Azərbaycanın qələbələrinin təməlində İlham Əliyevin imzası dayanır

Prezident İlham Əliyevin 2003-cü ildə keçirilən andiçmə mərasimindəki çıxışı hər kəsin yaxşı yadındadır. "Azərbaycan beynəlxalq aləmdə, dünya miqyasında daha da möhkəm mövqelərə sahib olacaqdır. Azərbaycanın torpaqları işğaldan azad olunmalıdır, bir milyondan artıq qaçqın və köçkün öz doğma yurdlarına qayıtmalıdır, ölkəmizin ərazi bütövlüyü bərpa edilməlidir. Azərbaycan heç vaxt bu vəziyyətlə, torpaqlarının işğal altında qalması ilə barışmayacaqdır. Hamı bilməlidir ki, sülh tərəfdarı olmağımıza baxmayaraq, müharibənin yenidən başlanmamasını və bu məsələnin sülh yolu ilə həllini istəməyimizə baxmayaraq, bizim səbrimiz də tükənməz deyildir. Azərbaycan öz doğma torpaqlarını, nəyin bahasına olursa-olsun, azad edəcəkdir", - deyə Prezident İlham Əliyev öz çıxışında bəyan etmişdi.

Tarix sübut etdi ki, ötən illər ərzində Azərbaycan Prezidenti "sözüm imzamdır" prinsipinə əsaslanaraq xalqa verdiyi bütün vədləri yerinə yetirdi.

2003-cü ildə İlham Əliyevin Azərbaycan xalqının böyük dəstəyini və etimadını qazanaraq Prezident seçilməsi ilə ölkəmizin həyatında yeni inkişaf mərhələsinin başlanğıcı qoyuldu. Prezident İlham Əliyev 20 illik siyasi hakimiyyəti dövründə Azərbaycanı inamla irəliyə, qələbəyə aparmağı bacardı.

Bu gün Azərbaycanın əldə etdiyi uğurların, qələbələrin təməlində Prezident İlham Əliyevin imzası dayanır. Ali Baş Komandanın qüdrətli sərkərdəliyi ilə 2020-ci ildə Azərbaycan haqq savaşında tarixi Zəfər qazandı. Dünya hərb tarixində xüsusi yer tutan bu müharibə Prezident İlham Əliyevin daha bir keyfiyyətini - sərkərdəlik məharətini üzə çıxardı. Azərbaycanın qazandığı tarixi zəfər, torpaqlarımızın 30 illik işğalına son qoyulması, hazırda azad edilmiş ərazilərimizdə aparılan bərpa-quruculuq işləri bütün dünya üçün örnək təşkil edir.

Prezident İlham Əliyevin rəhbərliyi altında Azərbaycan iqtisadiyyatı uğurla inkişaf edir, Qarabağda bərpa-quruculuq işləri tam gücü ilə davam edir və sosial proqramlar həyata keçirilir, ən əsası isə Böyük qayıdış başlayıb. Hazırkı proseslər onu deməyə əsas verir ki, tezliklə öz ata-baba yurdlarından didərgin düşmüş keçmiş məcburi köçkünlər hamılıqla cənnət Qarabağa, öz evlərinə əbədi qayıdacaqlar.

Bu il keçirilən uğurlu antiterror əməliyyatlarından sonra Azərbaycanın suverenliyi tam təmin edildi, torpaqlarımızda separatizmin kökü kəsildi. On illər boyu xalqımıza qarşı qatı cinayətlər törətmiş canilərin bir-bir cinayət məsuliyyətinə cəlb olunduqlarının şahidi oluruq. Prezident İlham Əliyev Azərbaycan xalqına qarşı cinayətlər törətmiş şəxslərin cəzasız qalmayacağına söz vermişdi. Bu gün tariximizin acı səhifəsini qələbə salnaməsi ilə bağladıqdan sonra cinayətkarların bir-bir mühakimə kürsüsünə əyləşməsi ədalətin zəfəridir və bir daha göstərir ki, Prezident İlham Əliyev "nəyin nə vaxt, necə etmək" lazım olduğunu bilir.

Ötən dövr Azərbaycanda bütün sahələrin inkişaf etməsi ölkəmizin bölgədə və dünyada mövqeyinin güclənməsi ilə müşayiət olunub. Prezident İlham Əliyevin yürütdüyü siyasət Azərbaycanın müttəfiqlərinin və dostlarının sayını artırıb. Beynəlxalq aləmdə Prezident İlham Əliyevin sözünün imzası qədər güclü olduğu qəbul edilir və hörmətlə qarşılanır.

Prezident İlham Əliyevin düşünülmüş və məqsədyönlü siyasəti nəticəsində bu gün Azərbaycan qlobal proseslərin mənfi təsirindən minimum itkilərlə çıxan azsaylı ölkələrdən biridir. Azərbaycan beynəlxalq əhəmiyyətli strateji, enerji, nəqliyyat, logistika və kommunikasiya qovşağına, investorların maraq mərkəzinə çevrilmişdir.

Qalib xalqın Qalib Prezidenti, Müzəffər Ali Baş Komandanı İlham Əliyevin rəhbərliyi ilə ölkəmiz qarşısında daha geniş üfüqlər açılır.

Prezident İlham Əliyev uzun illər davam edən münaqişəyə, ədalətsizliyə "dəmir yumruq"la son nöqtəni qoydu. Prezident İlham Əliyev Qarabağı və Şərqi Zəngəzuru cənnətə çevirdiyi kimi, Xankəndi, Ağdərə, Xocavənd, Xocalı, Əsgəranın da simasının dəyişəcəyi gün yaxındadır.

Hakimiyyətinin ilk günündən xalqın səmimi məhəbbətini və etimadını qazanan Prezident İlham Əliyev Azərbaycanın daha işıqlı gələcəyi üçün var gücü ilə çalışır. Azərbaycan Liderinin dəmir iradəsi ilə bundan sonra fəth edəcəyimiz zirvələr isə ölkəmizi daha da qüdrətli edəcək.

Sevil MİKAYILOVA,

Milli Məclisin deputatı

Azərbaycan.-2023.- 31 oktyabr, № 238.- S.6.