Azərbaycan əsl qardaşlığını, səmimi dostluğunu növbəti dəfə nümayiş etdirdi

Prezident İlham Əliyevin tapşırığı ilə təyyarəmiz Türkiyədə yanğınsöndürmə əməliyyatlarında iştirak edir

Prezident İlham Əliyevin tapşırığına əsasən, Fövqəladə Hallar Nazirliyinin Aviasiya dəstəsinin "BE-200ÇS" amfibiya tipli təyyarəsi meşə yanğınları ilə mübarizə tədbirlərinə kömək göstərilməsi məqsədilə Türkiyəyə göndərilib. Artıq bir neçə gündür təyyarə yanğınsöndürmə əməliyyatını davam etdirir.

Təmənnasız yardımlar

Səmimiyyət, dürüstlük, tərəfdaşlığa sadiqlik və digər bu kimi sadalamadığımız yüksək keyfiyyətlərlə yanaşı, ehtiyacı olana kömək göstərmək, dar gündə ona dayaq durmaq dövlət olaraq Azərbaycanı dünyaya tanıtdıran, respublikamızın beynəlxalq münasibətlər sistemində nüfuz və mövqeyini şərtləndirən yüksək siyasi-mənəvi amillərdir. Azərbaycan xalqının tarix boyu daşıdığı yüksək mənəvi-əxlaqi dəyərlərdən irəli gələn bu keyfiyyətlər respublikamızın xarici siyasətinin də prioritet cəhətlərindən biri kimi özünü göstərməkdədir.

Bununla bağlı çoxsaylı misallar göstərmək olan. Məsələn, hələ 2006-cı ilin yanvarında Gürcüstanda enerji böhranı yarananda Azərbaycan köməyə çatmışdı. Həmin vaxt şaxtalı qış günlərində qonşu respublika Azərbaycanın sayəsində enerji böhranından xilas ola bilmişdi. 2008-ci ilin məlum avqust hadisələri zamanı da ölkəmiz Gürcüstana enerji köməyini əsirgəməmişdi. 2015-ci ilin iyununda Gürcüstanın paytaxtı Tbilisidə leysan yağışları güclü daşqına səbəb olanda da Azərbaycan köməyə gəlmişdi. Həmin vaxt SOCAR təbii fəlakət nəticəsində zərərçəkənlərə yardımlar etmişdi.

Dost və qardaş Pakistanda baş vermiş zəlzələ və daşqın kimi təbii fəlakətlərin nəticələrinin aradan qaldırılması ilə əlaqədar Azərbaycan tərəfindən bu ölkəyə maliyyə və humanitar yardımlar edilib. Heydər Əliyev Fondu qardaş ölkədə məktəb inşa edib, həmçinin humanitar və xeyriyyə xarakterli tədbirlər həyata keçirib.

Koronavirus pandemiyasının tüğyan etdiyi dövr isə bir daha Azərbaycanın humanizm dəyərlərinə böyük önəm verdiyini, ehtiyacı olana kömək göstərən dövlət olduğunu dünyaya nümayiş etdirdi. Həmin çətin dövrdə respublikamız Ümumdünya Səhiyyə Təşkilatına və bir sıra dövlətlərə maliyyə yardımı etməklə koronavirusla mübarizədə qlobal səviyyədə öz töhfəsini verdi. Dünyada ikinci bir dövlət tapmaq çətindir ki, pandemiya dövründə Azərbaycan qədər humanitar yardım göstərsin.

Azərbaycanın humanitar dəstək göstərdiyi ölkələrdən biri də Ukraynadır. İndiyədək Azərbaycan tərəfindən bu ölkyə dərman, qida, elektrik generatorları və sairə daxil olmaqla ümumilikdə 40 milyon ABŞ dolları dəyərində yardım edilib.

Qısa nəzər saldığımız bu faktlar hazırda beynəlxalq münasibətlər sistemində demək olar ki, nadir rast gəlinə bilən humanizm nümunələridir. Respublikamız tərəfindən edilən bu köməkliklər, əlbəttə ki, təmmənasız olub və Azərbaycanın böyüklüyünün, xalqımızın yüksək mənəviyyatının təcəssümünə çevrilib.

