Qarabağ cəlbedici turizm məkanına çevrilir

Qarabağ və Şərqi Zəngəzur tarixinin qədimliyi, təbiətinin əsrarəngizliyi və ələlxüsus da havasının saflığı, sularının, bitkilərinin şəfaverici olması ilə işğalaqədərki dövrdə də yerli sakinlərimizin və əcnəbilərin böyük ilgi göstərdiyi ünvanlardan olub. İşğaldan azad olunandan sonra bu ərazilərə insanların göstərdiyi maraq dəfələrlə çoxalıb. Gündən-günə Qarabağ və Şərqi Zəngəzura səfər edənlərin sayının artması isə təkcə bu yerlərin təbii gözəlliyinə görə yox, həm də xalqımızın hər bir üzvünün ürəyində müqəddəs yer tutmasına görədir.

Hər kəs Şuşanı görmək istəyir

Azərbaycan dövlətinin həyata keçirdiyi geniş quruculuq-bərpa işləri nəticəsində işğaldan azad olunmuş ərazilərdə həyat gündən-günə canlanır. Təkcə bir misal gətirək ki, hətta bu gün Şuşaya ayaq basan insanlar inana bilmir ki, cəmi bir neçə il əvvəl bu şəhər xarabalıq olub. Mədəniyyət paytaxtımızda görülən kompleks işlərin nəticəsində şəhərdə demək olar ki, hər yan abadlaşıb, Şuşa əvvəlkindən də möhtəşəm şəhərə çevrilir və gələn qonaqlarını heyran edir. Hər gün zəfər qalamızı yüzlərlə insan ziyarət edir və bu səbəbdən də Şuşanın məscidləri, tarixi, gəzməli-görməli yerləri, küçələri, hotelləri insanlarla dolub-daşır. Özü də təkcə azərbaycanlılar deyil, əcnəbi qonaqlar da böyük maraq və istəklə qədim şəhərimizə üz tuturlar. O da qürurverici məqamdır ki, Şuşa həm də ali qonaqların səfər etdiyi baş ünvan statusu qazanıb. Mütəmadi olaraq burada həm yerli əhəmiyyətli, həm də beynəlxalq tədbirlər keçirilir və mötəbər qonaqlar qarşılanır.

Şuşada keçirilən Türk Dövlətləri Təşkilatının qeyri-rəsmi zirvə toplantısında Qazaxıstanın, Özbəkistanın, Qırğızıstanın, Şimali Kipr Türk Cümhuriyyətinin prezidentlərinin, Macarıstanın Baş nazirinin, Türkiyə Respublikasının vitse-prezidentinin, Türk Dövlətləri Təşkilatının Baş katibinin, ümumiyyətlə, türkdilli dövlətlərdən olan xeyli mötəbər şəxsin iştirak etməsi də buna bariz nümunədir. Türkiyə Prezidenti Rəcəb Tayyib Ərdoğan da bir neçə dəfə mədəniyyət paytaxtımızın fəxri qonağı olub.

Səfərlərin istiqamətləri genişləndirilir

Düşmən 30 il ərzində bu əraziləri mina tarlasına çevirib və bu səbəbdən də vətəndaşlarımızın o yerlərə səfər etməsində müəyyən məhdudiyyətlər var. Amma çox sürətli bir şəkildə həmin yerlər minalardan təmizlənir və lazım olan infrastruktur qurulur, mərhələli şəkildə qayıdış gerçəkləşdirilir. Həm də müvafiq olaraq Qarabağ və Şərqi Zəngəzura turlar təşkil olunur.

Prezident İlham Əliyevin tapşırığı ilə ilk olaraq 2022-ci il yanvarın 24-də Bakı-Şuşa-Bakı avtobus reysinin açılması ilə vətəndaşlarımızın Şuşaya mütəmadi səfərləri başladı. Sözügedən tarixdən Bakı-Ağdam-Bakı istiqaməti üzrə müntəzəm avtobus marşrutu da istifadəyə verildi.

Böyük qayıdış proqramının tərkib hissəsi olaraq Azərbaycan vətəndaşlarının işğaldan azad edilmiş ərazilərə səfərlərinin istiqamətləri genişləndirilir. Belə ki, bu il aprelin 27-dən etibarən vətəndaşlar fərdi minik avtomobilləri ilə Şuşa şəhərinə və Suqovuşan qəsəbəsinə getməklə bərabər, artıq Laçın şəhərinə də səfər edə bilirlər. Buna görədir ki, Şuşa və Laçın şəhərlərinə fərdi avtomobil ilə turist səfərlərinin sayında xeyli artım müşahidə olunur.

Antiterror tədbirləri nəticəsində azad edilən Xankəndiyə də bir müddətdir ki, turlar təşkil olunur.

Qarabağ və Şərqi Zəngəzurda aparılan kompleks bərpa və quruculuq işləri, dünyasəviyyəli hotellərin tikilib istifadəyə verilməsi də bu ərazilərə səfərlər üçün mühüm zəmin yaradır. Bu ərazilərdə iki beynəlxalq hava limanı (Füzuli və Zəngilan) istifadəyə verilib, Laçın Beynəlxalq Hava Limanı isə sürətlə tikilir. Bütün bunlar bölgəyə səfərlərin daha əlçatan olmasına xidmət edir.

Artıq Azərbaycanın milli aviadaşıyıcısı AZAL Qarabağa müntəzəm reyslərə başlayıb. Bakıdan Füzuli şəhərinə və əks istiqamətdə uçuşlar həyata keçirilir.

Göründüyü kimi, hər ötən gün marşrut istqamətləri genişləndirilir və vətəndaşlarımız rahat şəkildə Qarabağ və Şərqi Zəngəzura səfər edə bilirlər.

Zəngin turizm potensialı

Azad edilən ərazilərimizə səyyahlar da böyük maraq göstərirlər. Məsələn, keçən ayın 25-nə olan məlumata əsasən, Vətən müharibəsindən ötən dörd il ərzində beynəlxalq səyahətçilər böyük qruplarla Qarabağa və Şərqi Zəngəzura 10-dan artıq səfər ediblər.

Mütəxəssislərin proqnozlarına əsasən, qarşıdakı illərdə Qarabağ və Şərqi Zəngəzura daha da böyük maraq yaranacaq və bu ərazilərə turist axınının olacağı gözlənilir. Buna səbəb isə həmin ərazilərin hərtərəfli turizm potensialına, məsələn, yay, qış, tarixi, mədəni, dini ziyarət, sağlamlıq turizmi və sair kimi imkanlara malik olmasıdır.

Bir sözlə, yaxın zamanlarda Qarabağ və Şərqi Zəngəzur nəinki ölkənin, hətta dünyanın ən cəlbedici turizm məkanlarından birinə çevriləcək.

Yasəmən MUSAYEVA,

Azərbaycan.-2024.- 18 avqust (№ 176).- S.8.