"Şuşa ili"nin təntənəsi

Ötən ili başdan-başa Zəfər zirvəmizin bayram coşqusu ilə qeyd etdik

"...Mən yeni ili "Şuşa ili" elan edirəm..."

Prezident İlham Əliyev 2022-ci ili "Şuşa ili" elan etməsinin müjdəsini Azərbaycan xalqına Dünya Azərbaycanlılarının Həmrəyliyi Günü və Yeni il münasibətilə xalqa müraciəti zamanı vermişdi. Qalib lider onu da bildirmişdi ki, bu il həm də təməli 1752-ci ildə Pənahəli xan tərəfindən qoyulan Şuşa şəhərinin 270 illik yubileyi böyük təntənə ilə qeyd ediləcək.

Dövlət başçısının Şuşanın şanlı tarixinin bayram kimi qeyd edilməsinə, eləcə də mədəniyyət beşiyimizin bərpasının, dirçəlişinin sürətləndirilməsinə töhfə verən mühüm qərarları sayəsində ötən ili başdan-başa "Şuşa ili"nin təmtərağında, Zəfər zirvəmizin bayram ab-havasında qeyd etdik.

Uca sıldırımlar başında bina edilən əzəmətli Vətən qibləmizlə qürurlandıq, tarixi şəhərimizin ruhunun özünə qaytarılmasının fəxrini yaşadıq.

Və bir daha Azərbaycan xalqının, Azərbaycan Prezidenti İlham Əliyevin qəlbindəki Şuşa sevgisinə heyran olduq.

Tariximizin Şuşa səhifəsi

Təsadüfi deyildi ki, 2020-ci il sentyabrın 27-də çıxdığımız Zəfər yürüşünün qalibiyyət zirvəsinin Şuşa olacağını Ali Baş Komandan hələ müharibənin gedişatında "Şuşasız bizim işimiz yarımçıq olar" deyərək igid döyüşçülərimizə çatdırmış, savaş parolunu vermişdi. Müzəffər Ali Baş Komandanın qətiyyəti və sərkərdə məharəti ilə cızdığı hərbi strategiyanı izləyən igid əsgərlərimiz cəmi 44 gün ərzində Şuşaya doğru canları, qanları ilə dağlarla, dərələrlə, meşələrlə, sıldırımlarla qəhrəmanlıq cığırını açmış, Zəfər yürüşünü noyabrın 8-də Şuşanın azadlığı ilə qürurla sonlandırmışdılar.

Azərbaycan tarixinin ən şanlı salnaməsinə çevrilən Şuşa zəfərini Şəhidlər xiyabanından xalqımıza müjdələyən və kövrələrək bütün dünyaya "Əziz Şuşa, sən azadsan!, Əziz Şuşa, biz qayıtmışıq!, Əziz Şuşa, biz səni dirçəldəcəyik!" bəyan edən qalib lider İlham Əliyev ötən qısa dövr ərzində Şuşanın tarixi əzəmətinin bərpası, mədəni inkişafı istiqamətində müstəsna işlərin görülməsi ilə bağlı mühüm qərarlar qəbul edib, göstərişlər verib.

Vətən müharibəsi bitdikdən cəmi iki ay sonra - 2021-ci il yanvarın 14-də Zəfər yolu ilə azadlığına qovuşan Şuşaya ilk tarixi səfərini edən Müzəffər Ali Baş Komandan İlham Əliyev bu səfəri zamanı illərdir didərgin həyatı yaşayan Natəvanın, Üzeyir bəyin, Bülbülün güllələnmiş büstlərini də öz doğma yerlərinə qovuşduraraq, həm də Şuşanın milli ruhunun qayıdışına rəmzi işarə vurmuşdu.

