Uğurlu
müttəfiqlik tam yeni mərhələdə
Rusiya Prezidentinin Azərbaycana dövlət səfəri
əlaqələrin daha
da möhkəmlənməsinə
xidmət edəcək
"Azərbaycan
ümumbəşəri dəyərlərə sadiq olaraq
dünya xalqları ilə, o cümlədən də şimal
qonşumuz Rusiya Federasiyası ilə dostluq, sülh və əmin-amanlıq
şəraitində yaşamağı və bu məqsədlə
qarşılıqlı fəaliyyət göstərməyi
ali konstitusion niyyət kimi müəyyən edib. Ötən dövrdə Bakı və Moskva arasında münasibətlər hamılıqla
qəbul edilmiş beynəlxalq hüquq normalarında nəzərdə
tutulan prinsiplər əsasında qurulub və uğurla inkişaf edib".
Milli Məclisin
deputatı Bəhruz Məhərrəmov "Azərbaycan"
qəzetinə açıqlamasında
bildirib ki, hazırkı həssas dönəmdə Prezident İlham Əliyevin dəvəti ilə Vladimir Putinin ölkəmizə dövlət
səfəri Azərbaycan-Rusiya
münasibətləri üçün
tam yeni mərhələ deməkdir.
Dövlət başçımızın
ifadə etdiyi kimi, bütün sahələrdə qarşılıqlı
fəaliyyətimizi gücləndirmək
əzmindəyik və
Rusiya Prezidenti Vladimir Putinin Azərbaycana hazırkı
dövlət səfəri
ikitərəfli münasibətlər
üçün faydalı
olacaq. "Ulu Öndər Heydər Əliyev hələ 22 sentyabr 1993-cü ildə Ali Sovetdə gənclərin nümayəndələri
ilə görüşdə
qəti bir tezis irəli sürmüşdü ki, Azərbaycanın Rusiya ilə əlaqələri
yüksək səviyyədə
olmalıdır. Dahi lider ölkələrimiz arasında dərin siyasi, iqtisadi, mədəni və humanitar əlaqələrə
əsaslanaraq, şimal
qonşumuzla münasibətlərin
daha da yaxşılaşdırılması
üçün heç
bir maneə görmür, əksinə
XIX və XX əsrlərdə
Azərbaycanın inkişafının
Rusiya ilə birbaşa bağlı olması, Avropa elmi və mədəniyyətinin
ölkəmizə Rusiya
vasitəsilə gəlməsi
kimi amilləri iki ölkə arasında əlaqələrin
dərinləşdirilməsi üçün mühüm
elementlər kimi qiymətləndirirdi", - deyə
o bildirib.
Ötən
əsrin 90-cı illərində
Azərbaycan-Rusiya münasibətlərinin
mürəkkəb dövrünü
yaşadığını xatırladan deputat bildirib ki, həmin
ərəfədə ölkələrimiz
arasında əlaqələr
yaxın 200 illik tarixinin ən arzuolunmaz səviyyəsinə
enmişdi. Lakin Ulu Öndərin xalqın təkidi ilə yenidən hakimiyyətə qayıdışı
əlaqələrimizdə dönüşə səbəb
olsa da, Rusiyanın özündə
vəziyyətin, o cümlədən
idarəçilikdə böhranın
yaşanması prosesi
ləngidir və cəhdlər lazımi effektini vermirdi. Rusiyada Vladimir Putinin siyasi olimpə gəlişi isə vəziyyəti tamam dəyişdi və nəhayət ki, Bakının cəhdlərinə Moskvadan
adekvat reaksiyalar gəlməyə başladı
və bu, faktiki yeni dövr
üzrə münasibətlərimizin
başlanğıcı oldu.
Prezident İlham Əliyevin aprelin 22-də Moskvada rusiyalı həmkarı ilə bərabər Baykal-Amur Magistralının 50 illik yubileyi münasibətilə
dəmir yolu sahəsinin veteranları və işçiləri
ilə görüşdə
də xüsusi qeyd etdiyi kimi:
"Biz yaxşı bilirik ki, 2000-ci illərin əvvəllərində
ölkələrimiz arasındakı
dostluq və mehriban qonşuluq münasibətlərinin əsasını
məhz Vladimir Vladimiroviç Putin və Heydər Əlirza oğlu Əliyev qoyublar. Vladimir Vladimiroviç
2001-ci ildə Azərbaycana
səfər edib və bu, bizim
bu gün birlikdə keçdiyimiz böyük yolun başlanğıcı olub".
