Daha 34 ailə yurd sevinci yaşadı

Cəbrayılın artıq 1000-ə yaxın sakini var

Dünən Cəbrayıl şəhəri 129 nəfərdən (34 ailə) ibarət növbəti qayıdış karvanını qarşılayıb. Uzun illərin həsrətindən sonra mərhələli olaraq dədə-baba yurdlarına qayıdan cəbrayıllıların sayı artıq 912 nəfərə çatıb. 2024-cü ilin sonuna qədər isə Cəbrayıl şəhərinə 2158 keçmiş məcburi köçkünün qayıtması nəzərdə tutulub.

Bu günü həsrətlə gözləyən cəbrayıllılar təəssüratlarını bölüşüblər. Doğma elinə qovuşduğu üçün sevinci çöhrəsindən oxunan keçmiş məcburi köçkün İntizam Nurəliyev qürurverici tarixin şanlı səhifələrinə şahidlik etdiklərini deyir: "Tarixi günlər yaşayırıq. 30 illik torpaq həsrətilə yaşayan xalq üçün bu, ən böyük hədiyyədir. Şükürlər olsun ki, torpaqlarımız düşmən işğalından azad edilib. Müzəffər Ali Baş Komandan İlham Əliyevə, Birinci vitse-prezident Mehriban Əliyevaya, torpaqlarımızı işğaldan qurtaran rəşadətli Azərbaycan Ordusuna, qəhrəman əsgər və zabitlərimizə minnətdarlığımı bildirirəm. Allah şəhidlərimizə rəhmət etsin, qazilərimizə şəfa versin. Yurdumuza qovuşmağımızda ən xırda əməyi belə olan hər kəsə təşəkkürümü bildirirəm. Sağ olsunlar, var olsunlar. Bircə heyifsiləndiyimiz məqam odur ki, bəzi doğmalarımız Cəbrayılı görmək arzusu ilə həyatdan köçdülər".

Uzun illərdən sonra ilk dəfə doğma torpağına addım atdığını söyləyən Cəbrayıl sakini Mahirə Niftəliyeva ən böyük arzusunun çin olduğunu söyləyir: "Özü də hər bir şəraitlə təmin olunmuş evlərə gedirik. Həmişə baxıb həsəd aparırdım. Arzu edirdim ki, mən də tezliklə öz yurduma qayıdım. Təəssüflənirəm ki, bu illər ərzində itkilərimiz də oldu. Həyat yoldaşım həyatdan köçdü. Ancaq şükürlər olsun, bu gün ailəmlə - övladlarım, nəvələrimlə yurduma qayıda bilirəm. Bundan sonra ancaq yaxşı günlər yaşayacağımıza inanıram. Bugünkü günü bizə yaşadanlar var olsunlar".

Keçmiş məcburi köçkün Pəri Xudiyevanın sözlərinə görə, illərdir xəyallarında yaşatdığı yerlərə, gəncliyinə, xatirələrinə qovuşub: "Allah həsrətində olanların hamısına belə gün nəsib etsin. Çox sevinirik. Bu işdə əməyi keçən hər kəsə minnətdarlığımı bildirirəm. Hamıya belə xoş gün nəsib olsun, öz torpağına getsin. Bunlar əvəzolunmaz hisslərdir. Burdan çıxanda cavan idim. İndi 65 yaşım var. 42 il məktəbdə müəllim işləmişəm, yenicə təqaüdə çıxmışam. Bundan sonra rayonumuzda istirahətimi davam etdirəcəm. Qalan ömürümü burada keçirmək istəyirəm".

Müharibədən qısa müddət sonra azadlığına qovuşmuş yurd yerlərimizdə irimiqyaslı bərpa-quruculuq işlərinin həyata keçirilməsi nəticəsində Qarabağ və Şərqi Zəngəzurda həyat yenidən öz axarına qayıdır, torpaqlarından zorla didərgin salınan vətəndaşlarımız fərəh və qürurla yeni həyata başlayırlar. İndiyədək 2367 ailə - 9139 nəfər doğma ocağına geri dönüb. 175 ailə (871 nəfər) Zəngilan rayonunun Ağalı kəndində, 20 ailə (90 nəfər) Tərtər rayonunun Talış kəndində, 570 ailə (2090 nəfər) Laçın şəhərində, 823 ailə (3136 nəfər) Füzuli şəhərində, 217 ailə (823 nəfər) Laçın rayonunun Zabux kəndində, 59 ailə (215 nəfər) Laçın rayonunun Sus kəndində, 220 ailə (823 nəfər) Şuşa şəhərində, 46 ailə (179 nəfər) Xocalı şəhərində, 237 ailə (912 nəfər) Cəbrayıl şəhərində məskunlaşıb.

2026-cı ilin sonu - Böyük qayıdışın birinci mərhələsi bitənədək Qarabağ və Şərqi Zəngəzurda 34 min 500 ailənin təhlükəsiz məskunlaşması təmin ediləcək. Qüdrətli dövlətimiz tərəfindən həyata keçirilən məqsədyönlü və genişmiqyaslı işlər sayəsində keçmiş məcburi köçkünlərin doğma yurda qayıdışı ilə bağlı qarşıya qoyulan hədəflərin uğurla gerçəkləşdiriləcəyindən əminik.

Ülkər XASPOLADOVA,

Azərbaycan.-2024.- 3 dekabr (№ 265).- S.10.