Qədim şəhərin yeni dirçəlişi

Şuşanın hərtərəfli inkişafının bünövrəsi hələ illər öncə Ulu Öndər Heydər Əliyev tərəfindən qoyulmuşdu. Ümummilli Liderin 1982-ci ildə Şuşaya 2 dəfə səfər edərək Vaqifin məqbərəsinin, Poeziya Evinin açılışında və orada keçirilən Vaqif Poeziya Günlərində iştirak etməsi xalqımızın, şuşalıların yaddaşında hələ də ən xoş xatirələr kimi qalıb. Ulu Öndər həmin tarixi səfərləri zamanı Şuşaya respublikanın görkəmli ictimai-siyasi xadimləri, eləcə də ailəsi ilə bərabər gəlmişdi. O zaman hələ çox gənc, cəmi 21 yaşı olan İlham Əliyev Ümummilli Liderin Şuşanın dirçəldilməsi, azərbaycançılıq məfkurəsinin inkişafı ilə bağlı həyata keçirdiyi mühüm işlərin şahidi olmuşdu.

Buna görə də Ali Baş Komandan olaraq Şuşanın işğaldan azad edilməsini İlham Əliyev bir nömrəli vəzifəsi hesab etdiyi kimi, azadlığından dərhal sonra tarixi şəhərimizin dirçəldilməsini də qurucu lider olaraq özünün prioriteti saymışdı.

Vətən müharibəsindən dərhal sonra Qarabağ və Şərqi Zəngəzurda geniş quruculuq və bərpa işlərinə start verən Azərbaycan dövləti birbaşa ölkə rəhbəri İlham Əliyevin şəxsi diqqəti və nəzarəti altında işğaldan azad edilmiş torpaqlar arasında ən genişmiqyaslı bərpa işlərini də məhz Qarabağın mirvarisi Şuşada aparmağa başlayıb.

İkiillik qısa zaman müddətində 10 dəfədən çox yolunu Şuşa şəhərindən salan dövlət başçısı qala şəhərimizdə böyük quruculuq işlərinə, genişmiqyaslı bərpa işlərinə start verib, burada görülən işlərin gedişatı ilə şəxsən tanış olub.

Prezident İlham Əliyevin Şuşaya hər tarixi səfəri zamanı mədəniyyət paytaxtımızın necə dirçəldiyini, simasının dəyişdiyini əyani görürük.

"Şuşa hər birimizi özünə çəkir"

Təkcə 2021-ci ildə düz yeddi dəfə Şuşaya səfər edən Müzəffər Ali Baş Komandan İlham Əliyev Cıdır düzündə bayram tonqalı alovlandıraraq dostlara şadlıq, düşmənlərə gözdağı mesajı verdi. Zəfərdən sonra mədəniyyət paytaxtımızda ilk dəfə keçirilən "Xarıbülbül" Musiqi Festivalına, Vaqif Poeziya Günlərinə uğurlu start verən qalib lider Şuşada milli ruhun dirçəlişinin xoş xəbərini yetirdi.

Şuşanın tarixindəki əlamətdar günlərdən biri də 2021-ci ildə, müstəqil Azərbaycan dövlətinin 15 İyun - Qurtuluş Günündə Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğanın Azərbaycan - Türkiyə əlaqələrini ən yüksək zirvəyə çatdıraraq, "Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi"ni imzalamaları oldu.

Tarixi Azərbaycan şəhərinin azadlığının ilk ad günündə - 8 Noyabrda da Müzəffər Ali Baş Komandan Şuşada idi. Həmin gün dövlət başçısı İlham Əliyev hərbçilər qarşısında çıxış edərək söylədi ki, bu, Zəfər bayramıdır, bu, rəşadət bayramıdır, bu, ədalət bayramıdır, bu, milli qürur, milli ləyaqət bayramıdır.

2021-ci il dekabrın 24-də Prezident İlham Əliyev 60 illik yubileyini qalib sərkərdə kimi qürur zirvəmiz Şuşada qeyd etdi.

