Gəncə Dövlət Dram Teatrı İstanbulda V Maltəpə Beynəlxalq Teatr Festivalında iştirak edib

Türkiyədə Avrasiya Teatrlar Birliyinin təşkilatçılığı ilə keçirilən və Maltəpə Bələdiyyəsinin dəstəyi ilə gerçəkləşən festivalda Gəncə Dövlət Dram Teatrı da iştirak edib.

Festivalda rejissor Tural Mustafayevin quruluşunda E.Loneskonun "Kral ölüb" tamaşası nümayiş olunub.

Tamaşada əsas rolları Əməkdar artistlərdən Elxan Abbasov, İlham Hüseynov, Sevda Orucova, Kəmalə Məmmədova və aktyorlar Günay Cabbarova, Ruslan Hüseynov ifa ediblər.

Kral Beranje rolunu oynayan Elxan Abbasov festivalın yekununda "Ən yaxşı kişi aktyoru" nominasiyasında mükafata layiq görülüb. Teatrın direktoru Aqil Bəhramlı isə münsiflər heyətində yer alıb.

Festival zamanı Avrasiya Teatrlar Birliyinin toplantısı keçirilib. Toplantıda qurumun Azərbaycan üzrə təmsilçisi, teatrın aktyoru Yusif Cəfərov da iştirak edib.

Festivalda ölkəmizlə yanaşı, Türkiyə, Şimali Kipr, Gürcüstan, Özbəkistan, Qazaxıstan, Qırğızıstan, Portuqaliya, ümumilikdə 20-dək ölkə təmsil olunub.

Azərbaycan.-2023.-24 oktyabr, №232.-S.11.