Astarada şəhid polkovnik-leytenant Nail Orucovun ailəsi ziyarət olunub

Rəqəmsal inkişaf və nəqliyyat naziri Rəşad Nəbiyev vətəndaşların qəbulu ilə əlaqədar Astara rayonuna səfəri çərçivəsində şəhid polkovnik-leytenant Orucov Nail Rəfail oğlunun ailə üzvləri ilə görüşüb.

Nazirlikdən AZƏRTAC-a bildiriblər ki, görüşdə yaxınları şəhidlə bağlı xatirələrini bölüşüb, onun keçdiyi şərəfli döyüş yolundan danışıblar.

Qeyd edək ki, polkovnik-leytenant Nail Orucov Azərbaycan Respublikası Müdafiə Nazirliyinin tabeliyindəki hərbi hissələrdə müxtəlif vəzifələrdə çalışıb. Ehtiyata buraxıldıqdan sonra "Aztelekom" MMC-nin Astara Telekommunikasiya Qovşağında işləyib.

Vətən müharibəsi zamanı - sentyabrın 29-da döyüş bölgəsinə yollanıb. Oktyabrın 31-də Qubadlı rayonu uğrunda döyüşlərdə qəhrəmancasına şəhid olub.

Nail Orucov ölümündən sonra "Azərbaycan Bayrağı" ordeni, "Vətən uğrunda", "Qubadlının azad olunmasına görə" medalları ilə təltif edilib.

Azərbaycan.-2023.- 13 sentyabr.- S.10.