Yubiley günündə dövlət başçısı onu da qürurla qeyd etdi ki, "Şuşa hər birimizi özünə çəkir. Düzdür, mən burada - Şuşada müxtəlif tədbirlərin açılışlarında iştirak etmişdim. O tədbirlər ki Şuşanın Azərbaycan xalqına, Azərbaycan mədəniyyətinə məxsus olduğunu bir daha təsdiqləyir. Amma eyni zamanda hər dəfə Şuşada hansısa tədbir nəzərdə tutulduqda böyük həvəslə, böyük sevgi ilə, məhəbbətlə Şuşaya gəlirdim və hesab edirdim ki, bu günü də mən məhz burada - Şuşada hər birimiz üçün əziz olan Cıdır düzündə qeyd etməliyəm və bunu edirəm".

Möhtəşəm tədbirlərin ünvanı

Başdan-başa "Şuşa ili"nin təntənəsində keçirdiyimiz 2022-ci ildə də dövlət başçısı İlham Əliyev öz dəyişməz ənənəsinə sadiq qalaraq mədəniyyət paytaxtımıza mütəmadi səfərlər gerçəkləşdirdi, Şuşada görülən işlərlə yerində tanış oldu, mühüm tədbirlərdə iştirak etdi.

Ötən il aprelin 21-də İlham Əliyev Şuşa rayonunun Daşaltı kəndində Əhmədbəyli-Füzuli-Şuşa avtomobil yolunun və bu yolun üzərindəki tunellərin inşası ilə tanış oldu. Sözügedən avtomobil yolunun tikintisinin 2024-cü ildə başa çatdırılması planlaşdırılır.

Həmin gün Şuşa şəhərinə gələn Prezident İlham Əliyev əvvəlcə burada tullantıların idarə olunması poliqonunda gedən işlərlə, sonra isə şəhərdə inzibati binanın əsaslı təmiri və konfrans zalının tikintisi ilə tanış oldu.

Növbəti gün qalib lider İlham Əliyev xalqımızı Şuşada keçirilən Dünya Azərbaycanlılarının V Qurultayı - Zəfər qurultayından salamladı. Azərbaycanın zəfəri ilə bitən Vətən müharibəsində bir amal ətrafında tarixin heç bir dönəmində olmadığı kimi birləşərək həmrəy olan dünya azərbaycanlılarının bu qurultayının da məhz Şuşada keçirilməsinin rəmzi mənası var idi.

Tarixi qurultayda çıxış edən Prezident İlham Əliyev söylədi ki, biz bu gün azad Qarabağda, azad Şuşada Dünya Azərbaycanlılarının qurultayını keçiririk: "Bu qurultayın adı Zəfər qurultayıdır və bu, təbiidir. Çünki tarixi Zəfərdən sonra ilk dəfədir ki, dünya azərbaycanlıları toplaşır, qurultay keçirir və ümumiyyətlə, Zəfər adı xalqımıza çox yaraşır. Siz buraya Zəfər yolu ilə gəlmisiniz, qurultayın adı Zəfər qurultayıdır".

270 illik əzəmətli tarixə malik qala şəhərimiz getdikcə təkcə Azərbaycanın deyil, Qafqazın mədəni və diplomatik mərkəzinə çevrilir. Azadlığının üzərindən çox qısa müddət ötməsinə baxmayaraq, qədim şəhərimiz beynəlxalq tədbirlərə, festival, forum və konfranslara müvəffəqiyyətlə evsahibliyi edir.

Mədəniyyətimizin paytaxtında gerçəkləşən belə mühüm tədbirlərdən biri də martın 18-də Azərbaycan-BMT tərəfdaşlığının 30 illiyinə həsr olunmuş toplantı idi. Azərbaycan parlamentinin komitə iclaslarının da Şuşada keçirilməsi 44 günlük Vətən müharibəsində əldə etdiyimiz tarixi zəfərin möhtəşəm nəticələrindəndir.

Bakıda keçirilən İqtisadi Əməkdaşlıq Təşkilatı Parlament Assambleyasının (İƏT PA) Üçüncü Ümumi Konfransında iştirak edən dövlətlərin parlament nümayəndə heyətləri də dəyişilməz ənənəyə sadiq qalaraq mayın 18-də yollarını Azərbaycanın mədəniyyət paytaxtından saldılar.

