Yeni reallıqlar yaradan Ali Baş Komandan

Bu gün Azərbaycan Prezidenti cənab İlham Əliyevin bu ali vəzifəyə seçiləndən sonra ilk andiçmə mərasiminin keçirilməsinin 20 ili tamam olur.

Birmənalı olaraq deyə bilərəm ki, Azərbaycan Prezidentinin bu dövr ərzində gördüyü işlərin zirvəsində ərazi bütövlüyümüzün bərpası ilə nəticələnmiş Vətən müharibəsində qazanılan Zəfər dayanır.

44 günlük İkinci Qarabağ savaşında ərazilərimizin əhəmiyyətli hissəsinin işğaldan azad edilməsinə nail olmuşduqsa, bu il aprelin 23-də Laçın istiqamətində yerləşən Azərbaycan-Ermənistan sərhədində nəzarət-buraxılış məntəqəsini qurmaqla sərhəd bütövlüyümüz, sentyabrın 19-da isə birgünlük lokal antiterror tədbirləri nəticəsində bütün ərazilərimizdə suverenliyimiz tam bərpa olundu. Bununla da nəticə etibarilə regionda yeni reallıqlar yarandı.

Ötən dövrdə Azərbaycan beynəlxalq müstəvidə də öz mövqelərini möhkəmləndirməyə nail olub. Siyasi, iqtisadi və strateji baxımdan böyük əhəmiyyətə malik beynəlxalq nəqliyyat dəhlizlərində fəal iştirak etməklə, ölkəmiz eyni zamanda bütövlükdə Avrasiya məkanında mühüm tranzit və logistika mərkəzlərindən birinə çevrilib. Bu gün regionda reallaşdırılan bütün beynəlxalq və irimiqyaslı layihələr Azərbaycanın iştirakı və milli maraqlarımız nəzərə alınmaqla həyata keçirilir. Azərbaycan siyasi, iqtisadi və strateji baxımdan böyük əhəmiyyətə malik beynəlxalq nəqliyyat dəhlizlərində fəal iştirak edir, Avrasiya məkanında mühüm tranzit və logistika mərkəzlərindən biri kimi tanınır.

Hazırda işğaldan azad olunmuş ərazilərimizdə genişmiqyaslı bərpa-quruculuq işləri həyata keçirilir. Hesab edirik ki, yeni reallıqlar kontekstində ölkədə idarəetmə sahəsində islahatlar davam edəcək. İndi demokratik təsisatların daha da inkişaf etdirilməsi zərurəti yaranıb.

Bu gün Azərbaycan Prezidenti cənab İlham Əliyevi Ali Baş Komandan olaraq imza atdığı möhtəşəm nailiyyətlərlə bir daha təbrik etməklə yanaşı, qarşıda duran digər məsələlərin həllində də ona eyni uğurlara nail olmağı arzulayıram.

Arzuxan ƏLİZADƏ,

Azərbaycan Milli İstiqlal Partiyasının sədri

Azərbaycan.-2023.- 31 oktyabr, № 238.- S.6.