B.Məhərrəmov qeyd edib ki,
Ulu Öndərin siyasi irsi bu
gün Azərbaycanın
inkişaf strategiyasının
nüvəsini təşkil
edir, o cümlədən
xarici siyasət kursu üzrə dövlətçiliyin varisliyi
Prezident İlham Əliyev tərəfindən
uğurla davam etdirilir: "Azərbaycanın
Rusiya siyasəti ötən dövr ərzində yeni mərhələyə qalxaraq,
əlaqələrimiz "Azərbaycan
Respublikası ilə Rusiya Federasiyası arasında müttəfiqlik
qarşılıqlı fəaliyyəti
haqqında" 22 fevral
2022-ci il tarixli Bəyannamə ilə özünün ən uğurlu dönəminə
qədəm qoyub. Məhz bu sənədin
qəbulu ilə iki ölkənin müstəqilliyi, suverenliyi,
ərazi bütövlüyü
və dövlət sərhədlərinin toxunulmazlığına
qarşılıqlı hörmət,
eləcə də bir-birinin daxili işlərinə qarışmamaq
prinsipləri əsasında
müttəfiqlik dövrü
başlandı.
Ümumiyyətlə, Azərbaycan üçün
Rusiyanın dünya siyasətində yeri çox aydındır. Cənab İlham Əliyevin bir neçə ay öncə Moskvada Prezident Vladimir Putinlə təkbətək
görüşü zamanı
ifadə etdiyi kimi, Rusiya Qafqazda
və daha geniş coğrafiyada regional təhlükəsizlik
üzrə əsas ölkədir və bizim əməkdaşlıq
və qarşılıqlı
fəaliyyətdən çox
şey asılıdır.
Cənab Vladimir Putinin Bakıya dövlət səfəri
çərçivəsində prezidentlərin birgə bəyanatı zamanı cənab İlham Əliyevin də ifadə etdiyi kimi, Azərbaycan və Rusiya müttəfiqlər, dostlar,
yaxın tərəfdaşlar
və qonşular kimi fəaliyyət göstərirlər".
Rusiyanın
Azərbaycana yanaşmasının
da kifayət qədər aydın olduğunu vurğulayan deputat deyib ki,
Vladimir Putinin ilk növbədə Ulu Öndər Heydər Əliyev barədə düşüncələri,
əslində, Rusiyanın
Azərbaycana münasibətinin
təməlində dayanan
bazis hesab oluna bilər. Bu gün münasibətlərin
xarakterinə, habelə
ölkələrimiz arasında
əməkdaşlığın prioritetlərini müəyyən
edən müttəfiqlik
qarşılıqlı fəaliyyəti
haqqında 22 fevral
2022-ci il tarixli Bəyannaməyə diqqət
etsək, əminliklə
deyə bilərik ki, Bakı-Moskva əlaqələri bərabərhüquqlu
tərəfdaşlıq, qarşılıqlı
hörmət və etimada əsaslanır. "Azərbaycan
Respublikası ilə Rusiya Federasiyası arasında müttəfiqlik
qarşılıqlı fəaliyyəti
haqqında" 43 maddəlik
Bəyannamədə milli
maraqlara, bərabərhüquqlu
əməkdaşlığa, BMT-nin mərkəzi rolunu qəbul etməklə beynəlxalq
hüququn ümumtanınmış
prinsip və normalarına, xüsusən
iki ölkənin müstəqilliyinə, dövlət
suverenliyinə, ərazi
bütövlüyünə və dövlət sərhədlərinin toxunulmazlığına
qarşılıqlı hörmət
prinsiplərinə riayət
edilməsi 9 fərqli
maddədə təkrarlanır.