Ötən ilin iyun ayında Bakıda keçirilən növbəti "Formula-1" Azərbaycan Qran-prisi kubokunun qədim şəhərimiz Şuşanın 270-ci ildönümünə həsr olunması da buna daha bir möhtəşəm nümunə oldu. Zəngin irsimizin elementlərini özündə birləşdirən yarışın rəsmi mükafatı Azərbaycanın əzəli torpaqlarına - Şuşaya qovuşması və "Şuşa ili" münasibətilə şəhərin ən qədim abidələrindən sayılan Yuxarı Gövhər ağa məscidinin minarələrinin elementlərini əks etdirdi.

Qoşulmama Hərəkatının Parlament Şəbəkəsinin Bakı Konfransında iştirak edən nümayəndə heyətlərinin üzvlərinin iyulun 2-də Şuşaya səfər etmələri Zəfər qalamızın qlobal əməkdaşlıq platformasına çevrilməsinin daha bir təntənəli nümayişi idi.

Ulu Öndərin xatirəsinə ehtiram

Mədəniyyət paytaxtımızda Birinci vitse-prezident Mehriban Əliyevanın rəhbərliyi ilə Heydər Əliyev Fondu tarixi, dini irsimizin, memarlıq abidələrinin bərpası istiqamətində mühüm işlər gerçəkləşdirir.

Ötən il mayın 10-da Prezident İlham Əliyev və birinci xanım Mehriban Əliyeva Şuşada səfərdə olarkən şəhərdə aparılan quruculuq-bərpa işləri ilə yerində tanış oldular. Dövlət başçısı İlham Əliyev və birinci xanım Mehriban Əliyeva Şuşadakı inzibati binada, Şirin su hamamında, məşhur tarzən, bəstəkar və Azərbaycan tarını təkmilləşdirən sənətkar Sadıqcanın vaxtilə yaşadığı evdə, Mehmandarovların malikanə kompleksində fond tərəfindən aparılan bərpa işləri ilə də tanış oldular.

Dövlət başçısı və xanımı sözügedən tarixdə Şuşaya səfər çərçivəsində "Shusha Boutique Hotel"in yerləşəcəyi ərazidə də oldular, burada aparılan təmir-bərpa işləri haqqında məlumat aldılar.

Onu da bildirək ki, 2021-ci ilin mayında Şuşada "Xarıbülbül" hotelinin, həmin hotelin nəzdindəki 48 mənzilli korpus və kotteclərin, avqustda isə "Qarabağ" hotelinin yenidənqurmadan sonra açılışı olub.

Mayın 10-da Prezident İlham Əliyev Şuşa Realnı Məktəbində həyata keçiriləcək təmir-bərpa işləri ilə tanış oldu, eləcə də "Azərişıq" ASC-nin Şuşa Rəqəmsal İdarəetmə Mərkəzinin açılışında iştirak etdi.

Prezident İlham Əliyevin məhz mayın 10-da, vaxtilə Şuşanın dirçəlişinin təməlini qoyan Ulu Öndər Heydər Əliyevin doğum günündə Qarabağımızın baş tacına səfər etməsi həm də Ümummilli Liderin əziz xatirəsinə dərin ehtiramın təcəssümü idi.

Həmin gün dövlət başçısı xalqa müraciətində söylədi ki, "Bu gün mayın 10-da mən mütləq burada olmalı idim. Ulu Öndərin xatirəsinə öz ehtiramımı və Azərbaycan xalqının ehtiramını buradan ifadə etməli, bir daha deməli idim ki, biz bu torpaqlara, doğma torpaqlarımıza əbədi qayıtmışıq və burada əbədi yaşayacağıq.

Qarabağ bizimdir, Qarabağ Azərbaycandır!"

