Ermənistanın niyyəti xarici təşkilatlardan pul qoparmaqdır

Qarabağdan gələn ermənilərə "qaçqın" statusunun verilməsi də buna xidmət edir

Ermənistan hökuməti Qarabağı könüllü tərk edən ermənilərə "qaçqın" statusu verməklə beynəlxalq hüququn norma və prinsiplərini növbəti dəfə pozur. Bu ölkə ərazilərimizdə yaşayan erməni-əsilli şəxslərin sayını süni surətdə artırmaqla, onların Qarabağdan zorla çıxarıldıqlarını iddia etməklə beynəlxalq ictimaiyyəti çaşdırmağa çalışır.

Lakin unudur ki, bütün dünya Qarabağdan gedən ermənilərin yaşadıqları şəhər və kəndləri öz istəkləri ilə könüllü tərk etdiklərinə şahiddir, həmçinin işğal olunmuş ərazilərdə məskunlaşdırılan şəxslərin nə mülkiyyət hüququ, nə də qaçqın statusu tanınır. Ona görə də Ermənistanın özünü məzlum duruma salaraq xarici ölkələrdən guya mədəni formada pul dilənməsi iflasa məhkumdur.

Mövzu ilə bağlı "Azərbaycan" qəzetinə danışan Milli Məclisin deputatı Fazil Mustafa deyib ki, Qarabağdan Ermənistana köçən ermənilərə "qaçqın" statusunun verilməsi absurddur: "Onlar qaçqın deyillər, könüllü olaraq ərazilərimizi tərk ediblər. Bu baxımdan Ermənistanın Qarabağda yaşayan ermənilərin "qaçqın" statusu ilə müftə pul əldə etmək məqsədi iflasa məhkumdur. Nəzərə almaq lazımdır ki, o vaxt qaçqın hesab olunur ki, həmin şəxslər əraziləri tərk etməyə məcbur edilirlər".

Deputat vurğulayıb ki, bizim ərazilərimizdə yaşayan erməniəsilli şəxslərin Ermənistanda yaşamağı seçmələri könüllü xarakter daşıyır və bu, bütün dünyaya məlumdur. Biz bununla bağlı dəfələrlə bəyanatlar vermişik, indi də onların geri qayıtmaları üçün çağırışlar edirik. Belə olan halda onlara "qaçqın" donu geyindirmək dünyanın bir sıra aparıcı təşkilatlarından pul qoparmaq niyyətini güdür.

Fazil Mustafa deyib ki, Ermənistan hökumətinin və xalqının belə saxta yola əl atması onların xislətindən irəli gəlir: "Davamlı olaraq saxtakarlıqlar edərək müxtəlif qurumlardan maliyyə yardımı qoparmaq ermənilərdə ənənə halını alıb. Lakin bu dəfə məqsədlərinə nail ola bilməyəcəklər".

Müsahibimiz 30 illik işğal dövründə Ermənistanın orada yaşayan şəxslərin sayını süni şəkildə artırdığını da xatırladıb. Bildirib ki, erməni xisləti burada da öz işini görüb, əhalinin sayını çox göstərməklə, müqabilində xaricdən daha böyük həcmdə ianə və yardım toplaya biləcəyini hesablayıb: "İndi də fürsətdən özünəməxsus şəkildə yararlanmağa və qaçqınlara yardım adı altında ölkəyə daimi "pul axını"nı təmin etməyə çalışır".

Fazil Mustafa həmçinin "qaçqın" statusunun kimlərə şamil oluna biləcəyi barədə də danışıb. Söyləyib ki, Qarabağ və Şərqi Zəngəzur işğal olunandan sonra həmin ərazilərə köçürülmüş və qanunsuz məskunlaşma yolu ilə oraya yerləşdirilmiş insanlar qaçqın hesab edilə bilməzlər. Ümumiyyətlə, qanunsuz məskunlaşma cinayət olduğuna görə belə adamlara "qaçqın" statusunun verilməsi haqq və hüquqa ziddir.

N.QAFARZADƏ,

Azərbaycan.-2023.- 29 oktyabr, № 237.- S.6.