Co Bayden cinayətkar oğlunu əfv edib

Başqalarına demokratiya "dərs"i keçmək işin asan tərəfidir. Səmimi görünmək, inam qazanmaq, ən əsası ədalətli olmaq üçün söylədiklərinə ilk növbədə özün əməl etməlisən.

Əks təqdirdə, nə sözlərinin dəyəri, nə də özünə etibar qalır. Uzaq ölkələrdə demokratiya, ədalət "axtaran", beynəlxalq qanunlardan dəm vuran ABŞ Prezidenti Co Bayden vəzifəsindən sui-istifadə edərək həbsi nəzərdə tutulan oğlu Hanter Baydenin əfvinə görə qınaq obyektinə çevrilib.

Hanter Bayden qanunsuz əməllərinə görə hələ xeyli müddət əvvəl nəinki ABŞ-nin, eləcə də dünya mediasının diqqətində olub. O, 2018-ci ildə narkotik maddənin təsiri altında odlu silah alması ilə bağlı üç ağır maddə üzrə təqsirli bilinib.

Hanter Bayden həmçinin vergidən yayınma ilə əlaqədar irəli sürülmüş 9 ittiham üzrə məhkəmədə təqsirli olduğunu etiraf edib. ABŞ Prezidentinin oğlunu vergi ittihamı üzrə maksimum 17 il həbs cəzası və 1,35 milyon dollara qədər cərimə, silah alışına görə 25 ilə kimi azadlıqdan məhrumetmə cəzası və 750 min dollar cərimə gözləyirdi. Silah alışı ittihamı üzrə onun həbsi dekabrın 13-nə, vergi məsələsi ilə bağlı dekabrın 16-na nəzərdə tutulub.

Hələ məhkəmədən qabaq oğlu təqsirli bilindiyi halda onu əfv etməyəcəyini bəyan edən ABŞ-nin dövlət başçısı Co Bayden nə qanuna əməl edib, nə də verdiyi sözə yiyə durub. Məlum olduğu kimi, ABŞ Prezidenti silah alışı məsələsində təqsirli bilinən və dekabrda həbsi nəzərdə tutulan oğlu Hanter Baydeni əfv edib. Ötən ay Prezident oğlunu əfv etmək niyyətinin olmadığına dair verdiyi açıqlamaya baxmayaraq, onun əfv edilməsinə dair bəyanat yayılıb.

Xarici KİV-in yaydığı məlumata görə, Co Baydenin bəyanatında deyilir: "Bu gün oğlum Hanter üçün əfv imzaladım. Vəzifəyə gəldiyim gündən Ədliyyə Departamentinin qərar qəbul etməsinə mane olmayacağımı dedim, oğlumun ədalətsiz şəkildə mühakimə olunmasını müşahidə etdiyim halda belə sözümü tutdum. Hanterə fərqli münasibət göstərildiyi aydındır. Onunla bağlı ittihamlar yalnız Konqresdəki bir neçə siyasi rəqibimin mənə hücum etməyə və seçilməyimə qarşı çıxmağa başladıqlarından sonra səsləndirildi".

Ölkənin hazırkı lideri Co Baydenin qanunları heçə sayaraq verdiyi bu qərarı hiddətlə qarşılayanlardan biri ABŞ-nin yeni seçilmiş prezidenti Donald Tramp olub. O, bunu sui-istifadə və hüququn aliliyinin pozulması kimi dəyərləndirib. "Ədalətdən sui-istifadə ilə bağlı belə olur" - ABŞ-nin 47-ci prezidenti Donald Tramp öz paylaşımında yazıb.

Nümayəndələr Palatasının üzvü Qreq Stenton isə "ABŞ prezidenti Co Bayden oğlu Hanteri əfv etməklə səhv edib" deyib. Qreq Stenton öz paylaşımında qərəzli olmadığına, sadəcə verilən əfvin qanundan kənar olduğuna diqqəti çəkib: "Mən prezident Baydenə hörmət edirəm, lakin onun bu məsələdə səhv etdiyini düşünürəm". Qreq Stenton Hanter Baydenə qarşı məhkəmənin siyasi motivli təqib olmadığını, onun ağır cinayətlər törətdiyini və məhkəmə tərəfindən təqsirli bilindiyini vurğulayıb.

Nümayəndlər Palatasının üzvü Jeyms Komer isə prezident ailəsinin əvvəldən axıra qədər yalan danışdığını bildirib: "O, nəinki yalandan oğlunun xarici biznes tərəfdaşları ilə görüşmədiyini və oğlunun heç bir səhv etmədiyini iddia etdi, həm də Hanter Baydeni əfv etməyəcəyini deyərək yalan danışdı".

ABŞ Prezidenti Co Baydenin oğlu Hanteri əfv etməsi dünya miqyasında əks-səda doğurub. Rusiya Xarici İşlər Nazirliyinin sözçüsü Mariya Zaxarova isə ABŞ-nin hazırkı prezidenti Co Baydenin oğlu Hanteri əfv etmək qərarını "demokratiyanın karikaturası" adlandırıb. Mariya Zaxarova bu barədə "İzvestiya" qəzetinə müsahibəsində deyib.

Co Baydenin hakimiyyəti təhvil verməyə az qalmış atdığı bu addımı, verdiyi qərarı çoxları ABŞ-də demokratiyaya növbəti zərbə kimi dəyərləndirir. Bütün dünyada qanun ali hesab edilir. Qanun, məhkəmə qarşısında hər kəs bərabərdir. Dünyanın hər yerində həbsxanalar mövcuddur. Həmin həbsxanalar varlıya, kasıba, vəzifəliyə, vəzifəsizə ayrılmadan qanuni şəkildə cəzasını çəkməli olanlar üçündür.

Hanter Baydenin də cinayət əməlləri qanunla və məhkəmənin hökmü ilə sübuta yetirilib. Odur ki, hər kəs bu fikirdədir ki, cinayətkar oğlunu əfv etməklə Co Bayden qanunsuzluğa yol verib. ABŞ-nin hazırkı lideri ölkəsində hər kəsdən öncə özü əməl etməli, özü qorumalı olduğu qanunu pozub.

Zöhrə FƏRƏCOVA,

Azərbaycan .-2024.- 4 dekabr (№ 267).- S.9.