4 kəndin azad olunması ilə bağlı razılaşma göstərir ki, Azərbaycan öz milli maraqlarını heç vaxt güzəştə getmir

"Vətən müharibəsindən ötən dövr ərzində elə bir il olmayıb ki, Azərbaycan milli maraqları ilə bağlı siyasi-diplomatik uğur qazanmasın. Aprelin 19-da Azərbaycan-Ermənistan sərhədlərinin delimitasiyası üzrə dövlət komissiyalarının 8-ci iclasında qəbul edilən tarixi qərar da bu qəbildəndir. Ermənistan tərəfinin 1990-cı illərin əvvəllərindən işğal altında saxladığı Qazax rayonunun anklav olmayan 4 kəndinin sözün həqiqi mənasında, bir güllə belə atılmadan Azərbaycana qaytarılmasına razılıq verməsi Prezident İlham Əliyevin prinsipial qələbəsidir".

Bu fikirləri "Azərbaycan" qəzetinə açıqlamasında Milli Məclisin deputatı Məlahət İbrahimqızı deyib. Deputat bildirib ki, ermənilər ağ bayraq qaldırmağa davam edirlər: "Bu gün hər bir azərbaycanlı şərəfli bir xalqın mənsubu olmağından qürur duyur. Bu elə bir hissdir ki, üç yüz illik erməni zülmünə qarşı məlhəmdən yaranır. Azərbaycan xalqı öz tarixinin çox şərəfli və ləyaqətli mərhələsini yaşayır. Dövlətimizin başçısı Azərbaycan tarixinin şərəfli səhifələrinin qızıl hərflərlə yazılmış salnaməsinin müəllifidir. Bu gün keçirdiyimiz zəfər və ləyaqət duyğularını məhz Prezident İlham Əliyev bizə bəxş edib".

Deputat söyləyib ki, Ermənistan cənab İlham Əliyev diplomatiyasının prinsipiallığı, əzmkarlığı və məğlubedilməzliyi qarşısında Azərbaycan torpaqlarının işğal altındakı 8 kəndindən 4-nün geri qaytarılmasına razılıq vermək məcburiyyətində qalıb: "Bu tarixi hadisə həm də beynəlxalq aləmdəki anti-Azərbaycan dairələrin çirkin siyasətlərinin iflasa uğramasına səbəb oldu. 4 kəndin qaytarılması ilə bağlı razılıq həm də sapı özümüzdən olan baltaların, milli dönüklərin indiyədək verdiyi bütün proqnozları da alt-üst etdi. Fransa kimi Ermənistanı silahlandıran, revanşistləri Azərbayacana qarşı qaldıran qüvvələr də növbəti dəfə məğlubiyyətlə üzləşdiklərini dərk etdilər. Bu gün bütün dünya fərqindədir ki, Azərbaycan son dərəcə güclü ölkədir. Əminik ki, tezliklə dövlətimiz Qazaxın işğal altında qalan digər 3 kəndinin və Naxçıvanın Kərki kəndinin də geri qaytarılmasına və Zəngəzur dəhlizinin açılmasına da nail olacaq".

Azərbaycanın heç kimin torpaqlarında gözü olmadığını deyən Məlahət İbrahimqızı əlavə edib ki, biz yalnız öz torpaqlarımızın geri qaytarılmasını istəyirik: "Bu obyektiv qərarı isə rəsmi İrəvanın ilk konstruktiv qərarı kimi dəyərləndiririk: "Bu cür yanaşma və qərarlar iki ölkə arasında sülh prosesinin sürətlənməsinə təsir edə bilər. Onsuz da Ermənistanın başqa variantı yoxdur. Azərbaycan torpaqlarının bir qarışını belə heç kəsə güzəştə getməyəcək. Prezidentimiz bu reallığı öz qətiyyətli və prinsipial addımları ilə dəfələrlə təsdiqləyib, beynəlxalq aləm də buna şahidlik edib".

Deputat yekunda vurğulayıb, qədirbilən xalqımızın öz Müzəffər Lideri ətrafında nümayiş etdirdiyi sarsılmaz birlik və həmrəylik belə də davam edəcək: "Bir daha sübuta yetirilir ki, Azərbaycan xalqı Prezident İlham Əliyevə bu ilin fevral ayında keçirilən növbədənkənar prezident seçkilərində də təsadüfən səs verməyib. Bu, xalqımızın dövlət başçısının misilsiz fəaliyyətinə növbəti yekdil etimadı idi".

Nəzrin QAFARZADƏ,

Azərbaycan.-2024.- 23 aprel, № 81.- S.9.