Ramazan insanların həmrəyliyini
nümayiş etdirir
Ramazan bayramı
müsəlmanların ən
əziz, ən müqəddəs bayramlarından
biridir. İslamda ilin ayları arasında Ramazan ayı ən şəfqətli ay hesab edilir. Ona görə də onu "on bir ayın sultanı"
da adlandırırlar. Çünki
bu ayın gecələrinin birində
müqəddəs kitabımız
olan "Qurani-Kərim"
nazil olub. Həmin gecəyə
"qədr" və
ya "əhya" gecəsi deyirlər.
Müsəlmanlar bu ayda böyük mənəvi zəfər bayramının sevincini bir-biri ilə bölüşür və
birlikdə namaz qılaraq
Uca Yaradana şükürlərini
bildirirlər. Pak qəlbləri
ilə əllərini
Tanrıya açıb
Ondan istəklərini diləyirlər.
Bayram namazı Ramazan ayı
boyunca mənəvi olaraq ilahi zirvəyə
çatmışların Allahla
birbaşa ünsiyyətidir.
Namaz qıldıqca insan
ürəyindəki bütün
saf diləklərini dilə gətirir, səmimi-qəlbdən Allaha
dua edir. Sonra ailə üzvləri ilə birlikdə açılan bayram süfrəsi arxasında oturub bu müqəddəs günü qeyd edirlər...
Ramazan ayı insan nəfsinin paklığı,
eyiblərin və naqisliyin islah olunması, ağıl, iman və iradənin
saflaşması dövrüdür.
İnsan bu ayın dua və ibadətləri ilə eyiblərdən saflığa,
saflıqdan kamilliyə,
mənəvi təmizliyə
doğru gedir. Bu ay ruhun tərəqqisi, Allaha pərvaz etməsidir. Ramazan ayında
fani varlıqlar sanki savaş meydanına atılırlar.
İmanla nəfs bu meydanda çarpışır.
Nəfs bütün imanlı işləri üstələməyə çalışır,
onun davamlı olmasını istəyir. İnanclar isə mətanətlə, dəyanətlə
buna qarşı çıxır.
Zaman keçdikcə dil
yalandan, göz və könül haramdan uzaqlaşır. Orucluq insanlara iradələrini, dözümlüklərini
yoxlamağa şərait
yaradır, addım-addım
onları paklığa,
mənəvi təmizliyə
dəvət edir.
Təəssüflər ki, keçmiş
sovet hakimiyyəti illərində islamın başqa ayinləri və ibadətləri kimi, orucluq da qadağan olunmuşdu.
Lakin imanlı adamlar gizli də olsa,
dini rituallarını
icra edirdilər. Oruc tutmaqlarından, namaz qılmaqlarından, uca Tanrıya ibadətlərindən
qalmırdılar.
Azərbaycan dövlət
müstəqilliyini bərpa
etdikdən sonra insanların vicdan azadlığı bərpa
olundu. İslam dininə,
onun ibadət və ayinlərinə olan münasibət kökündən dəyişdi.
Artıq insanlar azad şəkildə müqəddəs bayramlarını
qeyd etməyə başladılar, namaz qıldılar,
oruc tutdular. "Azərbaycan Respublikasının
bayramları haqqında"
qanuna əsasən,
Ramazan bayramı da, başqa
bayramlar kimi, ölkəmizdə dövlət
səviyyəsində qeyd
olunmağa başladı.
Tədqiqatçıların fikrincə,
"Ramazan" yay aylarının sonunda və payızın əvvəlində
yağan və yerdəki tozları təmizləyən yağış
mənasını da verir.
Yəni bu yağış Yer üzünü
necə yuyub təmizləyirsə, Ramazan ayı
da möminləri günahlardan
eləcə təmizləyir.
Ramazan ayı - mənəvi
tərbiyə ayıdır.
Ramazanın başqa bir mənası isə yanmaqdır. Buna görə Ramazan ayı oruclunun günahlarını
yandıraraq yox edir. Hər iki mənanın birləşdiyi nöqtə
oruclunun bu ayda günahlardan təmizlənməsidir.