Azərbaycanın nümunəsi

Dövlətimizin meşə yanğınları ilə mübarizədə Türkiyəyə yardım etməsi isə birinci dəfə deyil. Xatırladaq ki, hələ 2021-ci ilin yayında Türkiyədə əsasən, turizm bölgəsini əhatə edən böyükmiqyaslı güclü meşə yanğınları baş verəndə yardım üçün əlini ilk uzadan ölkə Azərbaycan olmuşdu. Həmin vaxt Prezident İlham Əliyevin tapşırığına əsasən, Fövqəladə Hallar Nazirliyinin yanğınsöndürmə qüvvələri müxtəlif qruplarla Türkiyəyə yollanmışdılar. Azərbaycanın çoxsaylı yanğınsöndürənləri, xüsusi təyinatlı xilasetmə texnikaları, amfibiya təyyarəsi yanğınların daha güclü olduğu yerlərdə öz missiyalarını peşəkarlıqla həyata keçirmiş, fəlakətin daha da genişlənməsinin qarşısını almışdılar. Ümumilikdə, həmin vaxt yanğınsöndürmə əməliyyatlarında Azərbaycanın 750-yə yaxın xilasedicisi, 100-ə yaxın xüsusi texnikası iştirak etmişdi.

Eləcə də ötən ilin fevralında Türkiyədə mərkəzi Kahramanmaraş olmaqla, bir neçə vilayət və şəhəri əhatə edən ard-arda dağıdıcı zəlzələlər zamanı da ilk yardıma gələn Azərbaycan olmuşdu. Zəlzələ baş verəndən dərhal sonra dövlətimiz və xalqımız çağırış gözləmədən bütün yardım imkanlarını səfərbər etdi. Şiddəti 500 atom bombası gücünə bərabər hesablanan, 53 mindən çox insanın ölümü, 39 minə yaxın binanın dağıldığı, ümumilikdə 14 milyon insanın həyatına təsir edən həmin zəlzələ vaxtı ölkəmizdən Türkiyəyə çoxsaylı xilasedicilər, həkimlər, könüllülər, o cümlədən mobil səhra hospitalları, xüsusi texnikalar, çadırlar göndərildi. Dövlətimizlə yanaşı, xalqımız da Türkiyəyə yardım üçün səfərbər olundu. Türkiyəyə bir neçə təyyarə humanitar yardım göndərildi, o cümlədən Heydər Əliyev Fondu bu prosesdə fəal iştirak etdi. Yardım aparan yük maşınlarının sayı-hesabı yox idi. Türkiyədə baş vermiş zəlzələdən sonra orada fəaliyyət göstərən yeganə könüllü heyət Azərbaycan könüllüləri olub. Onu da qeyd edək ki, Türkiyədəki zəlzələ bölgəsini ən son tərk edən heyət də Azərbaycandan göndərilən yardım və xilasedici briqadalar olub.

Respublikamız hazırda Kahramanmaraşda humanitar fəaliyyətini davam etdirərək bu ərazidə aparılan yenidənqurma və bərpa işlərində, sosial obyektlərin inşasında yaxından iştirak edir. Hazırda dövlətimiz tərəfindən Kahramanmaraş vilayətində 32 hektar sahəni əhatə edən "Azərbaycan" adlı yaşayış məhəlləsinin inşası davam edir. Məhəllədə yaşayış binaları, ibtidai məktəb və uşaq bağçası, mədəniyyət mərkəzi olacaq. Binalardan 71-i yaşayış üçün nəzərdə tutulub.

Bəli, qardaş xoş gündə olduğu kimi, dar gündə də bir-birinin yanında olar. Necə ki, Azərbaycan öz nümunəsi ilə bunu təsdiq edir. Bu günlərdə amfibiya tipli təyyarəni yanğınlarla mübarizə məqsədilə Türkiyəyə göndərməklə Azərbaycan əsl qardaşlığını və səmimi dostluğunu növbəti dəfə nümayiş etdirdi.

Ümumiyyətlə, Azərbaycan dost və qardaş bildiyi ölkələrə və strateji tərəfdaşlara hər zaman münasibətlərin bu cür məzmunundan irəli gələrək səmimi olub. Etdiyi köməyə görə hər hansı qarşılıq, əvəz güdməyib, bundan hansısa maraq və məqsəd naminə istifadə etməyib, yardım məsələlərini ikitərəfli əlaqələrin predmetinə çevirməyib. Əsl qardaşlıq və dostluq da belə olmalıdır.

Rəşad CƏFƏRLİ,

Azərbaycan.-2024.- 20 avqust (№ 177).- S.8.