Eyni zamanda sənəddə beynəlxalq
hüquqa zidd, müstəqilliyimizi, suverenliyimizi
təhdid edən, Azərbaycanın digər
dövlətlərlə ikitərəfli
və çoxtərəfli
əlaqələrinə müdaxilə
edən, beynəlxalq təşkilatlara üzvlüyü
ilə bağlı məhdudlaşdırma müəyyənləşdirən,
yaxud Rusiyanın xarici siyasətini birmənalı dəstəkləmək
öhdəliyi niyyətini
güdən nəinki
heç bir maddə, ümumiyyətlə,
hansısa bir məqam yoxdur. Bu sənədin imzalanması ilə Prezident İlham Əliyev çox gərgin bir dövrdə balansı qoruyaraq Azərbaycanı Rusiya ətrafında cərəyan edən təhlükəli tendensiyalardan
sığortalamağı bacarmışdı.
Etiraf etməliyik ki, Rusiya kimi
böyük dövlətlərlə
münasibətlərdə "qızıl orta"nı
tapmaq şərtdir. Qafqazda isə Moskva ilə münasibətlərdə bu
"qızıl orta"nı
taparaq müstəqilliyinə,
ərazi bütövlüyünə
xələl gətirməyən,
bərabərhüquqlu münasibətlər
qura bilən yeganə lider İlham Əliyevdir. "Nəticə etibarilə Prezident İlham Əliyev nəinki ən çətin və təhlükəli periodlarda ölkənin ərazi bütövlüyü
və suverenliyini qoruyub saxlaya bildi, üstəlik, Rusiya kimi bölgədə
ciddi maraqları olan bir supergücün
müttəfiqi Ermənistana
rəğmən, 44 günlük
savaşda Azərbaycanın
mövqeyinə siyasi dəstək verməsinə
nail oldu. Həmçinin bir
neçə ay öncə 10 noyabr Bəyanatına müvafiq
olaraq Azərbaycanın
Qarabağ iqtisadi rayonuna müvəqqəti
olaraq yerləşmiş
Rusiya Federasiyası sülhməramlılarının Azərbaycan ərazisindən
vaxtından ilyarım
əvvəl çıxarılmasına
nail olundu. Sirr deyil ki, çoxsaylı
"maraqlı" dairələr
cəfəng "proqnozlar"
tirajlayaraq sülhməramlı
kontingenti Rusiyanın Cənubi Qafqazdakı yeni bazası kimi təqdim edir və ölkə
daxilində gərginlik
yaratmaq üçün
hətta prosesi işğal belə adlandırırdılar. Hətta
ABŞ-nin timsalında
kollektiv Qərb Moldova
və Gürcüstan
təcrübəsinə istinad
edərək, sülhməramlı
məsələsinə Bakı
və Moskva arasında potensial böhran kimi baxaraq, iki ölkə
arasında gərginliyə
ümid edirdi. Lakin cənab İlham Əliyev Azərbaycan-Rusiya münasibətlərinə
xələl gətirmədən
vaxtından əvvəl
bu məsələni kökündən həll
etməklə göstərdi
ki, Azərbaycan sözün əsl mənasında, suveren, qüdrətli bir dövlətdir və ölkəmizi digər dövlətlərlə, Prezident
İlham Əliyevi isə digər liderlərlə müqayisə
etmək olmaz. Azərbaycan Prezidenti qətiyyəti ilə bütün iddialara son qoymaqla bir
daha sübut etdi ki, bu
ölkə üçün
nəyi, necə, nə vaxt etmək
lazımdır, hər
kəsdən daha yaxşı bilir", - deyə müsahibimiz əlavə edib.
Onun sözlərinə
görə, bunlar beynəlxalq arenada Prezident İlham Əliyevin şəxsiyyətinə,
onun güc və imkanlarına baxış rakursunu bir daha təməlli
formada yeniləyib. Hətta bizə dost olmayan subyektlər
belə İlham Əliyevin miqyası qarşısında acizliklərini
etiraf etmək məcburiyyətində qaldılar.
Çünki bütün
Qərb qütbünü
təkbaşına qarşısına
alaraq hələ ki mübarizədə qalib tərəf kimi çıxış edən nəhəng güc olaraq Rusiyanın imkanları hər kəsə yaxşı bəllidir. Onlar əmin idi ki, Azərbaycan
şimal qonşusunun bütün mümkün şərtləri ilə hesablaşmağa məhkumdur.