Ramazan bütün müsəlmanlar
üçün əzizdir,
müqəddəsdir. Bu bayramı
islam dininə qəlbən bağlı olan Azərbaycan xalqı neçə əsrdir ki, yüksək inam və ruh
yüksəkliyi ilə
qeyd edir. İslam dininə görə, oruc tutanlar axirətdə
və dünyada Allahın sevgisini qazanırlar. Bir sözlə,
Ramazan ayı Allahı
dərk etmək, mənəvi təmizlənmə
və Uca Yaradana yaxınlaşma ayıdır.
On bir ayın sultanı olan Ramazanda həm də müsəlmanlara həmrəyliklərini nümayiş
etdirməyə fürsət
verilir.
Azərbaycan dünyanın
ən tolerant ölkəsidir.
Azərbaycan Prezidenti
İlham Əliyev ölkəmizdə
mənəvi dəyərlərin
qorunmasına xüsusi
diqqət göstərildiyini
vurğulayaq demişdir:
"Azərbaycan müasir
dövlətdir, dünyəvi
dövlətdir. Eyni zamanda öz milli və dini ənənələrinə
sadiq olan dövlətdir. İslam dəyərləri
bizim milli-mənəvi
dəyərlərimizin tərkib
hissəsidir və müqəddəs Ramazan ayı
bütün dövrlərdə
Azərbaycan xalqının
qəlbində yaşamışdır...
Azərbaycan o ölkədir
ki, burada bütün dinlərin nümayəndələri
bir ailə kimi yaşayır və bu, bizim
böyük sərvətimizdir".
Prezident İlham Əliyev
hər il Ramazan bayramında
xalqımızı təbrik
edir. Dövlət başçımız bu
il də Ramazan bayramı
münasibətilə Azərbaycan
xalqına təbrik ünvanlamışdı: "Ramazan ayı insanların qəlbini və təfəkkürünü nurlandıran,
onları əmin-amanlığa,
vəhdətə, əxlaqi
saflığa dəvət
edən mübarək
aylardandır. Müqəddəs
kitabımız "Qurani-Kərim"in
nazil olduğu bu ayda müsəlmanlar
Uca Yaradan qarşısında
vicdani borc və vəzifələrini
ləyaqətlə yerinə
yetirmək, mənəvi-əxlaqi
zənginliyin fərəhini
yaşamaq fürsəti
qazanırlar. Xalqımız
taleyinin ən çətin dönəmlərində
belə öz tarixi köklərini,
milli-mədəni dəyərlərini,
adət-ənənələrini qoruyub saxlamışdır.
İslam dünyasının ayrılmaz hissəsi olan Azərbaycanda dini bayram və
mərasimlər hər
il qeyd olunur və müsəlman aləmi ilə mənəvi həmrəyliyimizi
təcəssüm etdirir.
Builki Ramazan bayramı
həm də otuzillik düşmən tapdağından azad edilmiş dədə-baba yurdlarımızda, Azərbaycanın
bütün suveren ərazisində keçirilməsi
ilə əlamətdardır".
Ramazan bayramı həm də insanların Vətən, torpaq, dövlətçilik kimi
müqəddəs amallar
ətrafında daha sıx birləşməsinə
xidmət edir. Məhz bu birlik,
həmrəylik dövlətimizin
daha da güclənməsini,
düşmən tapdağındakı
torpaqlarımızın işğaldan
azad olunmasını təmin etdi. Təəssüflə qeyd
olunmalıdır ki, işğaldan
azad olunmuş ərazilərdə məscidlər,
mədrəsələr, körpülər,
məbədlər ermənilər
tərəfindən nəinki
dağıdılmış, hətta bir çox halda təyinatına uyğun olmayan şəkildə istifadə edilmişdir. Azərbaycan Prezidenti
İlham Əliyevin işğaldan
azad edilmiş bu ərazilərdə olması, həmin dini obyektlərin yenidən qurulması ilə bağlı tapşırıqları hamımızı
ürəkdən sevindirir.
Bu, ölkəmizdə həm
dini dəyərlərimizə,
həmçinin hər
bir müsəlmana göstərilən ən
böyük diqqət
və qayğıdır.
Vahid MƏHƏRRƏMOV
Azərbaycan.- 2024.- 10 aprel, №
74.- S.11.