Qarabağ və Şərqi Zəngəzuru dirçəltmək
həmin əraziləri
işğaldan azad etdiyimiz kimi müqəddəs borcumuzdur
Bəlkə də 4 il əvvəl torpaqlarımız
işğaldan azad ediləndə heç kəs inanmazdı ki, Qarabağda və Şərqi Zəngəzurda qısa müddət ərzində
həyat yenidən qaynayacaq, minlərlə soydaşımız büsbütün
yenidən qurulan doğma yurda dönəcək. Amma sürətlə
aparılan bərpa və quruculuq işləri, icra olunan misli görünməmiş
layihələr yuxu kimi görünən bu arzunu reallığa
çevirdi və hər kəs əmin oldu ki, Böyük qayıdış proqramı
quru kağız parçası yox, gerçəkliyə gedən
yolun başlanğıcıdır.
Bu gün regionda aparılan nəhəng quruculuq işləri bir an belə dayanmır. Prezident
İlham Əliyevin imzaladığı
sərəncamların icrası
çərçivəsində irimiqyaslı tikinti işləri həyata keçirilir, müasir infrastruktur qurulur. Hamı dərk edir ki, Qarabağ və Şərqi Zəngəzurun dirçəldilməsi
ölkənin birnömrəli
vəzifəsidir. Dövlət
başçısı VII çağırış
Milli Məclisin ilk iclasındakı
nitqində bu barədə demişdir
ki, Qarabağ və Şərqi Zəngəzurun
bərpası hər birimizin önəmli vəzifəsidir. Prezident böyük Zəfərdən
sonra görülmüş
işlərin miqyasının
çox geniş olduğunu qeyd edərək bildirmişdir:
"İnfrastruktur layihələri
çox geniş miqyas alıb, 3 min kilometr avtomobil yolu inşa edilib. Ümumi layihələrin içində
45 tunel nəzərdə
tutulur və bu tunellərin uzunluğu 70 kilometrdir - yəni o dağlarda tunel açmaq, yol salmaq asan
məsələ deyil
- 450 körpünün inşası
nəzərdə tutulur.
Dəmir yolları, iki beynəlxalq hava limanı istifadəyə verilmişdir.
Enerji potensialı gücləndirilir və üç il ərzində
270 meqavat gücündə
su-elektrik stansiyaları
istismara verilmişdir və bu proses davam etdirilir. Məktəblər, xəstəxanalar,
sosial obyektlər, kəndlər salınır.
Bir sözlə, Qarabağın
və Şərqi Zəngəzurun dirçəldilməsi
üçün genişmiqyaslı
işlər aparılır.
Bilmirəm, tarixdə
buna oxşar bərpa işləri hansısa ölkədə aparılmışdır,
ya yox. Ancaq
bu fakt bir
də onu göstərir ki, bu, bizim üçün həmişə ən vacib məsələ olub, - həm işğal dövründə
məcburi köçkünlər
üçün yeni qəsəbələr
salınırdı və
xüsusilə indiki şəraitdə".
Amma görülən işlər
təkcə bunlar da deyil. Ağdam və "Araz Vadisi İqtisadi Zonası" sənaye parkları tam gücü
ilə fəaliyyətə
başlayandan sonra Qarabağın və Şərqi Zəngəzurun
iqtisadi mərkəzi olacaqlar. Bu ərazilərdə
yeni elektrik stansiyaları
tikilir, özü də ekoloji cəhətdən təmiz
olan su-elektrik stansiyaları. Başa çatmasına sayılı
günlər qalan bu ilin sonuna
kimi Qarabağda və Şərqi Zəngəzurda daha 12 stansiyanın istismara verilməsi nəzərdə
tutulur. Baxmayaraq ki, regionun sərt,
keçilməz iqlim və relyefi var, burada ümumi
gücü 226 MVt olan 4 su elektrik stansiyasında elektrik
avadanlıqlarının quraşdırılması və sazlama
işləri bir gün belə təxirə salınmır.
Bundan başqa,
regionda "ağıllı" kəndlər və şəhərlər
salınır, bu zaman müasir texnologiyalar tətbiq edilir,
yeni infrastruktur qurulur. Bu məqsədlə Azərbaycanın
dövlət büdcəsindən ayrılan vəsaitin həcmi
də hər il artırılır. Həmin hesaba azad
olunmuş ərazilərdə mədəni, tarixi irsimizin bərpası
işləri də görülür. İndiyəcən ermənilər
tərəfindən dağıdılmış 7 məscid
yenidən qurulub, 8 məscidin isə inşası davam edir.
Ağdamın Cümə, Qiyaslı və Şuşanın
Yuxarı və Aşağı Gövhər ağa, Saatlı
məscidləri artıq bərpa olunub. Paralel olaraq, dahi Azərbaycan
bəstəkarı Üzeyir bəy Hacıbəylinin və
Bülbülün ev-muzeyləri açılıb, heykəlləri
qoyulub. Şuşada "Xarıbülbül" hoteli istifadəyə
verilib, yeni mehmanxana və muzey mərkəzi tikilib.
Qısa müddətdə
görülən bu işlər deməyə əsas verir ki,
regionun iqtisadi potensialından səmərəli istifadə
olunmaqla əhalinin məskunlaşma səviyyəsinin
işğaldan əvvəlki səviyyəyə
çatdırılması vaxtında təmin ediləcək.
Buna kimsə şübhə etməsin. Prezident İlham
Əliyev verdiyi hansı sözə əməl etməyib?!
Üstəlik də regionda icra olunan layihə və proqramlara,
çoxyönlü tədbirlərə dövlət
başçısı özü rəhbərlik edirsə...
Hər səfərində neçə-neçə sosial
obyektin təməlini qoyması,
açılışını etməsi bölgənin
sürətlə dirçəldilməsindən xəbər
vermirmi?!
Bu gün
Qarabağ və Şərqi Zəngəzur investorlar
üçün maraq mərkəzinə çevrilib. Aybaay
deyil, günbəgün regiona sərmayə yatırmaq istəyən
yerli və xarici iş adamlarının sayı artır. Bu da
təsadüfi deyil. Hökumət Qarabağ və Şərqi
Zəngəzura investisiya qoymaq istəyən sahibkarlar
üçün sərfəli güzəştlər tətbiq
edir, onlar üçün münbit şərait yaradır.
Qalır bircə sərmayə qoyub iş görmək.
Züleyxa
ƏLİYEVA,
Azərbaycan.-2024.- 5 dekabr (№ 268).- S.7.