Qərb Gürcüstanda qarşıdurma yaratmaqda çirkin məqsəd güdür

Oktyabrın 26-da Gürcüstanda keçirilən parlament seçkilərindən sonra bu ölkədə Qərbin təhriki və dəstəyi ilə mitinqlər, qarşıdurmalar başlayıb. Gündən-günə vəziyyət gərgin xarakter alır. Buna səbəb isə Qərbin seçkilərdə iqtidar partiyasının qələbəsini qəbul etməməsidir. Qərbin dedikləri ilə oturub-duran gürcü müxalifəti ölkədə xaos yaradır, insanları mitinqə çağırır, hüquq-mühafizə orqanlarına qarşı zorakılıq göstərir.

Belə qarşıdurmalar, mitinqlər Gürcüstanda ilk dəfə deyil baş verir. Arxada qalmış 24 il ərzində bu ölkədə dəfələrlə qalmaqallı hadisələr baş verib, gərgin günlər yaşanıb. 2003-cü ildə Gürcüstanda "qızılgül inqilabı" adlandırılan hadisə baş verib. Qərbin sifarişi ilə həyata keçirilmiş "qızılgül inqilabı" nəticəsində ovaxtkı prezident Eduard Şevardnadze tutduğu vəzifə ilə vidalaşmalı olub. Təəssüflər ki, Qərbin o zamanlar Gürcüstanda başlatdığı qarşıdurma, hakimiyyət çevrilişi planları davam edir. Qərb ətək-ətək pul payladığı qeyri-hökumət təşkilatları vasitəsilə proseslərə müdaxilə edir, gürcü xalqının hüquqlarını kobud şəkildə pozur. Qeyri-hökumət təşkilatlarını maliyyələşdirməklə sanki "dövlət içində dövlət" qurur. Sonra da onların vasitəsilə ölkədə xaos yaradır. Xalqın iradəsinin, istəyinin əleyhinə gedir. Qonşu respublikada baş verən qarşıdurmalar bir daha göstərir ki, Qərb verdiyi qrantlar hesabına Gürcüstanda QHT-çilərdən ibarət manqurt dəstələr, LGBT və ifrat liberal mövqe tutan sağ təmayüllü düşərgə formalaşdırıb. İndi də onların vasitəsilə ölkədə vətəndaş qarşıdurmasını körükləyir. Bu qarşıdurmadan istifadə edərək çirkin məqsədlərinə çatmağa çalışır.

Gürcü xalqı öz milli-mənəvi dəyələrinə, adət-ənənələrinə hər zaman sadiq qalıb, hörmətlə yanaşıb. Ancaq qrant dəllalları Qərbin diktəsi və maliyyəsi ilə Gürcüstan cəmiyyətinin əsaslarını ifrat sağçı düşüncə sistemi ilə zədələyib. Bütün çirkin işlər isə demokratiya və insan hüquqları kimi dəyərlərin "çətir"i altında aparılıb.

Hakim "Gürcü Arzusu-Demokratik Gürcüstan" Partiyasının deputatı İrakli Kirtsxaliya ölkəsində baş verən hadisələrdən danışarkən qeyd edib ki, Gürcüstan hökumətinin Avropa İttifaqına (Aİ) qəbul olması ilə bağlı danışıqların başlanmasını 2028-ci ilə qədər dayandırmaq qərarı ilə razılaşmayanların etiraz dalğası, əslində, casusların təşkil etdiyi dövlət çevrilişinə cəhddir. Onun sözlərinə görə, baş nazir İrakli Kobaxidze bu qərarın ölkənin Aİ-yə inteqrasiyasının dayandırılması demək olmadığını izah etsə də, Prezident Salome Zurabişvili və müxalifət düşünülmüş şəkildə dezinformasiyalar yayaraq insanları mitinqlərə dəvət edir, iğtişaşlar yaratmağa çalışırlar.