Xüsusən indiki həssas dönəmdə
Moskva ilə bərabərhüquqlu münasibətləri
təmin etmək sadə məsələ deyil. Lakin dövlət
başçısı göstərdi
ki, Azərbaycan qətiyyətli, milli maraqlara sadiq lider tərəfindən idarə olunan, müstəqil, suveren və qüdrətli bir dövlətdir.
B.Məhərrəmov deyib ki, Rusiya
sülhməramlılarının Azərbaycandan çıxarılması
Bakı-Moskva əlaqələrinin
yüksək səviyyəsi
ilə yanaşı, mühüm bir reallığı da meydana çıxarıb:
"Məlum oldu ki, Rusiyanın Gümrüdəki 102-ci hərbi
bazasını və bütövlükdə rus
hərbçilərini Ermənistandan
çıxarmaq üçün
dəridən-qabıqdan çıxan
kollektiv Qərb sülhməramlıların Azərbaycandan
getməsindən məmnun
deyil. Hətta ilk günlər ABŞ Dövlət Departamentinin rəsmisi hisslərini cilovlaya bilməyib Azərbaycandan sülhməramlıları
heç bir gərginlik yaşanmadan çıxarmasına görə
Rusiyanı "etibarsız
müttəfiq" adlandırmışdı".
Deputat vurğulayıb
ki, Azərbaycan müttəfiqlik münasibətində
olduğu Rusiya ilə regionda gedən proseslərlə bağlı mütəmadi
təmasları əhəmiyyətli
hesab edir. Bakı bu səfərin
ikitərəfli münasibətlərin
gündəliyi və
qarşılıqlı maraq
doğuran məsələlərin,
o cümlədən ölkələrimiz
arasında imzalanmış
sənədlərin və
yol xəritələrinin
həyata keçirilməsi,
təhlükəsizlik, nəqliyyat,
energetika, hərbi-texniki,
humanitar sahələrdə
əməkdaşlığın perspektivlərinin müzakirəsi
üçün yaxşı
imkan yaratdığı
qənaətindədir. Bu
gedişat, əslində,
ölkələrimiz arasında
müttəfiqlik qarşılıqlı
fəaliyyəti haqqında
Bəyannamənin müddəalarının
uğurla həyata keçirilməsi deməkdir.
Bu səfər çərçivəsində Azərbaycanla Rusiya arasında iqtisadi, ekoloji, sosial, qida təhlükəsizliyi
və səhiyyə sahələrində ümumilikdə
6 sənəd imzalandı.
Qarşılıqlı faydalı
ticari əməkdaşlığın
qurulmasına böyük
diqqət yetirən Rusiya üçün bu sənədlərin önəmi çox böyükdür. Vladimir
Putin Prezident İlham Əliyevlə mətbuata bəyanatında
da açıq formada ifadə etdi ki, Rusiya
və Azərbaycan bir-biri üçün mühüm iqtisadi tərəfdaşlardır və
əməkdaşlığın hər bir istiqaməti
Moskva üçün
strateji əhəmiyyət
kəsb edir. Bu mənada, ali qonaq Azərbaycana
səfərinin yekunlarından
məmnundur və aparılan danışıqların,
əldə olunan razılaşmaların Rusiya-Azərbaycan
strateji tərəfdaşlığının
daha da möhkəmlənməsinə
xidmət edəcəyi
qənaətindədir. Öz
növbəsində Azərbaycan
da bu qənaəti
bölüşür və
möhtərəm Prezident
haqlı olaraq hesab edir ki,
Cənubi Qafqaz regionunda sabitlik və təhlükəsizlik
bir çox hallarda Rusiya ilə Azərbaycan arasında sıx qarşılıqlı fəaliyyətdən
asılıdır. Vladimir
Putinin təbirincə
desək, sabitlik bu regionun bütün
dövlətlərinin və
xalqlarının köklü
maraqlarına tam cavab verir.
Əsmər QARDAŞXANOVA,
Azərbaycan.-2024.-
21 avqust (№ 178).- S.5.