Azərbaycan-Rusiya münasibətləri möhkəm təməl üzərində qurulur

Vladimir Putinin ölkəmizə dövlət səfəri regional məsələlərin müzakirəsi baxımından da əhəmiyyətlidir

"Rusiya Prezidenti Vladimir Putinin Azərbaycana dövlət səfəri iki ölkə arasındakı münasibətlərin, regional və beynəlxalq məsələlərin müzakirəsi baxımından əhəmiyyətlidir. Bu səfər Prezident İlham Əliyev tərəfindən yürüdülən xarici siyasətin çoxistiqamətli olduğunu göstərir".

Milli Məclisin deputatı Musa Qasımlı "Azərbaycan" qəzetinə açıqlamasında bildirib ki, Azərbaycan xalqının tarixən formalaşmış ənənəsində həmişə qonşuya mehriban münasibət bəsləmək, onunla yüksək səviyyədə əməkdaşlıq etmək durub. Rusiya ilə də bizi müəyyən məsələlər yaxınlaşdırır: "İlk növbədə Rusiya bizim qonşumuzdur və bu ölkədə sabitliyin olması bizim faydamızadır. Eyni zamanda Rusiyada çoxmilyonlu Azərbaycan diasporu mövcuddur. Azərbaycanın region və dünya siyasətində rolu getdikcə artır. İki ölkə arasında münasibətlərin normal və səmimi olması heç bir dövlətin və ya dövlətlər qrupunun əleyhinə çevrilməyib. Azərbaycan dövləti yalnız öz milli maraqlarının yanındadır. Maraqlarının təmin olunmadığı yerdə dövlətimiz heç bir zaman addım atmaz".

Heç bir dövlətin Azərbaycanı qonşularına qarşı vasitə kimi istifadə edə bilməyəcəyini vurğulayan deputat bildirib ki, belə cəhdlər həmişə boşa çıxıb. Azərbaycan yalnız milli maraqlarına yönəlmiş, onları təmin edən xarici siyasət yürüdür.

M.Qasımlı hesab edir ki, bu səfər Azərbaycanın mövqelərini daha da möhkəmləndirəcək, əməkdaşlıq daha da genişləndiriləcək, nəqliyyat, kommunikasiya, enerji və digər məsələlərdə yeni addımlar atılacaq. Təbiidir ki, bəzi ölkələrdə bu səfərin mahiyyətinə kölgə salmaq istəyən qüvvələr olacaq. Amma onların hamısı bilməlidir ki, Azərbaycan bütün qonşuları ilə mehriban münasibət qurmaq üçün səylər göstərir. Azərbaycan həmişə dost olan ölkələrlə münasibətlərini daha da möhkəmləndirməyə, dost olmayanları bitərəfləşdirməyə, dosta çevirməyə çalışıb. Azərbaycanın xarici siyasətində düşmən yaratmaq məsələsi yoxdur.

Deputat deyib ki, Azərbaycan dövlətinin xarici siyasəti yalnız sülhə xidmət edir: "Bu səfər Rusiya və Ukrayna arasında müharibənin dayandırılmasına və danışıqların başlanmasına da bir zəmin ola bilər. Prezident İlham Əliyev dünyamiqyaslı böyük dövlət və siyasət adamı olaraq birləşdirici gücdür, kin-küdurətin, nifaqın aradan qaldırılmasına, sülhün yaradılmasına və əməkdaşlığın formalaşdırılmasına çalışan dünya səviyyəli liderdir".

Əsmər QARDAŞXANOVA,

Azərbaycan.-2024.- 20 avqust (№ 177).- S.8.