Azərbaycan vətəndaşı olmaq ən şərəfli statusdur

Qarabağda revanşistlər tərəfindən yaradılan "boz zona" aradan qaldırılır

Azərbaycanın çoxillik Qarabağ münaqişəsi dövründə regionda sülhün və sabitliyin bərpası və davamlılığı üçün səylə çalışdığına, bundan ötrü mümkün olan bütün diplomatik vasitələrdən, beynəlxalq təşkilatların və vasitəçilik imkanlarından istifadə etdiyinə bütün dünya şahidlik edirdi.

Amma hər dəfə də bunun əksini görürdük. Torpaqlarımızda məskən salan separatçılar və onları dəstəkləyən Ermənistan məkrindən, ərazi iddialarından əl çəkmirdi. Müxtəlif bəhanələrlə sülh danışıqlarını pozub siyasi manipulyasiya edirdi. Üzərinə götürdüyü öhdəlikləri nümayişkaranə şəkildə yerinə yetirmirdi. Silahlanmaya, revanş götürməyə güc verirdi, əməlləri ilə sülhə əngəl olmağa çalışırdı.

Minalanmış ərazilərin düzgün xəritəsini vermək əvəzinə yenidən ərazilərimizə minalar basdırırdı. Azərbaycan səbir, təmkin göstərdikcə Ermənistanda olan revanşistlər və onların xaricdə yaşayan havadarları daha da azğınlaşırdılar. Ölkəmizin birgəyaşayış, reinteqrasiya təkliflərinə separatçıların pul dağarcığı Ruben Vardanyan "vuruşub, son nəfərimizə kimi ölərik, amma sizinlə yaşamarıq" kimi sərsəmləmələrlə cavab verirdilər. Azərbaycanı yenidən müharibəyə cəlb etmək üçün onlara humanitar məqsədlər üçün verilmiş Laçın yolu ilə sərvətimizi talan edərək Ermənistana daşıdılar, eyni zamanda həmin yolla Hindistandan və digər ölkələrdən aldıqları silahları Qarabağa ötürərək qanunlarımızı heçə saydılar.

Bu gün də Ermənistanın hərbi-siyasi rəhbərliyi ölkəmizdə olan silahlı birləşmələrinin tör-töküntülərini, silahı yerə qoymaları barədə əmr vermək, çağırış etmək əvəzinə riyakarlıq edir, bütün dünyanın qarşısında bəyan edir ki, Qarbağda Ermənistanın silahlı qüvvələri yoxdur. Baş verən hadisələrin məsuliyyətini hiyləgərcəsinə boyunlarından atmağa çalışırlar. Təbii ki, Ermənistan rəhbərliyinin məqsədli şəkildə beynəlxalq ictimayyəti aldatmağa yönlənmiş bu yalan haqlı olaraq sual yaradır: əgər Qarabağda olan qanunsuz silahlı birləşmələrin bu ölkəyə aidiyyəti yoxdursa, niyə Ermənistanın dövlət büdcəsindən maliyyələşir? Yaxud, hərbi qulluqçuların komandanlığı nədən Ermənistanın baş qərargahı tərəfindən koordinasiya edilir? Eyni zamanda bu ölkənin məhkəmələri nə əsasla 44 günlük Vətən müharibəsində "vəzifə"lərini yerinə yetirməyən Qarabağ komandirlərini mühakimə edirlər? 2020-ci ilin 44 günlük Vətən müharibəsində fərarilik edən 13 min əsgər və zabit hansı ölkənin vətəndaşı idi?

Ümumiyyətlə, Qarabağda baş verən bütün özbaşınalıqların, qanunsuzluğun, separatçılıq hərəkatının, tökülən qanların günahkarı Ermənistandır, separatçıların rəhbərləridir, onları bu işə vadar edənlərdir. Bu gün Azərbaycanı Qarabağda antiterror tədbirləri keçirməyə də bu ölkənin üzərinə götürdüyü öhdəliyi yerinə yetirməməsi, sözünün üstündə durmaması, ölkəmizə qarşı ərazi iddialarından əl çəkməməsi vadar etdi.

Son bir neçə ayda Azərbaycanın Qarabağ bölgəsindəki Ermənistan silahlı qüvvələrinin birləşmələri tərəfindən Azərbaycan Ordusunun mövqeləri müxtəlif çaplı silahlardan sistemli şəkildə atəşə tutulurdu. Bu ölkə müxtəlif yollarla ərazilərimizin minalanmasını davam etdirirdi. Sülh danışıqlarını müxtəlif bəhanələrlə pozub döyüş mövqelərini, mühəndis qurğularını təkmilləşdirməyə, eləcə də səngər və sığınacaqların sayının artırılmasına çalışırdı.

