İlham Əliyevin liderliyi ilə qazanılan möhtəşəm nailiyyətlər

Azərbaycan hazırda beynəlxalq münasibətlər sistemində yüksək nüfuza sahib olan dövlətdir. Prezident İlham Əliyevin rəhbərliyi ilə ölkəmiz davamlı olaraq inkişaf edib, güclənib, regionda güc mərkəzinə çevrilib. Bu, 20 il öncə - oktyabrın 15-də keçirilən prezident seçkilərində xalqımızın düzgün seçim edərək, Ulu Öndər Heydər Əliyevin müəyyənləşdirdiyi siyasətin davamına səs verməsinin nəticəsidir.

Ötən 20 il ərzində Prezident İlham Əliyevin Ümummilli Lider Heydər Əliyevin siyasətini uğurla davam etdirməsi nəticəsində Azərbaycan möhtəşəm nailiyyətlər qazanıb. 2003-cü il oktyabrın 31-də keçirilən andiçmə mərasimində çıxışı zamanı cənab İlham Əliyev ölkəmizin gələcək inkişafını Heydər Əliyev siyasətinin davam etdirilməsi ilə əlaqələndirərək bildirmişdi: "…Azərbaycanı qüdrətli dövlətə çevirmək üçün ən başlıcası ölkədə Heydər Əliyevin siyasəti davam etdirilməlidir. Bu gün yüksək kürsüdən çıxış edərkən mən Azərbaycan xalqına söz verirəm ki, bu siyasətə sadiq qalacağam, heç vaxt bu yoldan dönməyəcəyəm, Heydər Əliyevin siyasətini davam etdirəcəyəm".

Cənab Prezidentin 20 illik fəaliyyəti dövründə bütün sahələrdə olduğu kimi, beynəlxalq müstəvidə də uğurlu siyasət həyata keçirilib. Dövlət başçısının rəhbərliyi ilə həyata keçirilən çoxvektorlu xarici siyasət nəticəsində Azərbaycan regionun ən güclü və suveren aktoruna çevrilib. Həyata keçirilən praqmatik xarici siyasət strategiyası ölkəmizə beynəlxalq münasibətlər sistemində müstəqil xarici siyasət həyata keçirən milli dövlət kimi etibarlı strateji tərəfdaş imici qazandırıb.

Ümumiyyətlə, ötən 20 ildə xarici siyasət sahəsində möhtəşəm nailiyyətlərə imza atıldı. Azərbaycan Prezidentinin yürütdüyü uğurlu xarici siyasət nəticəsində ölkəmiz BMT Təhlükəsizlik Şurasının qeyri-daimi üzvü seçildi, dünyada beynəlxalq təşkilatlar Ermənistanı işğalçı dövlət kimi tanıdı. Azərbaycanın 155 dövlətin dəstəyi ilə BMT Təhlükəsizlik Şurasına qeyri-daimi üzv seçilməsi, həmçinin 120 dövlətin təmsil olunduğu Qoşulmama Hərəkatına 2019-2023-cü illərdə sədrlik etməsi müasir Azərbaycanın beynəlxalq miqyasda nüfuzunu və qüdrətini göstərir. Bundan əlavə, neft-qaz sahəsində qazandığı uğurları davam etdirən ölkəmiz Trans-Anadolu və Trans-Adriatik qaz kəmərlərinin çəkilməsinə start verdi. Artıq bu layihələr reallığa çevrilib. Bununla da Avropanın enerji təhlükəsizliyinin təmin olunmasında mühüm rol oynayan Azərbaycan "Cənub qaz dəhlizi" layihəsinin aparıcı qüvvəsi kimi çıxış etməyə başladı. Xəzərin Azərbaycan sektorunda "Azəri", "Çıraq" və "Günəşli" yataqlarının birgə işlənməsi və neft hasilatının pay bölgüsü haqqında yeni sazişin imzalanması ölkəmizin dünya enerji sənayesində həlledici rolu olduğunu bir daha təsdiqlədi. Bakı-Tbilisi-Qars dəmir yolunun açılışı kimi çox böyük tarixi hadisə baş verdi. Asiyanı Avropa ilə birləşdirəcək Bakı-Tbilisi-Qars dəmir yolu xəttinin, Azərbaycan neftini birbaşa dünya bazarına çıxaran Bakı-Tbilisi-Ceyhan neft boru kəmərinin çəkilməsi kimi nəhəng layihələrin icrasına nail olundu.

