Dünya Azərbaycan humanizminə şahidlik edir

Qarabağdakı erməni sakinlərə hərtərəfli yardımlar göstərilir

Sentyabrın 21-də Yevlaxda Azərbaycan mərkəzi hakimiyyəti və Qarabağ bölgəsinin erməni sakinlərinin nümayəndələrinin görüşü zamanı ölkə rəhbərliyinə edilən yardım xahişi ilə bağlı tədbirlər davam etdirilir.

Həmin görüşdə ermənilərin bağça və məktəblərinin istilik sistemlərinin, təcili tibbi yardım və yanğınsöndürmə xidmətlərinin yanacağa, həmçinin qida məhsulları olmaqla, humanitar yardıma ehtiyac olduğu bildirilmişdi.

Görüşdən sonra mərkəzi hakimiyyət Fövqəladə Hallar Nazirliyi tərəfindən Azərbaycanın Qarabağ bölgəsində yaşayan erməni sakinlərin ehtiyaclarının təmin olunması üçün humanitar məqsədlə ərzaq yükünün göndərilməsini qərara aldı. Bir gün sonra içərisində müxtəlif ərzaq məhsulları və gigiyenik vasitələr olan 20 tonluq 2 yük avtomobili və 2 çörək dolu avtomobil Xankəndiyə yola salındı. Humanitar yardım Ağdam-Xankəndi yolu ilə ünvana çatdırılaraq əhaliyə paylanıldı.

Bundan başqa, Azərbaycanın Qarabağ bölgəsində yaşayan erməni sakinlərin nümayəndələrinin bağçaların, təcili tibbi yardım və yanğınsöndürmə xidmətlərinin yanacaq-sürtkü materialları ilə təmin edilməsi xahişinə uyğun olaraq, sentyabrın 23-də Bərdə-Ağdam-Əsgəran-Xankəndi yolu vasitəsilə SOCAR-ın yanacaqla dolu 2 avtomobili Xankəndiyə göndərildi. Bununla da ermənilərə 24 ton benzin, 40 ton dizel çatdırıldı.

Eyni zamanda görüşdə müzakirə edilən məsələlərin həlli istiqamətində təxirəsalınmaz işlərin davamı kimi Xankəndi şəhərinin Ermənistanın enerji sistemindən ayrılaraq Azərbaycanın enerji sisteminə qoşulması da təmin edildi.

Azərbaycan erməni sakinlərinə müxtəlif xarakterli yardımlarını davam etdirir

Milli Məclisin deputatı Elşad Mirbəşiroğlu qəzetimizə açıqlamasında deyib ki, Azərbaycan hər zaman humanist dəyərlərə sadiqlik nümayiş etdirməsi ilə seçilən dövlət olub. Artıq beynəlxalq ictimai şüurda Azərbaycanın bu obrazı kifayət qədər özünü tanıdıb: "Hər zaman vurğulanıb ki, ərazilərimizdəki ermənilər qanunlarımıza tabe olub Azərbaycan vətəndaşı statusunda dinc, təhlükəsizlik şəraitində mövcudluqlarını davam etdirə bilərlər. Eyni zamanda sadə ermənilərdə belə bir təsəvvür var idi ki, onlar Azərbaycan vətəndaşları statusunda daha yaxşı həyata qovuşa bilərlər. Azərbaycan Qarabağda konstitusion quruluşunu bərpa etdikdən sonra ermənilərin vəziyyəti dövlətimizin mövqelərinə uyğun müəyyənləşməlidir. Bu vəziyyət Prezident İlham Əliyevin də səsləndirdiyi kimi pasport yoxlanışından keçir. Yəni onlar Azərbaycan vətəndaşları statusunda ərazilərimizdə digər xalqların nümayəndələri kimi tam təhlükəsizlik şəraitində, konstitusion hüquqlara sahib olmaqla həyatlarını davam etdirə bilərlər".

Deputatın fikrincə, Azərbaycan ərazisindəki bütün əhali qruplarının sosial-iqtisadi vəziyyətinə xüsusi diqqət yetirir. Azərbaycan ərazisində yaşayan ermənilərin də heç bir humanitar problemi olmayacaq. Əslində, erməni vətəndaşlarımızın humanitar problemlərinin elementlərini separatçılar və Ermənistan tərəfi məqsədli şəkildə yaradırdı ki, Azərbaycana qarşı qərəzli siyasi mövqe formalaşdırsınlar.

