ABŞ Cənubi Qafqazda gərginliyi artırmağa çalışır

"ABŞ-nin Ermənistanı silahlandırması heç də sülh məqsədinə xidmət etmir. ABŞ Azərbaycanla Ermənistan arasında aparılan sülh danışıqlarını dəstəklədiyini bildirsə də, hərəkətləri tamamilə bunun əksinədir".

Bu sözləri "Azərbaycan" qəzetinə Milli Məclisin deputatı Azər Badamov deyib. O xatırladıb ki, Azərbaycan 44 günlük Vətən müharibəsində öz ərazilərini işğaldan azad etməklə və 2023-cü ildə həyata keçirdiyi lokal xarakterli antiterror tədbirləri ilə suverenliyini tam bərpa edib. Ölkəmizin məqsədi regionda sülh və əməkdaşlıq mühitini formalaşdırmaqdır. Ona görə də müharibə başa çatdığı ilk gündən Azərbaycan Ermənistana düşmənçilik səhifəsini bağlamağı və münasibətlərin normallaşdırılmasına başlamağı təklif edib. "Bu gün də Azərbaycan öz mövqeyində qalır və Ermənistanın konstitusiyasında ölkəmizə qarşı ərazi iddialarından əl çəkəcəyi və Minsk qrupundan imtina edəcəyi təqdirdə sülh müqaviləsinin imzalanması üçün hər hansı bir maneənin qalmayacağını bildirir. Ermənistan əvvəllər Azərbaycanın tələbləri ilə razı olduğunu bildirsə də, son vaxtlar konstitusiyanın dəyişdirilməsinin daxili işləri olduğunu deyir və Minsk qrupunun ləğv olunması ilə bağlı müraciət olunmasını da sülh müqaviləsi ilə bağlayır. Təbii ki, burada ABŞ-nin Ermənistanı silahlandırması ilə əlaqənin olduğunu görmək heç də çətin deyil", - deyə müsahibimiz bildirib.

ABŞ-nin Ermənistanla birgə hərbi təlimlər keçirdiyini, onun ordusunu NATO standartlarına uyğunlaşdırmağa çalışdığını, bu ölkənin müdafiə nazirliyində öz nümayəndələrini təyin etdiyini qeyd edən deputat Vaşinqtonun Zvartnos hava limanına

2 təyyarə silah və hərbi texnika göndərdiyini də xatırladıb. Bu təyyarələr yalnız müşahidə olunandır, amma gizli yollarla da silahların daşınması da məlumdur. O cümlədən ABŞ ordusunda xidmət edən erməni əsilli hərbçilərdən ibarət bir kontingentin Ermənistana göndərilməsi də real faktdır.

A.Badamov qeyd edib ki, Ermənistan ABŞ-nin dəstəyinə arxayınlaşaraq sülhlə bağlı gündəliyi uzatmağa, hətta danışıqlar prosesindən yayınmağa çalışır: "Yığılan silahlar bir gün işlədilir, onlar anbarlarda saxlamaq üçün gətirilmir. Bu, Amerikanın Ermənistanda mövcudluğunu təmin etməyin göstəricisidir. ABŞ-nin Ermənistanı silahlandırması regionda yeni gərginlik ocağını yaratmaq məqsədlərinə xidmət edir. Dünyada elə bir ölkə yoxdur ki, ABŞ-nin orada hərbi mövcudluğu ona sülh gətirsin. Belə ki, bir sıra ölkələrdə davam edən müharibələri firavan ərəb ölkələrində yaşayışın cəhənnəmə dönməsini, 40 milyonluq Ukraynanın düşdüyü ağır vəziyyəti göz önünə gətirmək olar. Bu baxımdan ABŞ-nin Cənubi Qafqaza gəlməsi ilə regionda vəziyyətin gərginləşəcəyini desək, yanılmarıq".

Deputat vurğulayıb ki, məhz ABŞ-nin Ermənistana hərbi dəstəyindən sonra yenidən silah səsləri eşidilməyə başlanıb. Təbii ki, Ermənistanın hər bir təxribatına adekvat cavab verilir. Amma bu atışmalar nə qədər davam edə bilər, deyə sual yaranır. Azərbaycan 30 il müharibə şəraitində yaşayıb, bu illər ərzində baş verən atışmalardan mülki əhali kifayət qədər zərər çəkib. Bu baxımdan çoxdan silah səsləri eşidilməyən şərti sərhədimizdə atəşkəsin pozulması yenidən narahatlığın yaranmasına səbəb olur. "Ermənistan ABŞ-nin təsiri altına düşən ölkələrdəki mövcud durumları təhlil etməli və qərar qəbul etməlidir. Əks halda onun aqibəti bu gün böyük faciələr yaşayan ölkələrdən fərqli olmayacaq. Azərbaycan təbii ki, öz hərbi gücünü artırır və gələcəkdə baş verə biləcək hər hansı təhdidə cavab verməyə tam hazırdır. Biz müharibəni görmüşük və müharibə meydanında möhkəmlənmişik. Bu baxımdan Ermənistana kimlərin necə kömək etməsindən asılı olmayaraq, biz öz təhlükəsizliyimizi qorumağa qadirik", - deyə deputat vurğulayıb.

Əsmər QARDAŞXANOVA,

Azərbaycan.-2024.- 18 avqust (№ 176).- S.6.