Qəzanın kənar müdaxilədən baş verdiyi təsdiqini tapdı

Dekabrın 25-də qapımızı acı xəbər döydü. Ürəkləri üzən, qəlbləri kövrəldən, gözləri yaşardan xəbərdə bildirlirdi ki, "Azərbaycan Hava Yolları"na məxsus Bakı-Qroznı aviareysini həyata keçirən sərnişin təyyarəsi dekabrın 25-də Qazaxıstanın Aktau şəhəri yaxınlığında qəzaya uğrayıb. Avialaynerdə olan 67 nəfərdən 42-si Azərbaycan, 16-sı Rusiya, 6-sı Qazaxıstan, 3-ü isə Qırğızıstan vətəndaşı olub. Onlardan 38-i həlak olub. Pilotların peşəkarlığı və bacarığı sayəsində 29 sərnişin sağ qalıb.

Sankt-Peterburq şəhərində keçiriləcək MDB-yə üzv ölkələrin dövlət başçılarının qeyri-rəsmi Zirvə görüşündə iştirak etmək üçün Rusiya Federasiyasına səfərə yola düşən Prezident İlham Əliyevə Rusiya hava məkanında olarkən baş vermiş təyyarə qəzası haqqında məruzə edilib və dövlətimizin başçısı dərhal geri dönmək barədə tapşırıq verib. Təyyarə endikdən sonra Prezident İlham Əliyev hadisə ilə bağlı Heydər Əliyev Beynəlxalq Hava Limanında müşavirə keçirmişdir. "Mediada, sosial şəbəkələrdə təyyarənin qəzaya uğraması anları mövcuddur. Ona görə onu hər kəs görə bilər. Ancaq qəzanın səbəbləri bizə bəlli deyil. Müxtəlif versiyalar var. Hesab edirəm ki, hələ bu barədə danışmaq tezdir. Məsələ tam araşdırılmalıdır. Baş Prokurorluq tərəfindən cinayət işi açılmışdır və təbii olaraq, Azərbaycan ictimaiyyəti həm komissiyanın işinin nəticələri, həm də cinayət işinin gedişatı ilə bağlı müntəzəm olaraq məlumatlandırılacaq. Qəzada həlak olanların və onların yaxınlarının acısını çəkərək həlak olanlara Allahdan bir daha rəhmət, yaralananlara şəfa, həlak olanların, yaralananların yaxınlarına, doğmalarına səbir diləyirəm," - deyə Prezident İlham Əliyev müşavirədə bildirmişdir.

Prezident İlham Əliyevin sərəncamı ilə baş vermiş hadisənin araşdırılması və müvafiq tədbirlərin görülməsi ilə bağlı Baş nazir Əli Əsədovun rəhbərliyi ilə Dövlət Komissiyası yaradıldı. Azərbaycan nümayəndələrindən ibarət heyət dərhal qəzanın baş verdiyi Qazaxıstanın Aktau şəhərinə ezam olundu.

Təyyarə qəzasında həlak olanların xatirəsini anmaq üçün dekabr ayının 26-da Azərbaycanda mətəm elan olundu.

Qazaxıstanın Aktau şəhəri yaxınlığında AZAL-a məxsus sərnişin təyyarəsi qəzasında həlak olanların nəşi və yaralananlar mərhələ-mərhələ Bakıya gətirildi.

Qəzadan sonra mütəxəssislərin gəldiyi ilkin qənaət bundan ibarət idi ki, bu dəhşətli hadisə Rusiya hava məkanında kənar müdaxilə nəticəsində baş vermişdir. Bu qənaətə gəlməyə də əsas verən amillər sırasında təyyarənin qalıqları üzərindəki müəyyən fəsadlar və şahidlərin ifadələri idi. Şahidlər Qroznı səmasında atəş səslərini eşitdiklərini bildirirdilər. Bütün deyilənlər və gövdəsindəki kənar müdaxilələr təyyarənin vurulduğu ehtimalının inandırıcı olduğunu göstərdi.

Həm Azərbaycan, həm də xarici aviasiya ekspertləri hesab edirdilər ki, təyyarənin GPS sistemləri elektron tıxaclardan təsirlənib və ətrafa səpələnən qəlpələrdən zədələnib.

Dekabrın 28-də Azərbaycan Prezidenti İlham Əliyevə zəng vuran Rusiya Prezidenti Vladimir Putin AZAL-a məxsus sərnişin təyyarəsinin Rusiyanın hava məkanında fiziki-texniki xarakterli kənar müdaxiləyə məruz qalması və nəticədə baş vermiş faciəvi hadisə ilə bağlı üzrxahlığını ifadə edib, bu qəzada həlak olanların ailələrinə və yaxınlarına dərin və ən səmimi başsağlığını bir daha çatdırıb, xəsarət alanların tezliklə şəfa tapmasını dilədiyini deyib".

Prezident İlham Əliyev "Azərbaycan Hava Yolları"na məxsus sərnişin təyyarəsinin Rusiyanın hava məkanında olan zaman kənar fiziki-texniki müdaxiləyə məruz qaldığını və idarəetməsini tam itirdiyini, Qazaxıstanın Aktau şəhərinə doğru yönləndirildiyini, yalnız pilotların şücaəti və peşəkarlığı sayəsində qəza enişi edə bildiyini vurğulayıb. Dövlətimizin başçısı təyyarənin gövdəsində çoxsaylı dəliklərin olmasının, hələ havada olarkən sərnişinlərin və heyət üzvlərinin təyyarənin göyərtəsini dəlib içəri daxil olan yad hissəciklərlə yaralanmalarının, bu xüsusda sağ qalan təyyarə bələdçilərinin və sərnişinlərin ifadələrinin kənar fiziki-texniki müdaxilə faktını təsbit etdiyini deyib.

Dekabrın 29-da Heydər Əliyev Beynəlxalq Hava Limanında 2 pilot, bir bələdçi olmaqla həlak olmuş ekipaj üzvləri ilə vida mərasimi keçirilib. Mərasimdə Prezident İlham Əliyev və birinci xanım Mehriban Əliyeva da iştirak edib, onların ailə üzvlərinə və yaxınlarına başsağlığı veriblər.

Azərbaycan xalqı cəsur bələdçi və pilotların qəhrəmanlığını, həmçinin qəzada həlak olanları heç vaxt unutmayacaq. Onların xatirəsini həmişə hörmət və ehtiramla yad edəcək.

Vahid MƏHƏRRƏMOV,

Azərbaycan.-2024.- 30 dekabr (№ 290).- S.9.