6
ayda 95 faizi özəl sektorda olmaqla 45,4 min yeni iş yeri
açılıb
Sirr deyil ki, hər bir
hökumətin xüsusi
diqqət yetirdiyi sahələrdən biri də əhalinin məşğulluğunun təmin
edilməsidir. Məşğulluq
əhalinin sosial təminatında və firavan yaşamasında önəmli rol oynayır. O üzdən, bu sahədən yan keçmək, sadəcə, mümkün
deyil.
Azərbaycanda da
dövlət siyasətinin
əsas istiqamətlərindən
biri əhalinin sosial müdafiəsidir. Məşğulluğun təmin
edilməsi isə sosial müdafiənin ən etibarlı formasıdır. Prezident İlham Əliyev dəfələrlə çıxışlarında
əhalinin məşğulluğunun
təmin edilməsi və yeni iş
yerlərinin açılmasının
əhəmiyyətini vurğulamış
və bu istiqamətdə konkret qərarlar qəbul etmiş, əməli addımlar atmışdır.
Nəticədə, ölkəmizdə
icra edilən sosial-iqtisadi islahatlarda əhalinin əmək fəaliyyətinin təmin
edilməsi mühüm
məsələ kimi önə çıxmışdır.
Bu gün əhalinin məşğulluğunun
daha çox təmin edilməsi üçün yeni formalardan istifadə olunur, müxtəlif layihələr çərçivəsində
beynəlxalq qurumlarla əməkdaşlıq edilir.
Və bütün bunlar təbii ki, nəticəsiz qalmır. Dövlət Statistika Komitəsindən
verilən məlumata görə, cari il avqustun 1-nə olan ilkin məlumatlara
əsasən, ölkə
üzrə iqtisadi fəal əhalinin sayı 5 milyon 288,9 min nəfər olmuşdur. Onlardan 5 milyon 5,2 min nəfərini məşğul
əhali təşkil
edir. Cari il iyulun 1-nə olan vəziyyətə Azərbaycanda muzdla çalışan işçilərin
sayı 1 milyon 760,5 min nəfərdir. Onlardan 887,5 min nəfəri dövlət,
873,3 min nəfəri qeyri-dövlət sektorlarında
çalışmışdır. Həmin dövr qeyri-neft sektorunda çalışanların sayı
neft sektorunda çalışanların sayını
üstələmişdir. İşləyənlərin
üstünlük təşkil
etdiyi sahələr məhsul istehsalı, xidmət sahəsi, təhsil, səhiyyə və sosial xidmətlərin göstərilməsi
olmuşdur.
Cari ilin 6 ayında ölkə üzrə 45,4 min yeni iş yeri
açılmışdır. Həmin iş yerlərinin 95,1 faizi qeyri-dövlət sektorunun
payına düşmüşdür.
Ümumilikdə yeni yaradılan iş yerlərində tikinti, ticarət, nəqliyyat vasitələrinin təmiri,
emal sənayesi, turistlərin yerləşdirilməsi
və ictimai iaşə sahələri
üstünlük təşkil
edir.
Paralel olaraq Əmək və Əhalinin Sosial Müdafiəsi Nazirliyinin tabeliyindəki Dövlət
Məşğulluq Agentliyi
tərəfindən özünüməşğulluq
proqramı iştirakçılarının
aktivlərlə təminatı
işləri davam edir. Son vaxtlar
Bakı və ölkəmizin regionlarında
600-dək işsiz və
işaxtaran şəxs
bu proqram çərçivəsində mal və materiallar
formasında aktivlərlə
təmin olunub. Verilmiş aktivlər hesabına həmin şəxslər üçün
kənd təsərrüfatı,
istehsal və xidmət sahələri üzrə kiçik təsərrüfatlar qurulub.
Proqrama cəlb olunanlar üçün ilk mərhələdə
kiçik biznesin təşkili və idarə olunmasına dair bilik və
bacarıqların öyrədildiyi
təlim kursları keçirilir. Təlimlərdən
sonra onlar biznes planlarına uyğun olaraq müxtəlif aktivlərlə
təmin edilirlər.
Dövlət Məşğulluq
Agentliyi tərəfindən
işğaldan azad edilmiş ərazilərə
köçürülən sakinlərin dayanıqlı
məşğulluğunun təminatı
istiqamətində də
zəruri tədbirlər
görülür. Əhalinin
məşğulluq xidmətlərinə
əlçatanlığının artırılması məqsədi
ilə agentliyin Şərqi Zəngəzur
Regional Məşğulluq filialının
Laçın xidmət
şöbəsi istifadəyə
verilib. Xidmət şöbəsində məşğulluq
xidmətləri ilə
bağlı müraciət
edən sakinlərin qeydiyyatı aparılır,
onların məşğulluq
imkanları qiymətləndirilir.
Fərdi məşğulluq
proqramları tərtib
edilməklə sakinlərin
aktiv məşğulluq
tədbirlərinə cəlb
olunması, habelə onlara karyera məsləhəti xidmətlərinin
göstərilməsi istiqamətində
işlər aparılır.
Agentlikdən verilən
məlumatda bildirilir ki, Böyük Qayıdış proqramı
çərçivəsində Laçın rayonu üzrə doğma torpaqlarına qayıdan vətəndaşların məşğulluğunun
təmin olunması üçün genişhəcmli
işlər görülüb.
Bunun sayəsində əhalinin məskunlaşdığı
Laçın şəhəri,
Zabux və Sus kəndlərində
900-dən artıq şəxsin
məşğulluğu təmin
edilib. Onlardan 800-dən
çoxu vakansiya üzrə işlə təmin olunub, 32 nəfər özünüməşğulluq
proqramına cəlb edilərək aktivlərlə
təmin edilib. Bundan əlavə, Laçın rayonunda 5 fərqli ixtisas üzrə peşə hazırlığı kursları
təşkil edilib.
Rüstəm
KAMAL,
Azərbaycan.-2024.-
22 avqust (№179).- S.10.