Fransa dünənindən və bu günündən utanmalıdır

Paris indi də Cənubi Qafqazda riyakar planlar həyata keçirmək xülyasına düşüb

"Əsrlər boyu müstəmləkəçilik siyasəti yeridən, 50-dən çox ölkənin ərazisini uzun illər işğal altında saxlayıb var-dövlətini talan edən və milyonlarla insanı qətlə yetirən Fransanın bu gün demokratiyadan, insan haqlarından, beynəlxalq normalardan danışmağa haqqı yoxdur. Fransızların törətdikləri soyqırımları və müharibə cinayətləri tarixin səhifəsində qara, unudulmaz ləkədir və bu neokolonist siyasət bəşəriyyətin gələcəyi üçün faciədir".

Bu fikirləri "Azərbaycan" qəzetinə açıqlamasında Milli Məclisin Aqrar siyasət komitəsinin sədri Tahir Rzayev deyib. O bildirib ki, yüz illər boyunca bu vəhşi, qorxunc, millitarist siyasət 10 milyondan çox dinc insanın qətlinə, şikəst olmasına, əzablar içərisində yaşamasına səbəb olub. Əlcəzairdə, Polineziyada, Korsikada, Qviansda, Melaneziyada törədilən faciələr, Afrika, Cənub-Şərqi Asiya, Sakit okean, Latın Amerikasında onlarla ölkənin işğal edilməsi və xalqlarına əzab verilməsi, çoxsaylı cinayətlərin törədilməsi, etnik və dini mənsubiyyətlərinə görə yüz minlərlə insanın soyqırımına məruz qalması, şəhər və kəndlərin xarabazarlığa çevrilməsi Fransanın dövlət siyasətinin əsası olmuş və təəssüfləndirici haldır ki, bu gün də dünyanın bir çox dövlətləri bu çirkin siyasətlə üz-üzədir.

"Bakı Təşəbbüs Qrupunun təşkilatçılığı ilə 14 ölkədən, Fransanın müstəmləkə altında saxladığı, eləcə də, Korsika təmsilçilərinin iştirakı ilə keçirilən "Neokolonialzm İnsan hüquqlarının pozulması və ədalətsizlik" adlı beynəlxalq konfransda səsləndirilən fikirlər, əsarətə düçar olan insanların söylədikləri faktlar Fransa dövlətinin törətdiyi cinayətlərin nümunələridir. Əsrlərlə yürüdülən bu mənfur siyasət bu gün də davam etdirilməkdədir. Konfransda qeyd olunduğu kimi, Fransa kolonializminin yeni metodları bu gün də milyonlarla insanın qəsdinə, ölkələrin talan edilməsinə, yeni münaqişə ocaqlarının, müharibələrin alovlanmasına yönəldilib", - deyə T.Rzayev qeyd edib.

Müsahibimizin sözlərinə görə, Prezident İlham Əliyevin konfrans iştirakçılarına ünvanlandığı müraciətində bir daha xatırladılır ki, bəşəriyyətin kolonializm tarixinin qanlı cinayətlərinin çoxu məhz Fransa tərəfindən törədilib. Deputat əlavə edib ki, dünyada "ədalətin bərpa edilməsi", "beynəlxalq normalara hörmət", "demokratiyanın təntənəsi" şüarlarını əlində bayraq edən Fransa, əslində, bəşəriyyətin düşməni rolunda çıxış edir. Etnik və dini mənsubiyyətinə görə milyonlarla insanın hüquqlarını pozmaqda davam edən millətçi dövlətin rəhbərləri beynəlxalq hüququn pozulmasına adi hal kimi baxır, insanlığa qarşı ən çirkin əməllərə əl atırlar.

Tahir Rzayev bildirib ki, bu, Azərbaycana qarşı münasibətdə də özünü aydın göstərir: "Çoxsaylı xalqların nümayəndələrini etnik təmizləməyə məruz qoyan, insanlara öz dilində danışmağı belə qadağan edən, müstəqilliyə can atan xalqları silah gücünə susduran Fransa dövləti, Emmanuel Makron hakimiyyəti bu gün təcavüzkar - 30 il Azərbaycan torpaqlarını işğal altında saxlayan, varımızı-dövlətimizi talayan, şəhər və kəndlərimizi viran qoyan, on minlərlə soydaşımızın ölümünə səbəb olan Ermənistanın yanındadır, erməni quldurlarını müdafiə edir. Bu azmış kimi, Fransa revanşistləri silahlandırmaqla Cənubi Qafqazda riyakar planlarını reallaşdırırlar".

