Paşinyanla revanşistlərin yeni qarşıdurması başlanır

Keçmiş hərbi xunta Moskvadan yardım umur

Ermənistanda Nikol Paşinyan hakimiyyətinin siyasətinə qarşı çıxan sabiq iqtidar təmsilçiləri ölkədə yeni qarşıdurma, növbəti xaos yaratmaq istəyirlər. Belə ki, baş nazirin Azərbaycanla sülh müqaviləsinin imzalanması ilə bağlı açıqlamalarından sonra sosial narazılıqlardan istifadə edən Sarkisyan-Koçaryan koalisiyasının revanş istəyi vəziyyətin daha da qarışacağını göstərir.

Bu fonda "Hraparak" nəşri yazıb ki, Ermənistanın keçmiş prezidenti Serj Sarkisyan aktiv şəkildə siyasətə qayıtmağa hazırlaşır. Qeyd edilir ki, Sarkisyan aktiv şəkildə siyasi təmaslar yaradır: "Bəziləri onun qarşıdakı siyasi proseslərdə daha da aktivləşəcəyini deyir, bəziləri isə bundan təəccüblənmədiyini, onun daim aktiv olduğunu bildirir. Lakin dünən əldə etdiyimiz məlumata görə, Sarkisyanın Rusiyaya qısamüddətli səfəri olub. O, Moskvada yaşayan bir qrup biznesmen erməni ilə görüşüb. Qarşıdan gələn fövqəladə siyasi prosesləri və mümkün aktivləşməsi ilə bağlı onların əhvali-ruhiyyəsini yoxlayıb. Sarkisyanın yeni simalar irəli sürəcəyi də gözlənilir".

Göründüyü kimi, Sarkisyan hakimiyyətə gəlmək üçün xaricdən, indiki halda Rusiyadan da yardım alacağına ümid bəsləyir.

Ermənistan Prokurorluğu isə Serj Sarkisyanın qardaşı Aleksandr Sarkisyana aid 14 ədəd daşınmaz əmlakın və 3,5 milyard dramın (9 milyon ABŞ dolları - red.) müsadirə olunmasını tələb edir. Prokurorluq xüsusən Tumanyan küçəsində 3 mərtəbəli malikanəni və İrəvanın mərkəzində daha 3 evi bu məqsədlə seçmək niyyətindədir. Hüquq-mühafizə orqanları Kotayk vilayətində Sarkisyanın və onun ailə üzvlərinin daha 10 ədəd daşınmaz əmlakını müsadirə etmək istəyir. Prokurorluq bu ailəyə aid 4 nəqliyyat vasitəsini, 3 şirkətin əmlakını (Kotaykdakı hotel də daxil olmaqla) dövlətin xeyrinə müsadirə etmək niyyətindədir. Bütün bu əmlaklara həbs qoyulub.

"4rd.am" nəşri isə yazır ki, Ermənistanda hakimiyyət çevrilişi istisna olunmur: "Məlumata görə, danışıqlar prosesi ilə paralel olaraq müxtəlif platformalarda başqa diqqətçəkən müzakirələr də aparılır. Diplomatik mənbələrdən alınan məlumatlara görə, mümkün Ermənistan-Azərbaycan razılaşmasının maraqlı mərkəzləri, xüsusən də Qərb sənədin imzalanmasından sonra Nikol Paşinyanın hakimiyyətdə qalması məsələsinin çox ciddi problemə çevrilə biləcəyini anlayaraq, bu günlərdə alternativ, "ehtiyat" variantının müzakirəsi ilə bağlı fəallıq nümayiş etdirirlər. Həmin mərkəzlər başa düşürlər ki, müqavilə imzalanandan sonra Paşinyanı hakimiyyətdə saxlamaq nəinki qeyri-mümkün ola, həm də məqsədəuyğun olmaya bilər. Buna görə də onlar "B planı" tapmağa çalışırlar".

Qeyd olunur ki, Paşinyanın dəyişdirilməsi məsələsi həm də öz siyasi maraqlarını qorumaq və onları sona qədər irəli aparmaq, gələcəkdə regional proseslərdən kənarda qalmamaq baxımından əsasdır. Müvafiq olaraq, bir neçə mümkün namizəd müzakirə edilir ki, onlar da təbii olaraq Qərb qanadına aiddir. Yeri gəlmişkən, namizədlər arasında Paşinyanın komandasının bəzi üzvləri ilə yanaşı, hazırda Hayastanın daxili siyasi həyatında fəal olmayan fiqurların da olduğu barədə məlumatlar var.

Elçin CƏFƏROV,

Azərbaycan.-2024.- 21 avqust, № 178.- S.12.