Azərbaycan Laçın yolunda nəzarət-keçid məntəqəsi qurmaqla separatçıların silahlandırılmasının qarşısını aldı, bununla da təhlükəsizliyinə olan təhdidin miqyasını daraltdı. Azərbaycanın icazəsi olmadan ölkəmizin ərazi bütövlüyünü pozaraq yük maşınlarının Ermənistan tərəfindən Xankəndiyə istiqamətləndirilməsi yolverilməz idi və buna imkan verilmədi. İstər Ermənistan hakimiyyəti, istərsə də Fransa tərəfindən yüklərin özbaşına ərazilərimizə göndərilməsinin qarşısı alındı. Bu, həm də o anlama gəldi ki, hər kəs Azərbaycanın ərazi bütövlüyünə hörmət etməyə məcburdur.

Azərbaycan yüklərin daşınması üçün Ağdam-Xankəndi marşrutunu təklif etdi. Həmin dövrdə ermənilərin həqiqətən humanitar yardıma ehtiyacları var idisə, təklif edilən istənilən marşrutla razılaşmalı idilər. Lakin ilk günlər onlar bu təklifləri qəbul etmədilər.

E.Mirbəşiroğlu qeyd edib ki, BMT Təhlükəsizlik Şurasında Laçın yolu ətrafında müzakirələr aparıldı, lakin Ağdam-Xankəndi marşrutu haqqında söz açılmadı: "Burada siyasi riyakarlıq, spekulyasiyalar özünü aydın göstərdi. Yekunda Azərbaycanın iradəsi qalib gəldi, Ağdam-Xankəndi yolu ilə Xankəndiyə humanitar yüklərin çatdırılması təmin edildi".

Deputat deyib ki, lokal xarakterli antiterror tədbirlərindən sonra da Azərbaycan ərazilərimizdəki erməni sakinlərə müxtəlif xarakterli yardımlarını davam etdirir. Xəstələrin, yaralıların Ermənistana çatdırılması üçün şərait yaradılır. Yevlaxda baş tutan görüşdə ermənilərin nümayəndələri ehtiyacları olduğu məhsullarla bağlı xahiş etmişlər. Bunu nəzərə alan Azərbaycan erməni sakinlərinə humanitar dəstəyini reallaşdırmağa başlayıb: "Bununla da dünyaya bir daha nümayiş etdirdik ki, Azərbaycanın ərazisində heç bir xalqın nümayəndəsinə qarşı diskriminasiya halı mövcud deyil və heç vaxt olmayıb, olmayacaq da. Azərbaycan böyük coğrafiyada, sözün əsl mənasında, təhlükəsizlik adasıdır. Cənubi Qafqaz regionunda sülhün, təhlükəsizliyin və əməkdaşlığın əsas təşəbbüskarı rolunda çıxış edən dövlətdir".

Bütün vətəndaşlarına qayğı ilə yanaşmaq Azərbaycanın dövlət siyasətidir

"Qarabağdakı erməni sakinlərin nümayəndələri sentyabrın 21-də Azərbaycanın mərkəzi hakimiyyətinin səlahiyyətli nümayəndələri ilə görüşdə Xankəndiyə humanitar yardımın göndərilməsi ilə bağlı xahiş etmişdilər. Bir gün sonra Fövqəladə Hallar Nazirliyi Xankəndi şəhərinə zəruri ərzaq məhsulları, çörəklə dolu maşınlar göndərdi. Humanitar yardımların göndərilməsi davam etdiriləcək. Sentyabrın 24-dən Xankəndi və ətraf ərazilərə elektrik enerjisi ilə də təmin edildi".

Bu fikirləri isə deputat Kamilə Əliyeva söyləyib. Xankəndiyə Azərbaycan elektrik enerjisinin verilməsi ilə artıq bu bölgəmizin də ölkəmizin ümumi elektrik şəbəkəsinə qoşulmasını təmin etdi.

Deputatın sözlərinə görə, Prezident İlham Əliyevin yürütdüyü qətiyyətli siyasət və iradəsi nəticəsində Ermənistan və Fransadan Xankəndiyə göndərilən yük maşınları geri qaytarıldı. Bu gün dünya şahid olur ki, ermənilər də daxil olmaqla, dilindən, dinindən asılı olmayaraq, bütün vətəndaşlarına qayğı göstərilməsi, onların yüksək rifah şəraitində yaşaması Azərbaycanın dövlət siyasətidir".

Əsmər QARDAŞXANOVA,

Azərbaycan.-2023.- 26 sentyabr.- S.8.