Gürcüstan hökumətinin Avropa İttifaqına daxil olmaqla bağlı danışıqları 2028-ci ilə qədər dayandırmaq qərarı çox məntiqlidir. Tarixə nəzər salanda görürük ki, Gürcüstan hələ 1999-cu ildə Avropa İttifaqına üzvlüyə namizəd statusu qazanmışdı. Amma tarix göstərir ki, arxada qalan 25 il ərzində bu məsələ müsbət həllini tapmadı. Avropa İttifaqı hər dəfə bir bəhanə gətirərək Gürcüstanın arzularını reallaşdırmadı. Bütün bunlar bir daha aydın şəkildə göstərdi ki, Avropa İttifaqının Gürcüstanı sıralarına qəbul etmək fikri yoxdur. Sonuncu dəfə isə Aİ bəyan edib ki, Gürcüstanı ən yaxşı halda 2030-cu ildə quruma üzv qəbul edə bilər. Təbiidir ki, bu da Qərbin növbəti yalanıdır. Çünki Gürcüstanın hazırkı durumda Aİ-yə üzvlük məsələsi mümkün deyil. Məlumdur ki, Gürcüstan ərazisinin 20 faizi işğal altındadır. Belə vəziyyətdə isə heç bir təşkilat bu ölkəni sıralarına qəbul etməz. Gürcüstan hökuməti də Qərbin yalanlarına cavab olaraq 2028-ci ilə qədər bu mövzuda danışıqları davam etdirməyi dayandırıb. Qərb isə onunla masa arxasına oturub danışmayan hökumətə "rəngli inqilab"larla, qarşıdurmalarla, mitinqlərlə cavab verir. Belə çirkin əməllərdən sonra Qərbin səmimiliyinə inanmaq avamlıqdan başqa bir şey deyil.

Hadisələrin gedişini izlədikcə şahidi oluruq ki, Qərb açıq şəkildə ona üz göstərməyən, dediklərinə baş əyməyən Gürcüstanın üzərinə gedir. Əvvəlcə bu ölkəyə qarşı iqtisadi dəstəyi dayandırdı, siyasi rəhbərlərin Qərb ölkələrinə gəlişinə qadağa qoydu. Bir müddət sonra isə Aİ Gürcüstana 121 milyon avronun ayrılması qərarını ləğv etdi. Aİ-nin xarici işlər və təhlükəsizlik siyasəti üzrə ali nümayəndəsi Cozep Borel Brüsseldə keçirilən mətbuat konfransında bildirdi ki, Aİ Gürcüstan hökuməti üçün ayrılmış 121 milyon avro vəsaiti başqa məqsədlərə yönəldəcək. Bütün bunlara cavab olaraq isə noyabrın 28-də baş nazir İrakli Kobaxidze Gürcüstanın 2028-ci ilin sonuna qədər Aİ ilə danışıqları dondurduğunu elan etdi. Bu da Qərbi qəzəbləndirdi. İndi Qərb qəzəbini qonşu ölkədə başlatdığı "rəngli inqilab"la, qarşıdurmalarla "soyutmağa" çalışır.

Ümumiyyətlə, baş verən bu gərgin hadisələr göstərir ki, ABŞ və Qərb postsovet ölkələrindən həmişə çirkin məqsədlərinə çatmaq üçün siyasi alət kimi istifadə edib. Həmin ölkələrdə "rəngli inqilab"lar edərək sanki eksperimentlər keçiriblər. Təəssüflər olsun ki, bu çirkin siyasət yenə də səngimək bilmir. Biz bunu Gürcüstanda baş verən qanlı hadisələrin fonunda bir daha açıq şəkildə görürük. Qərb açıq-açığına gürcü xalqının istəyinə, iradəsinə zidd addımlar ataraq Gürcüstanda qarşıdurma yaradır, insanları hökumət əleyhinə mitinqə çağırır. Çirkin məqsədinə çatmaq üçün bütün vasitələrdən istifadə edir. Amma bunlarla gürcü xalqının iradəsini qırıb arzusuna çata bilməyəcək. Müdrik gürcü xalqı bu çətin anlarda təxribatçı çağırışlara uymayacaq, öz hökumətinin, öz dövlətinin yanında olacaq.

Vahid MƏHƏRRƏMOV,

Azərbaycan.-2024.- 5 dekabr (№ 268).- S.5.