Boz zona tezliklə quruculuq məkanına çevriləcək

Azərbaycan öz ərazisində erməni separatizminin mövcudluğuna imkan verməyəcək

44 günlük Vətən müharibəsində erməni faşizmini məhvə məhkum edən Azərbaycanın postmüharibə dövründə milli maraqlarının təmin olunması istiqamətində həm siyasi, diplomatik, həm də hüquqi baxımdan ardıcıl və qətiyyətli addımlar atması bir daha dünyaya nümayiş etdirdi ki, ölkəmiz heç zaman öz ərazisində erməni separatizminin kök salmasına imkan verməyəcək.

Azərbaycanın suveren ərazilərində ikinci erməni dövləti qurmaq kimi sərsəm xülyalar quran təcavüzkar Ermənistanın da, xəstə ideologiyalı erməni lobbisinin də, bəzi qərəzli xarici ölkə və təşkilatların da ölkəmizə "humanitar" təzyiqlər göstərərək torpaqlarımızda "boz zona" yaratmaq kimi çirkin planları gözlərində qalacaq.

Qarabağ məsələsi birdəfəlik həll olunub

2020-ci il noyabrın 8-də Şuşa zəfəri ilə Qarabağ məsələsini birdəfəlik həll edən ölkəmiz 2023-cü il aprelin 23-də Laçında sərhəd-buraxılış məntəqəsi qurmaqla suveren ərazilərinin bütövlüyünə tam nail oldu.

Qarabağın Azərbaycan ərazisi olması həqiqətinə həm işğal dövründə, həm də ondan sonrakı dövrdə dünya şahidlik etdi.

Belə olmasa idi, BMT TŞ 1992-ci ildə Ermənistanın işğal etdiyi Azərbaycan torpaqlarını qeyd-şərtsiz tərk etməsi ilə bağlı 4 qətnamə qəbul etməzdi...

2023-cü ildə Beynəlxalq Ədalət Məhkəməsi Laçın yolunda sərhəd-buraxılış məntəqəsi qurmasını Azərbaycanın qanuni haqqı olduğunu təsdiqləməzdi...

O da məlumdur ki, "Qarabağ Azərbaycandır" gerçəyi Ermənistanın baş naziri Nikol Paşinyan tərəfindən sülh prosesi çərçivəsində keçirilən üçtərəfli görüşlərdə dəfələrlə etiraf edilib...

Ermənistan Azərbaycana qarşı ərazi iddiasından əl çəkməlidir

Bütün bu faktlara baxmayaraq, Ermənistan hələ də öz silahlı tör-töküntülərini Rusiya sülhməramlılarının müvəqqəti yerləşdiyi Qarabağ ərazisindən çıxarmayıb və 44 günlük müharibənin üzərindən ötən müddətdə separatçı rejimə açıq dəstək verib.

2023-cü il aprelin 23-nə qədər Laçın yolundan hərbi xuntaya silah-sursat daşımaq, Azərbaycana qarşı təxribatlar törətmək üçün istifadə edən Ermənistanın bu tarixdən etibarən Azərbaycanın həmin yolda sərhəd-buraxılış məntəqəsi qurması nəticəsində, sözün əsl mənasında, əl-qolu bağlandı.

Azərbaycanın Laçın yoluna alternativ olaraq Xankəndi-Ağdam yolunu təklif etməsi, Rusiya Qırmızı Xaç Cəmiyyəti tərəfindən göndərilən yük avtomobilinin Azərbaycanla əlaqələndirilmiş şəkildə məhz Ağdam-Xankəndi yolu ilə keçməsi və Qarabağın erməniəsilli sakinlərinə humanitar yüklərin çatdırılması isə Ermənistanın dünyaya göstərdiyi "aclıq şousu"na son qoydu.

Ümumiyyətlə, Azərbaycan dövləti Qarabağda yaşayan erməni sakinlərin reinteqrasiyası ilə bağlı ardıcıl və əməli addımlar atır.

