Azərbaycan xalqına yeni həyat bəxş edən Prezident

Bu gün Azərbaycan Prezidenti cənab İlham Əliyevin andiçmə mərasiminin baş tutduğu tarixdir və bu tarixə xüsusi önəm verilməsinin kifayət qədər ciddi, obyektiv əsasları mövcuddur.

Ötən 20 il Azərbaycan tarixinin çox önəmli mərhələsidir, çünki Ulu Öndər Heydər Əliyev tərəfindən müəyyənləşdirilmiş unikal inkişaf strategiyası Prezident İlham Əliyev tərəfindən 2003-cü ildən artıq yeni dövrün tələblərinə uyğun yeni elementlərlə zənginləşdirilərək davam etdirilməyə başladı. Bununla da ölkənin həyatında bütün istiqamətlərdə çox ciddi dəyişikliklər müşahidə olundu.

Azərbaycan Prezidenti andiçmə mərasimində vurğulamışdı ki, o, hər bir azərbaycanlının Prezidenti olacaq. Onun fəaliyyətinin mərkəzində Azərbaycan vətəndaşının rifahı dayanır. Həqiqətən də, öncə ölkənin sosial, iqtisadi inkişafını təmin edəcək çox ciddi proqramlar, konsepsiyalar hazırlandı. Azərbaycan Respublikasının regionların sosial-iqtisadi inkişafına dair dövlət proqramlarına start verildi. 2004-cü ildən başlayaraq dövlət proqramlarının icrası sayəsində Azərbaycan regionlarının siması tamamilə dəyişdi.

Artıq dövlət proqramının dördüncüsü həyata keçirilməkdədir. Regionlarda geniş infrastruktur quruculuğu ilə yanaşı, əhalinin məşğulluğunun təmin olunması, sosial rifahının yüksəldilməsi istiqamətlərində çox ciddi keyfiyyət dəyişikliyi müşahidə olundu və bu proses bu gün də davam etməkdədir. Təbii ki, bu, ümumölkə səviyyəsində əhalinin rifah halının yaxşılaşdırılmasını təmin etdi. Azərbaycanda adambaşına düşən ümumdaxili məhsulun həcmi dəfələrlə yüksəldi. Bu da ölkənin inkişaf dinamikasının yüksəkliyini bir daha nümayiş etdirir.

Azərbaycan Prezidenti hər zaman əminliklə vurğulayırdı ki, biz torpaqlarımızı işğaldan azad edəcəyik. Xankəndidə xalqa müraciəti zamanı da dövlət başçısı xatırlatdı ki, ötən illər ərzində keçmiş münaqişə vəziyyətinin dinc vasitələrlə tənzimlənməsini istəyirdi, bu istiqamətdə çalışırdı. Bildirdi ki, müharibədən əvvəl dəfələrlə xəbərdarlıq etmişdi ki, nəticəsiz danışıqları sona qədər davam etdirməyəcəyik, bu danışıqlar nəticə verməsə, hərbi yolla torpaqlarımızı işğaldan azad edəcəyik. Həqiqətən də belə oldu. Ermənistanın destruktiv, qeyri-səmimi davranışları danışıqları tamamilə nəticəsiz etdi. Münaqişənin tənzimlənməsi istiqamətində fəaliyyət göstərməli olan ATƏT-in Minsk qrupu isə sadəcə olaraq imitasiyalarla məşğul oldu, münaqişənin tənzimlənməsinə deyil, idarə olunmasına çalışdı. Təbii ki, belə olan halda biz də bu mənasız prosesi sonsuzluğa qədər davam etdirmək niyyətində olmadığımızı göstərdik. Ermənistanın növbəti təxribatlarının qarşısını almaqla bərabər, torpaqlarımızın işğaldan azad olunması üçün əməliyyatlara başladıq. 44 gün ərzində biz Zəfər qazandıq. Qısa müddətdə ərazilərimizin işğaldan azad edilməsi Azərbaycanın inkişaf edən iqtisadiyyatı ilə yanaşı, hərbi gücünün də göstəricisi oldu.

