Ermənilər 2023-cü ildən də yaxşı nəsə gözləmirlər

Ermənistanda siyasi gərginlik getdikcə daha da artır

Ermənistan iqtisadiyyatında və sosial həyatında yaranan ağır vəziyyət davam edir. Erməni ekspertlər özləri də etiraf edirlər ki, bu gedişlə ölkə daha böyük fəlakətlərlə üzləşməli olacaq. Yaşanan iqtisadi böhran şəraitində gündəlik istehlak, xüsusən də ərzaq məhsullarının qiymətində baş verən artım mövcud ağır durumu daha da pisləşdirir. İqtisadçı Manvel Aramyan deyib ki, ölkə iqtisadiyyatının xilasına ümid var, lakin bunun üçün hökumət populist addımlardan əl çəkməli, kəmərləri sıxmalıdır.

Ekspert 2022-ci ilin iqtisadi göstəricilərini və 2023-ci il üçün proqnozlarını təhlil edərkən bildirib ki, cari ildə Ermənistan həm sosial, həm də siyasi baxımdan ciddi problemlərlə üzləşəcək: "Təəssüf ki, 2023-cü ildə makroiqtisadi canlanma natamam olacaq. 2021-ci ildəki 7,4 faiz iqtisadi geriləmədən sonra bizdə iqtisadi artım xeyli aşağıdır. Ən azı 7 faizə yaxınlaşa biləcəyimizlə bağlı proqnozlar fantaziya janrındandır".

M.Aramyan deyib ki, Ermənistan hökuməti xalqın rəğbətini qazanmaq üçün populist addımlar ataraq ölkənin iqtisadi vəziyyətini daha da ağırlaşdırıb: "Söhbət 2023-ci il yanvarın 1-dən artan pensiya və müavinətlərdən gedir. Mən burada ciddi risklər görürəm. Bu öhdəliyi götürəndə ixtisar, demək olar ki, mümkün deyil. Siz sadəcə olaraq, babalarınıza, nənələrinizə deyə bilməzsiniz ki, mən yanılmışam, iqtisadi vəziyyətin pensiyalarınızı artırmağa imkan vermədiyini qabaqcadan görməmişəm. Mən çox yaxşı başa düşürəm ki, bu, inflyasiyanın fonunda xalqa qarşı edilir. Yalnız bu gün ölkədə ərzaq məhsullarının bahalaşması 20 faizi ötüb və bu, istər-istəməz sosial partlayışa gətirib çıxaracaq. İqtisadiyyatın sütunlarını qurmadan sosial məsələlərin həllinə getmək qətiyyən yanlışdır, çünki bu il məsələni həll edəcəksiniz, gələn il isə əhaliyə daha böyük problem yaradacaqsınız".

Manvel Aramyan Ermənistan iqtisadiyyatının hazırkı vəziyyətini təcili yardıma ehtiyacı olan xəstə ilə müqayisə edib. Qeyd edib ki, sağalmaq üçün hələ də ümid var. Amma bunun üçün xərcləmələrdən əl çəkməli, kəmərini sıxmağı bacarmalı və ilk növbədə bunu özündən başlamalıdır: "Hökumət özünü necə doğrultsa da, iqtisadi aktivliyin 5 faizlik göstəricisi olduğunu bəyan etsə də, mən iki amili səsləndirəcəyəm. Xahiş edirəm unutmayın ki, siz artımdan qat-qat dərin tənəzzül keçirmisiniz, ikincisi, struktura baxın, iqtisadiyyatınız necə inkişaf edir? Biz əsasən ekzogen hadisələr hesabına ayaqüstə dururuq. Bu, transfertlərin axını və misin dünya bazarındakı qiymətlərində yüksək artımın baş verməsi hesabına olur. Bunlar iqtisadi aktivliyin az-çox yüksək göstəricilərinə səbəb olan iki amildir".

Bütün bunların fonunda İrəvanda baş nazir Nikol Paşinyanın hökumətin iclasında Azərbaycan ərazisində müvəqqəti yerləşən Rusiya sülhməramlılarını tənqid, hətta təhdid etməyi gündəm mövzusu olaraq qalmaqdadır. Belə ki, Paşinyan Rusiya sülhməramlılarının fəaliyyətinin qənaətbəxş olmadığını əsas gətirərək Qarabağa digər beynəlxalq təşkilatların, BMT-nin sülhməramlılarının gətirilməsini təklif edib. Paşinyan bu təkliflərini müxtəlif bəhanələr gətirərək əsaslandırmağa çalışsa da, reallıq odur ki, Ermənistan rəhbərliyi Rusiya sülhməramlılarını əvəzləməyə və regiona əlavə qüvvələr gətirməyə çalışır.

Bu açıqlamalar ilə Paşinyan bir növ sülhməramlıları və dolayı yolla Rusiyanı təhdid edir. Yəni onların sülhməramlılardan gözləntisi birmənalı olaraq erməni maraqlarına xidmət etməsidir. Sülhməramlıların indiki fəaliyyəti Paşinyanı narazı saldığından indi o, Rusiya ilə təhdid formasında danışır.

Bu arada Ermənistanda hərbi hissələrdən birinin keçmiş komandiri Arsen Abqaryanın işi üzrə keçirilən məhkəmə iclasında Andranik Makaryan, Sarkis Kulakçyan, Ellada Harutyunyan ilə bağlı ittiham aktı açıqlanıb. Müharibə zamanı itkin düşən əsgər analarından biri deyib ki, baş qərargah rəisinin keçmiş müavini Andranik Makaryan özünə ittihamları qəbul etmir. "Deyir ki, əmrə əməl ediblər. Onda desin ki, kimin əmrini yerinə yetirirdilər? Onlar bilirdilər ki, həmin ərazi artıq Azərbaycanın nəzarətindədir, amma buna baxmayaraq, oğlanları ora göndərdilər, buna görə də hamısı cəzalandırılmalıdırlar. Onlar əsgər valideynlərindən qaçırlar, çünki bizə nə deyəcəklərini bilmirlər".

İttihama görə, xüsusi döyüş tapşırığına cavabdeh olan general Makaryan Arsen Abqaryanın dəstəsinin mühasirəyə alındığını öyrəndikdən sonra köməyə tələsməyib, geri çəkilmək əmri verib və Qafana qayıdıb. Nəticədə "kimyaçıların hərbi hissəsi" adlanan Abqaryanın dəstəsinin 40 hərbçisindən 5-i əsir götürülüb, 12-si həlak olub, qalan 23 hərbçi və avtobus sürücüsü itkin düşüb. General Andranik Makaryan heç nə etməməkdə ittiham olunur və onu 7 ildən 13 ilə qədər həbs gözləyir.

Bütün bunlar göstərir ki, 2023-cü ildə ölkənin daha dərin böhran yaşaması, ağır problemlər içində çabalaması, insanların narazılığının pik həddə çatması qaçılmazdır.

Elçin CƏFƏROV,

Azərbaycan.-2023.- 8 yanvar.- S.8.