizləmə"də günahlandırmaları tamamilə əsassız və gülüncdür. Görünən odur ki, ölkəmizin öz ərazi bütövlüyünü tam bərpa etməsi Avropa təşkilatlarını ciddi narahat edir.

Milli Məclisin deputatı Ceyhun Məmmədov qəzetimizə açıqlamasında bildirib ki, Avropa Parlamentinin ölkəmiz əleyhinə qərəzli bəyanat verməsi ilk dəfə deyil, artıq neçənci dəfədir ki, bu təşkilat ölkəmizlə bağlı əsası olmayan ittihamlar səsləndirir. Bu, Avroparlamentin nə qədər qərəzli və erməni təəssübünü çəkən bir qurum olduğunu sübut edir. Sözügedən təşkilatda azərbaycanofob siyasət artıq ənənə halını alıb. Bu gün əsl qınanılası dövlət Ermənistandır. Bu ölkə uzun illər boyu Azərbaycan torpaqlarını işğalda saxlayıb, 1 milyona yaxın soydaşımızın evindən-eşiyindən didərgin düşməsinə səbəb olub, ərazilərimizi darmadağın edib. İndi isə manipulyasiya alətlərindən istifadə edərək ölkəmiz haqqında yanlış imic formalaşdırmağa çalışır".

Bəzi Avropa ölkələri və qurumları "Ermənistanın bizim başımıza açdığı oyunları görməzdən gələrək, Azərbaycanın öz ərazi bütövlüyü və suverenliyini beynəlxalq hüququn norma və prinsiplərinə dayanaraq təmin etməsini "etnik təmizləmə" kimi qələmə verirlər. Bu, açıq-aşkar qərəzdir. Bütün dünyaya məlumdur ki, Azərbaycan heç bir işğal siyasəti yürütməyib, ermənilərə də Qarabağdan çıxmaq üçün çağırış etməyib. Bu, Ermənistanın özünün apardığı siyasət və təbliğatdır. Orada yaşayan erməni sakinlər də bildirirlər ki, onlar ərazini könüllü olaraq tərk ediblər. Belə olan halda buna "etnik təmizləmə" donu geyindirmək növbəti ədalətsizliyin açıq-aydın göstəricisidir", - deyə deputat qeyd edib.

Ceyhun Məmmədov vurğulayıb ki, əsassız ittihamlar Azərbaycanı haqq yolundan çəkindirə bilməz: "Azərbaycan müxtəlif platformalarda öz mövqeyini dəfələrlə dünya ictimaiyyətinə, beynəlxalq təşkilatlara çatdırıb. Lakin erməni diasporu əlində oyuncağa çevrilən təşkilatlar yenə də özlərinə gələ bilmirlər. Davamlı olaraq ölkəmizi hədəf alır, erməni təcavüzünü hər zaman dəstəklədiklərini bir daha təsdiq edirlər".

Deputat əlavə edib ki, həmişə olduğu kimi, yenə də Qərb dairələri regionda Azərbaycanla Ermənistan arasında mövcud olan vəziyyətə, xüsusilə sentyabrın 20-də həyata keçirilmiş 23 saatlıq antiterror tədbirlərinin nəticəsinə ədalətlə yanaşmırlar. Bu qərəz Avropa Parlamentinin mövqeyində açıq-aydın görünür. Paşinyana xüsusi münasibət göstərməklə Avroparlament, əslində, öz ikiüzlülüyünü ifşa etdi. Unudurlar ki, korrupsiya yuvası kimi məşhurlaşan bu qurumun riyakar mövqeyi yalnız özünə və havadarı olduğu Ermənistana ziyan vura bilər. Azərbaycan bu kimi qətnamələri kağız parçası hesab edir, haqlı mövqeyindən bir an belə geri çəkilməyəcək".

N.QAFARZADƏ,

Azərbaycan.-2023.-22 oktyabr, №231.-S.5.