Təbii ki, Prezident İlham Əliyev dövlət başçısı kimi fəaliyyətə başlayarkən qarşısında dayanan ən mühüm vəzifə Ermənistanın Azərbaycana qarşı işğalçı siyasətinə son qoyulması, ərazi bütövlüyümüzün bərpası idi. 20 il öncə - oktyabrın 31-də cənab İlham Əliyev andiçmə mərasimində çıxışı zamanı bununla bağlı bəyan etmişdi: "Ermənistan-Azərbaycan Dağlıq Qarabağ münaqişəsi ölkəmiz üçün ən ağır problemdir… Bu məsələ öz həllini tapmalıdır. Bu problem yalnız bir neçə prinsiplər, beynəlxalq hüquq normaları əsasında həll oluna bilər: Azərbaycanın torpaqları işğaldan azad olunmalıdır, bir milyondan artıq qaçqın və köçkün öz doğma yurdlarına qayıtmalıdır, ölkəmizin ərazi bütövlüyü bərpa edilməlidir. Azərbaycan heç vaxt bu vəziyyətlə, torpaqlarının işğal altında qalması ilə barışmayacaqdır. Hamı bilməlidir ki, sülh tərəfdarı olmağımıza baxmayaraq, müharibənin yenidən başlanmamasını və bu məsələnin sülh yolu ilə həllini istəməyimizə baxmayaraq, bizim səbrimiz də tükənməz deyildir. Azərbaycan öz doğma torpaqlarını, nəyin bahasına olursa-olsun, azad edəcəkdir".

Artıq torpaqlarımız işğaldan azad olunub, ərazi bütövlüyümüz və suverenliyimiz tam bərpa edilib. Bu, bilavasitə cənab İlham Əliyevin Prezident andına sadiqliyinin nümunəsidir! Təbii ki, Azərbaycanın ərazi bütövlüyünün təmin olunmasında milli maraqlara əsaslanan uğurlu xarici siyasətin müstəsna rolu var. Beynəlxalq miqyasda etibarlı dostluq və tərəfdaşlıq əlaqələrinin formalaşdırılması, Azərbaycanın haqlı və ədalətli mövqeyinin dəstəkləndiyi sənədlərin qəbuluna nail olunması, Azərbaycan həqiqətlərinin təbliğinə yönəlik məqsədyönlü kampaniyaların və genişmiqyaslı layihələrin həyata keçirilməsi ölkəmizin mövqeyinin möhkəmlənməsinə şərait yaratmış və təsir imkanlarımız artmışdır. 2020-ci il sentyabrın 27-də işğalçı Ermənistanın təcavüzkar silahlı qüvvələrinin növbəti təxribatına Azərbaycan Ordusunun əks-hücum əməliyyatı keçirərək layiqli cavab verməsi ilə başlanan 44 günlük Vətən müharibəsində ölkəmizin tarixi Qələbəsi isə torpaqlarımızın azad edilməsi uğrunda çoxillik fəaliyyətin qanunauyğun nəticəsi oldu. Prezident İlham Əliyevin prinsipial mövqeyi nəticəsində bu il sentyabrın 19-da Azərbaycanın Qarabağ bölgəsində 23 saatlıq lokal antiterror əməliyyatı isə suverenliyi, ölkəmizin Konstitusiya quruluşunun tam bərpasını təmin etdi, respublika ərazisində separatizmə birdəfəlik son qoyuldu.

Əlbəttə, bu Zəfər böyük tarixi və siyasi məzmuna malikdir. Çünki ilk növbədə Azərbaycan işğal faktına, separatizmə öz milli gücü ilə, hərbi-siyasi resursları vasitəsilə son qoydu, BMT-nin 1993-cü ildə qəbul edilmiş, amma kağız üzərində qalmış qətnamələrinin icrasını təmin etdi. Yəni biz həm tarixi ədalətin, həm də beynəlxalq hüququn bərpasına müvəffəq olmuşuq. Hazırda Azərbaycan regionda yeni geostrateji reallıqlar yaradıb ki, bu da nəinki Cənubi Qafqazda, hətta daha geniş coğrafiyada yeni təhlükəsizlik mühitinin və əməkdaşlıq imkanlarının formalaşması deməkdir. Azərbayan xalqı əmindir ki, Prezident İlham Əliyevin liderliyi ilə müstəqil dövlətimiz bundan sonra da yeni-yeni zəfərlərə imza atacaq!

Sevinc FƏTƏLİYEVA,

Milli Məclisin Beynəlxalq münasibətlər və parlamentlərarası əlaqələr komitəsinin sədr müavini

Azərbaycan.-2023.- 31 oktyabr, № 238.- S.5.