2021-ci ildə Prezident İlham Əliyevin sərəncamına əsasən, Şuşa mədəniyyət paytaxtımız elan edilərkən şəhərin ənənəvi dolğun mədəni həyatına qovuşması da başlıca məqsədlər kimi müəyyənləşdirilmişdi. Bu tarixi qərardan dərhal sonra mədəniyyət paytaxtımızda ənənəvi mədəni həyat öz məcrasına düşdü. 12-14 may tarixlərində keçirilən beynəlxalq statuslu "Xarıbülbül" festivalı da zəfərdən sonra ikinci dəfə dünyaya səs saldı. Müxtəlif ölkələrdən gələn folklor kollektivləri festivalda möhtəşəm çıxışlar etdilər, Qarabağın mirvarisində mədəniyyət bayramı yaşandı.

Şuşa şəhərinin 270 illiyi ilə əlaqədar Prezident İlham Əliyevin sərəncamı ilə elan edilən "Şuşa ili"ndə keçirilən möhtəşəm V "Xarıbülbül" Beynəlxalq Folklor Festivalının açılışında dövlət başçısı İlham Əliyev və birinci xanım Mehriban Əliyeva da iştirak etdilər.

Müqəddəs torpaq

Zəfərimizin qürurlu ikinci ildönümündə, Şuşanın azadlıq günündə də Müzəffər Ali Baş Komandan İlham Əliyev Qarabağın uca qalasında, Zəfər zirvəsində idi.

Birinci xanım Mehriban Əliyeva və oğulları Heydər Əliyevlə birgə Şuşaya yollanan qalib lider İlham Əliyev Zəfər Günü münasibətilə Şuşada təşkil olunan tədbirdə hərbçilər qarşısında çıxış edən zaman bildirdi ki, "...Müharibə dövründə çoxsaylı müsahibələrdə mən müharibənin gedişatı ilə bağlı bəzi məqamları açıqlayırdım. Təbii ki, hər şeyi deyə bilmirdim. Xüsusilə gələcək planlar haqqında bir çox şeyləri deyə bilmirdim. Verilən suala cavab olaraq cəmi bir dəfə demişdim ki, Şuşasız bizim qələbəmiz yarımçıq olacaq".

Həmin çıxışında dövlət başçısı bir daha Şuşanın Azərbaycan xalqının, şəxsən onun - Şuşanın xilaskarının qəlbində hansı zirvədə olduğunu da dilə gətirdi: "Əminəm, Azərbaycan xalqı yaxşı anladı ki, bizim son məqsədimiz, müharibənin son məqsədi Şuşanı işğaldan azad etməkdir. Təkcə ona görə yox ki, Şuşa Qarabağın tacıdır. Ona görə yox ki, Şuşanın strateji yerləşməsi faktiki olaraq onun azad olunmasından sonra müharibənin taleyini həll edirdi. O cümlədən ona görə ki, Şuşa Azərbaycan xalqının ürəyidir, canıdır, hər bir azərbaycanlı üçün müqəddəs yerdir".

Bəli, ölkənin ən ali şəxsinin ürəyində müstəsna yeri olan Şuşa birbaşa dövlət başçısı İlham Əliyevin xüsusi diqqəti və nəzarəti altında gündən-günə dirçəlir, tarixi əzəmətini, milli ruhunu, şöhrətini özünə qaytarır.

Ötən illərdə olduğu kimi, bu il də Şuşada bayram ab-havası davam edəcək. Qarabağımızın baş tacı, Zəfər simvolumuz Şuşa 2023-cü ildə türk dünyasının mədəniyyət paytaxtı kimi tarixi missiyanı da qürurla yerinə yetirəcək.

Bir sözlə, Müzəffər Ali Baş Komandan İlham Əliyevin rəhbərliyi altında rəşadətli Azərbaycan Ordusunun qazandığı parlaq Zəfər sayəsində hər günümüzü Şuşa qələbəsinin fəxarəti, Şuşa qürurunun təntənəsi ilə keçiririk və bu, əbədiyyətədək belə olacaq.

Yasəmən MUSAYEVA,

Azərbaycan.-2023.- 8 yanvar.- S.1;4.