Cənab İlham Əliyev ötən 20 il ərzində keçmiş münaqişə vəziyyətində Azərbaycanın haqlı mövqeyini dünya ictimaiyyətinin diqqətinə sistemli, ardıcıl şəkildə çatdırırdı və münaqişənin yeganə həll yolunun Azərbaycanın ərazi bütövlüyünün təmin olunmasından keçdiyini əsaslandırırdı və beynəlxalq ictimaiyyətə də bunu qəbul etdirirdi. Obrazlı olsa da, vurğulamaq lazımdır ki, ötən illər ərzində İlham Əliyev torpaqlarımızın ayrı-ayrı mərkəzlərdə siyasi işğaldan azad olunması ilə məşğul idi və uğurlu nəticələr əldə edirdi. Ona görə də 2020-ci ildə torpaqlarımızı hərbi yolla azad edən zaman ölkəmizin üzərinə çox da ciddi olmayan, əhəmiyyətsiz hücumlar oldu. Yəni dövlət başçısı vaxtında preventiv olaraq o hücumları artıq neytrallaşdırmışdı. Çünki çox yaxşı bilirdi ki, Azərbaycana qarşı hər zaman qərəzli mövqe var və haqlı olduğumuz halda bizi haqsız çıxarmaqda maraqlı olan dairələr mövcuddur. Amma cənab İlham Əliyevin uzaqgörən, qabaqlayıcı siyasəti sayəsində mümkün hücumların qarşısı vaxtında alınmışdı. Ona görə də biz torpaqlarımızı öncə siyasi, ardınca isə hərbi yolla işğaldan azad etdik.

2020-ci ildən sonra da Azərbaycan Prezidenti qələbəmizin nəticəsinin dünyada tanıdılması, qəbul etdirilməsi istiqamətində yorulmadan fəaliyyət göstərdi. Qarabağdakı erməni sakinlərə dəfələrlə çağırış etdi ki, onlar reinteqrasiya etsinlər və Azərbaycan vətəndaşı statusunda ölkəmizin ərazisində yaşayan digər xalqların nümayəndələri kimi tam dinc və təhlükəsizlik şəraitində öz mövcudluqlarını davam etdirsinlər. Lakin bunu da ermənilər və Ermənistan, eyni zamanda onları dəstəkləyən kənar dairələr düzgün qiymətləndirə bilmədilər. Azərbaycan ərazisində separatizm təhdidi milli, dövlət təhlükəsizliyimizə çox ciddi təhdid olaraq qalmaqda idi. Belə olan halda 2023-cü il 19-20 sentyabr tarixlərdə 24 saatdan da az çəkən antiterror tədbirlərini həyata keçirməklə ölkəmizin ərazisində separatizmə də son qoyuldu, suverenliyimiz tam bərpa edildi. Bu da Azərbaycan Prezidentinin strateji baxışlarının, diplomatik gücünün bir daha tərənnümü idi. Bir sözlə, 2003-cü ilin 31 oktyabrı, həqiqətən də, Azərbaycan tarixinin çox əlamətdar bir səhifəsini təşkil edir.

Prezident cənab İlham Əliyevin öz səlahiyyətlərinin icrasına başladıqdan sonra atdığı hər bir addım ölkəmizi inkişafa doğru apardı. Hər bir addımı ilə ərazi bütövlüyümüzün təmin olunacağı günə yaxınlaşdırdı və milli dövlət təhlükəsizliyimizə mövcud olan təhdidlərin effektiv aradan qaldırılmasına, suverenliyimizin bütün torpaqlarımız boyunca təmin edilməsinə nail oldu. Beləliklə, Azərbaycan dövlətinə, xalqına yeni bir həyat bəxş etdi.

Elşad MİRBƏŞİROĞLU,

Milli Məclisin deputatı

Azərbaycan.-2023.- 31 oktyabr, № 238.- S.4.