Qərbin siyasi avantüralarının maliyyə maxinasiyaları

Fransanın "Mediapart", İtaliyanın "Il Fatto Quotidiano", Yunanıstanın "Drop Site" və "Reporters United" nəşrlərinin apardıqları birgə araşdırmalarda Mütəşəkkil Cinayətkarlıq və Korrupsiya Hesabatı Layihəsi - OCCRP haqqında çox maraqlı faktlar ortaya çıxıb. Belə ki, araşdırmada OCCRP-nin mənsubluğu, maliyyə mənbələri, əsl məqsəd və məramı bəlli olub. Bununla Mütəşəkkil Cinayətkarlıq və Korrupsiya Hesabatı Layihəsinin əsl fəaliyyəti ifşa edilib.

"Dropsitenews.com" resursunda dərc olunmuş "Jurnalistika nəhəngi büdcəsinin yarısını ABŞ hökumətindən alır" başlıqlı məqalədə sensasiyalı məlumatlar öz əksini tapıb.

Öncə onu vurğulayaq ki, özünü 2007-ci ildə yaradılmış müstəqil təhqiqat konsorsiumu kimi təqdim edən OCCRP əldə olunan mühüm məlumatların guya araşdırmaçı jurnalist məhsulu kimi təqdimatı prosesini həyata keçiməklə məşğul olub. Bir müddət öncə Azərbaycan mətbuatında dərc edilən bir araşdırmada təşkilatın saytına istinadən deyilirdi ki, qurumun yerləşmə ərazisi Sarayevo və Buxarestdədir. Beş postsovet ölkəsi - Rusiya, Ukrayna, Latviya, Ermənistan və Gürcüstanla əməkdaşlıq və nümayəndəlik əlaqələri barədə məlumat verilirdi. Qeyd olunurdu ki, təşkilat jurnalistlər üçün qiymətli mənbə ola biləcək şirkət yazışmalarının, bank-maliyyə əməliyyatlarının, istintaq protokollarının, məhkəmə stenoqramlarının "online" resursunu hazırlayır və təqdim edir.

"Jurnalistika nəhəngi büdcəsinin yarısını ABŞ hökumətindən alır" başlıqlı məqalədə təşkilatın maliyyəçiləri arasında Soros Fondunun, USAID və ABŞ Milli Demokratiya Fondunun adları keçir.

"Dropsitenews.com"un məlumatına əsasən, illik 20 milyon avro büdcəyə malik və 200 əməkdaş çalışdıran OCCRP ABŞ dövlətinin layihəsidir. 2008-ci ildə kiçik bir media qrupu kimi fəaliyyətə başlayanda sərəncamında Dövlət Departamentinin Beynəlxalq Narkotik və Hüquq Mühafizə Məsələləri Bürosunun (İNL) verdiyi 1 milyon dollar vəsait olub. Bu vəsait də Delaverdə yerləşən "Jurnalistikanın İnkişafı Şəbəkəsi"nə (Journalism Development Group, LLC) verilib və bundan sonra OCCRP həyata vəsiqə qazanıb.

Qurulduğu dövrdən indiyə kimi OCCRP ABŞ hökumətindən 47 milyon dollar vəsait alıb. Əlavə olaraq 1,1 milyon dollar Avropa İttifaqından və 14 milyon dollar da Avropa ölkələrindən alan təşkilatın büdcəsinin 52 faizi ABŞ hesabına formalaşıb. OCCRP-nin ABŞ hökuməti ilə əlaqələri o qədər sıxdır ki, hətta USAID-in ermənipərəst rəhbəri Samanta Pauer onu "tərəfdaş qurum" adlandırır. USAID-in OCCRP üzərində hökmünü daha aydın təsəvvür etmək üçün bir faktı qeyd etmək kifayətdir ki, o, OCCRP-dən layihələri və əməkdaşları ilə bağlı hər il hesabat tələb edir və bütün bunlarla bağlı söz sahibidir.

OCCRP ABŞ kəşfiyyatı tərəfindən ötürülən məlumatları araşdırmaçı jurnalist məhsulu kimi təqdim edir və bununla da Vaşinqtonun xarici siyasətində təsir rıçağı rolunu oynaması faktını təsdiqləyir.

OCCRP-nin Cənubi Qafqaz siyasəti isə bizlərə çox yaxşı bəllidir. Hələ bir dəfə də olsun Azərbaycan reallıqları ilə bağlı doğru-düzgün araşdırma təqdim etməyən təşkilat yalnız işğalçı Ermənistanın maraqlarına xidmət edən "fəaliyyəti" ilə seçilib.

Bu təşkilat hər zaman Azərbaycanı əsas hədəf kimi seçərək ölkənin daxili işlərinə qarışmaq və əsasən, erməni maraqlarının müdafiəçisi kimi çıxış etməklə çirkin kampaniyalar həyata keçirib.

USAID-in ermənipərəst rəhbəri Samanta Paueri bütün dünya azərbaycanlıları yaxşı tanıyır. "Ermənidən betər erməni" olan bu xanım OCCRP-ni "tərəfdaş qurum" hesab edirsə, buna başqa ad vermək olmaz. Azərbaycan bu təşkilatın hər zaman hədəfində olan dövlətlərdən biridir. Hazırda OCCRP-nin əməliyyatlarını USAID əməkdaşı Şennon Maquayrinin kurasiya etməsi də bunu təsdiqləyən reallıqdır.

İndiyə qədər Avropa İttifaqı, Avropa ölkələri, xüsusilə ABŞ-dən aldığı vəsait hesabına büdcəsini formalaşdıran OCCRP-nin Azərbaycanla bağlı "araşdırmalarında" Xədicə İsmayıldan vasitə kimi istifadə edilməsi də reallıqdır. Bəlli olur ki, X.İsmayıl, əslində, sifariş yerinə yetirib. O, müəyyən materiallarda yalnız imzasının istifadəsinə razılıq verərək bunun müqabilində pul qazanıb.

Azərbaycanın dünyada ən irimiqyaslı və mötəbər tədbirlərdən biri hesab edilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sammitinə evsahibliyi ərəfəsində OCCRP-nin "fəaliyyətini" görməmək mümkün deyildi. ABŞ Dövlət Departamenti tərəfindən aldığı sifarişi yerinə yetirən təşkilat bütün imkanları ilə çalışırdı ki, COP29-da Azərbaycanın yüksəksəviyyəli evsahibliyinə xələl gətirsin, kölgə salsın. "Vaşinqton Post", "Qardian", "CNN"nin bu oyunda informasiya təminatçısı kimi çıxış etmələri də Qərbin Azərbaycana qarşı əsl niyyətini göstərən reallıqlardır.

Bir sözlə, bu günə kimi OCCRP-nin Azərbaycan da daxil olmaqla apardığı araşdırmaların sifarişçisi, icraçıları, onların qarşısına qoyulmuş vəzifələr aydındır. İndi maraqlıdır ki, bu boyda araşdırmadan, real faktlardan sonra OCCRP və onun arxasında duranlar, yəni ABŞ Dövlət Departamenti, USAID-in rəhbəri Samanta Pauer buna necə don geyindirəcəklər?!

R.BAXŞƏLİYEV,

Azərbaycan.- 2024.- 5 dekabr (№ 268).- S.5.