Lakin Ermənistan təcavüzkar siyasət yürütməsindən hələ də əl çəkmək niyyətində deyil və bu yaxınlarda Qarabağda keçirilən qondarma seçkiləri dəstəklədiyini açıq dilə gətirməsi ilə İrəvan Azərbaycana qarşı ərazi iddiasından əl çəkmədiyini isbat etdi. Ermənistan bu siyasətinə son qoymalıdır. Əks təqdirdə bu, ona baha başa gələcək.

Erməni sakinlər xuntanın girovluğundadır

Ermənistan bəzi beynəlxalq dəstəkçilərinə güvənərək Azərbaycan ərazilərində "boz zona" yaratmaq kimi çirkin plan qurur.

Bu terminin mənası qanunsuz və separatçı silahlı dəstələrin, mərkəzi hakimiyyətə tabe olmayan qüvvələrin, terror qruplaşmalarının fəaliyyət göstərdikləri ərazilər, dövlətin nəzarətindən kənar yerlər deməkdir.

"Boz zona"da nə dövlətin qanunları, nə də beynəlxalq hüquq işləmir və belə yerlər terrorçuluğun, separatçılığın, qlobal narkoticarətin, silah və insan qaçaqmalçılığının tüğyan etdiyi məkan hesab olunur.

Nə yazıq ki, Rusiya sülhməramlılarının müvəqqəti yerləşdiyi Azərbaycanın Qarabağ bölgəsi də "boz zona"ya çevrilib. Erməni separatizminin at oynatdığı bu ərazidə hərbi xuntaçılar sadə sakinləri əllərində girov kimi saxlayıblar və onlardan qara əməlləri üçün sui-istifadə edirlər. Separatçılar qanunların işləmədiyi bu ərazidən çirkin məqsədləri üçün istifadə edirlər.

Onu da vurğulayaq ki, işğal ərəfəsində Ermənistan tərəfindən torpaqlarımızın 20 faizi "boz zona"ya çevrilmiş, bir həyat nişanəsi belə qoymadıqları bu yerlərdə haylar hər cür qanunsuz əməllərlə məşğul olmuşdular.

44 günlük müharibədə Azərbaycanın torpaqlarını işğaldan azad etməsi Qarabağ və Şərqi Zəngəzuru "boz zona" olmaqdan xilas etdi. İndi başdan-başa yaşıllaşan bu yerlər həyatın dirçəliş ünvanına çevrilib.

"Boz zona"da status-kvonu saxlamaq səmərəsiz strategiyadır

Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev sentyabrın 13-də "X" sosial şəbəkəsində bununla bağlı yazıb ki, "Biz sentyabrın 1-də Azərbaycan Prezidenti İlham Əliyevlə ABŞ Dövlət katibi Entoni Blinken arasında telefon danışığı zamanı razılaşdırıldığı kimi, Beynəlxalq Qırmızı Xaç Komitəsinin (BQXK) yük maşınları üçün Ağdam-Xankəndi və Laçın-Xankəndi yollarının sürətlə və eyni vaxtda açılmasını təmin etmək üçün BQXK ilə işi davam etdiririk.

Prezidentin köməkçisi qeyd edib ki, həmin vaxtdan 12 gün keçsə də, Ermənistanın tabeliyində olan qeyri-qanuni rejim yolları açmaqdan imtina edir: "Biz beynəlxalq tərəfdaşlarımızı səylərini ikiqat artırmağa, Ermənistana və onun qeyri-qanuni marionet rejiminə bu destruktiv siyasətə son qoymaq üçün təzyiq göstərməyə çağırırıq. "Boz zona"da status-kvonu saxlamaq və humanitar məsələləri qəsdən silaha çevirmək onların səmərəsiz strategiyasıdır".

Göründüyü kimi, Ermənistanın hazırkı mənfur niyyəti Rusiya sülhməramlı qüvvələrinin müvəqqəti yerləşdiyi Qarabağ bölgəsində separatizmə dəstək verməkdir.

Lakin Azərbaycan Ermənistan və onun qondarma rejiminə heç zaman imkan verməyəcək ki, beynəlxalq hüquqla tanınan ərazisində "boz zona" yaratsın. Dövlətimiz bununla bağlı istənilən fəaliyyətin qarşısını qətiyyətlə alacaq.

Yasəmən MUSAYEVA,

Azərbaycan.-2023.- 15 sentyabr.- S.5.