Döyüş mövqelərinin şəxsi heyət, zirehli texnika, artilleriya qurğuları və digər atəş vasitələri ilə gücləndirilməsi, bölmələrin yüksək döyüşə hazırolma səviyyəsinə gətirilməsi, səfərbərlik üzrə əlavə bölmələrin yaradılması, ordumuzun bölmələrinə qarşı kəşfiyyat fəaliyyətlərinin genişləndirilməsi, mövqelərimizin dərinliyinə sızaraq minalardan təmizlənmiş ərazilərin və mülki təyinatlı yolların terror-təxribat məqsədilə yenidən minalanması kimi əməlləri Ermənistanın yeni müharibə hazırlığında olduğunu sübut edirdi. Bunlar azmış kimi, Azərbaycanın ciddi xəbərdarlıqlarına baxmayaraq, separatçılar gərginliyi artırmaq məqsədilə təxribat və terror əməllərini daha da artırırdı. Konstitusiyamıza məhəl qoymadan qondarma separatçı rejimə "seçki" keçirdilər. Siyasi təxribatların davamı sentyabrın 19-da Ermənistan silahlı qüvvələrinin Azərbaycanın Qarabağ bölgəsindəki birləşmələrinin kəşfiyyat-diversiya qrupları tərəfindən Əhmədbəyli-Füzuli-Şuşa avtomobil yolunda terror məqsədilə əvvəlcədən quraşdırılmış minanın partlaması ilə tamamlandı. Erməni diversiya qrupunun terror aktı nəticəsində Azərbaycan Avtomobil Yolları Dövlət Agentliyinə məxsus nəqliyyat vasitəsi sıradan çıxdı və mülki şəxslər həlak oldular. Həmin gün Daxili İşlər Nazirliyinin Daxili Qoşunlarının hərbi qulluqçularını daşıyan nəqliyyat vasitəsi də Ermənistan silahlı qüvvələrinin kəşfiyyat-diversiya qrupları tərəfindən quraşdırılmış minaya düşməsi nəticəsində hərbçilərimizin bəziləri həlak oldu, yaralandı. Azərbaycan hadisələrin bu cür davam etməsinə sona kimi dözmək niyyətində olmadığını əvvəlcədən bəyan etmişdi. Əlbəttə ki, hadisələrə seyirçi qala bilməzdi. Qalmadı da! Sentyabrın 19-da 30 il torpaqlarımızda qanlar tökmüş separatçı rejimin silahlı dəstələrinə qarşı lokal antiterror tədbirlərinə başladı. Hadisələri izləyən bütün dünya gördü ki, Azərbaycan tərəfi yüksək insani kefiyyətlərə sadiq qaldığını nümayiş etdirərək yalnız legitim hərbi hədəfləri vurur. Mülki əhalinin təhlükəsizliyi üçün bütün zəruri olan tədbirləri həyata keçirdi. Qocaların, uşaqların, xəstələrin təxliyəsi üçün məntəqələr yaradıb onlara qarşı heç bir zorakılıq edilməyəcəyi barədə səsgücləndiricilərlə məlumat verdi, ehtiyacı olanlara tibbi yardım göstəriləcəyini bildirdi. Azərbaycanın məqsədi öz ərazilərində Konstitusiyanın və qanunçuluğun bərpası, sülhün davamlılığını təmin etmək idi. Buna da illərdir Ermənistanın ərazilərimizdə saxladığı silahlı terrorçular mane olurdular. Separatçılar məkrli niyyətlərinə çatmaqdan ötrü hətta öz millətlərindən olan sadə, mülki şəxslərə belə zor işlətməkdən, qorxu altında saxlamaqdan çəkinmirdilər.

Lokal antiterror tədbirləri keçirilən zaman hadisələri izləyən bütün beynəlxalq təşkilatlar, dövlətlər Azərbaycanın problemin sülh yolu ilə həllində maraqlı olduğunu bir daha gördülər. Ölkəmiz separatçı rejimin qanunsuz silahlılarına müraciət edərək silahı yerə qoyub qanunlarımıza əməl etməyi, müqavimət göstərməməyə, danışıqlar üçün əvvəlcədən nəzərdə tutulduğu Yevlax şəhərinə gəlməyi təklif etdi...

Bir məsələyə də toxunaq. Bu günlərdə Qarabağdakı ermənilər hiss etdilər ki, onları qızışdırıb illərdir qanlı qırğın törətməyə məcbur edənlər, yalan vədlər verib hakimiyyətə, var-dövlətə sahib olanlar hamısı dar məqamda qaçdılar. Anladılar ki, şərtləri diktə edən də, haqq da, ədalət də, qanun da, onların nicatı da Azərbaycandadır və onlara ən doğru yolu göstərən də Azərbaycan olacaq.

Nəhayət, dünən Azərbaycanın Qarabağ iqtisadi rayonunda yerləşən Ermənistan silahlı qüvvələrinin tör-töküntüləri müqavimətin mənasız olduğunu dərk edərək silahı yerə qoyaraq təslim oldular. Müdafiə Nazirliyinin məlumatında bildirilir ki, qeyri-qanuni erməni silahlı dəstələri silahı yerə qoyur, döyüş mövqelərindən, hərbi postlardan çıxır və tam şəkildə tərk-silah olunurlar. Ermənistan silahlı qüvvələrinin birləşmələri Azərbaycan ərazilərini tərk edir, qeyri-qanuni erməni silahlı dəstələri buraxılır.

Bununla da petrosyanların, koçaryanların, sarkisyanların, paşinyanların yurdumuza gətirdiyi qanlı fəlakətlərin, faciələrin qarşısını İlham Əliyev gərgin əməyi, dərin zəkası, qətiyyəti və bənzərsiz siyasi qabiliyyəti ilə aldı. Bundan sonra ermənilər də anlamalıdırlar ki, ən düzgün variant Azərbaycan qanunlarına əməl edib, ölkəmizin Konstitusiyasının şərtlərinə uyğun yaşamaqdır. Onlar üçün ən böyük status isə elə Azərbaycan vətəndaşları olmalarıdır.

Elşən QƏNİYEV,

Azərbaycan.-2023.- 21 sentyabr.- S.8.