Qardaşlığın gücü

Bu gün, oktyabrın 25-i iki qardaş ölkənin birgə keçirdiyi Türkiyə Respublikasının yaradılmasının 100-cü ildönümünə həsr olunmuş "Mustafa Kamal Atatürk - 2023" taktiki təliminin sonuncu günüdür.

Sarsılmaz qardaşlığın hərbi sferadakı tərəfdaşlığının uğurla davam etdiyini bir daha sübuta yetirən bu təlimə Azərbaycan və Türkiyənin Quru Qoşunları, Hərbi Hava Qüvvələrinin heyət və vasitələri cəlb olunub. Bu taktiki təlim Azərbaycan və Türkiyənin hərbi heyətinin döyüş qabiliyyətinin artırılması baxımından mühüm əhəmiyyət kəsb edir. İntensiv xarakter almış belə təlimlər nəticəsində artıq hər iki ölkədə keçirilən hərbi təlimləri Azərbaycan və Türkiyənin hərbçilərinin iştirakı olmadan təsəvvür etmək olmur.

Mövzu ilə bağlı qəzetimizə danışan Milli Məclisin deputatı Naqif Həmzəyev deyib ki, Azərbaycan və Türkiyə hərbçiləri artıq uzun illərdir birgə təlimlər həyata keçirir və ordularının döyüş qabiliyyətini artırırlar. Xüsusilə də 44 günlük Vətən müharibəsindən sonra imzalanmış Şuşa Bəyannaməsinin nəticəsində, iki qardaş ölkənin birgə təlimləri daha intensiv xarakter alıb. Həm Türkiyə, həm Azərbaycan ərazisində keçirilən birgə taktiki hərbi təlimlər regional təhlükəsizliyin və ortaq maraqların təmin edilməsinə, terrorizmə qarşı mübarizənin reallaşdırılmasına, həmçinin orduların istənilən fors-major hadisələrdə bərabər addımlaya bilmələrinə, real əməliyyatlar həyata keçirmələrinə hazırlıq kimi dəyərləndirilməlidir.

Deputat bildirib ki, ordumuzda həyata keçirilən islahatların nəticəsi olaraq, Azərbaycan artıq komanda tipli Türkiyə ordusunun bir modelini öz ərazilərində reallaşdırır. Təsadüfi deyil ki, İkinci Qarabağ savaşından sonra Prezident İlham Əliyevin rəhbərliyi altında çoxlu sayda yeni komanda tipli hərbi hissələrin açılışının şahidi olmuşuq. Hətta işğaldan azad olunmuş Qarabağ və Şərqi Zəngəzur ərazilərində də bu tipli hərbi hissələr mərhələli şəkildə açılır və professional hərbçilərdən ibarət ordu formalaşdırılır. Türkiyə Ordusu ilə birgə keçirilən hərbi təlimlər Azərbaycan Ordusunun daha da güclənməsinə, peşəkarlaşmasına və müasir silah-sursatlarla döyüş qabiliyyətlərinin artırılmasına birbaşa xidmət edir.

Naqif Həmzəyevin sözlərinə görə, belə hərbi təlimlər yenə də davam etdiriləcək. Təlimin intensiv xarakter alması həm də Azərbaycan və Türkiyənin ərazi bütövlüyünün, suverenliyinin qorunmasında vacib amillərdəndir: "Unutmamalıyıq ki, ordular bu cür təlimlər keçirməklə hazırlıq vəziyyətini nə qədər yüksək səviyyəyə çatdırarsa, o zaman ordu real döyüşlərə də bir o qədər hazır olar".

Deputat əlavə edib ki, Türkiyə Ordusu ilə birgə keçirilən taktiki təlimlər Azərbaycan xalqı tərəfindən də dəstəklənir: "Türkiyə Respublikasının yaradılmasının 100-cü ildönümünə həsr olunmuş "Mustafa Kamal Atatürk - 2023" təlimi bizi istəməyən qüvvələr üçün bir mesajdır ki, Azərbaycan və Türkiyə qardaşlığını heç kim poza bilməz və biz birlikdə hər iki dövlətin maraqlarını qorumağa hazırıq".

Nəzrin QAFARZADƏ,

Azərbaycan.-2023.- 25 oktyabr, № 232.- S.9.