Komitə sədri Ermənistanla Fransanı bir-birinə yaxınlaşdıran səbəblərdən də danışıb: "Təcavüzkarlıq, insanlıq əleyhinə yönələn əməlləri bu iki ölkəni "dost"laşdırıb. Qarabağdan könüllü gedən erməniləri etnik təmizləmə adı ilə dünyaya təqdim etməklə, genosid, zor ifadələrini ortaya atmaqla Fransa yenidən aranı qarışdırmaq, müharibəni alovlandırmaq niyyətindədir. Çünki özü təcavüzkardır, sui-qəsdlər, mina terroru törətməkdə mahirdir".

Tahir Rzayevin sözlərinə görə, faktlar sübut edir ki, Fransa dünyada ən çox mina istifadə edən, bu yolla kütləvi qırğınlar törədən dövlətlərdən biridir. Əlcəzair ərazisində 5 milyondan artıq minanın basdırılmasını öhdəsinə götürən və bundan qürur duyan Fransa dövləti Ermənistandan da bu təcrübəsini əsirgəməyib. Məhz buna görə son 3 ildə 340 vətəndaşımız Ermənistanın basdırdığı minaların qurbanı olub.

Fransada neokolonializmlə bərabər olaraq irqçilik və islamafobiyanın geniş yayılması da bu ölkənin bəşəri dəyərlərdən kənarda olduğunu sübut edir. İnsanlar milliyyətinə, dininə, rənginə görə təzyiqlərə, təhqirlərə, hücumlara məruz qalır, bəzi hallarda qətlə yetirilirlər. Belə eybəcər bir siyasət yeridən ölkə isə başqalarına demokratiya, insan azadlıqları dərsi keçir, dövlətlərin daxili işlərinə qarışır, etnik bərabərliyi təbliğ edir.

"Azərbaycan Prezidenti konfrans iştirakçılarına müraciətində bu çirkin siyasəti kəskin tənqid edərək deyir: "Qanlı cinayətlərlə zəngin kolonializm tarixinə görə utanmalı olan Fransa törətdiyi vəhşiliklərə görə üzr istəmək əvəzinə, digər ölkələrdə etnik təmizləmədən danışır. Bu ölkə BMT Təhlükəsizlik Şurasının daimi üzvü statusundan öz qərəzli, qeyri-obyektiv siyasətini yürütmək üçün sui-istifadə edir, müxtəlif regionlarda geosiyasi intriqalarla məşğul olur". Təcavüzkar Ermənistanı dəstəkləmək, silahlandırmaq, onun əvəzinə beynəlxalq tribunalardan Azərbaycan əleyhinə böhtanlar, iftiralar söyləmək, bəzi beynəlxalq təşkilatları ölkəmizə qarşı qərarlar qəbul etməsinə təhrik etmək başda Makron olmaqla, Fransanın hakimiyyət dairələrinin vərdişinə çevrilib", - deyə komitə sədri vurğulayıb.

Tahir Rzayev bildirib ki, Fransa məhz Cənubi Qafqazda maraqlarını təmin etmək üçün Ermənistana hərbi yardım göstərir, müdafiə sahəsində müqavilə imzalayır, separatçılara hərbi-siyasi dəstək verir: "Lakin bunlar səmərəsiz gedişlərdir. Çünki Azərbaycan beynəlxalq hüququn norma və prinsiplərinə əsaslanaraq öz torpaqlarını azad edib, suverenliyini qoruyub, sərhədlərini möhkəmləndirib. 30 ildə BMT-nin, ATƏT-in və bir çox beynəlxalq təşkilatların yerinə yetirə bilmədiklərini Azərbaycan Prezidenti, Ali Baş Komandan İlham Əliyev, şanlı ordumuz və xalqımız öz gücünə həyata keçirib, düşmənin başını əzib. Əgər düşmən və havadarları düz yola gəlməsələr, daha ciddi tədbirlər görülə bilər və Azərbaycan xalqı buna hər an hazırdır. Ermənistan və başda Fransa olmaqla havadarları buna əmin ola bilərlər".

Nəzrin QAFARZADƏ,

Azərbaycan.-2023.- 25 oktyabr, № 232.- S.10.